ଏଣିକି ପିଲାଙ୍କୁ କରୋନା ଟିକା
କରୋନା ମହାମାରୀ ବିରୋଧରେ ଲଢେଇ ଜାରି ରହିଥିବା ବେଳେ ଆସିଛି ଖୁସି ଖବର । ଏଣିକି ପିଲାଙ୍କୁ ମିଳିବ କରୋନା ଟିକା । ୨ରୁ ୧୮ ବର୍ଷ ପିଲାଙ୍କୁ କରୋନା ଟିକା ଦେବା ନେଇ ଡିସିଜିଆଇ ଅନୁମତି ଦେଇଛି । ପିଲାଙ୍କୁ କୋଭାକ୍ସିନର ୨ଟି ଡୋଜ ଦେବାକୁ ଡିସିଜିଆଇ ମଞ୍ଜୁରୀ ଦେଇଛି । କେନ୍ଦ୍ର ସରକାରଙ୍କ ପକ୍ଷରୁ ପିଲାଙ୍କୁ ଟିକା ନେଇ ଗାଇଡଲାଇନ ଜାରି ପରେ ଆରମ୍ଭ ହେବା ଟିକାକରଣ ପ୍ରକ୍ରିୟା ।
ଭାରତ ବାୟୋଟେକ ପିଲାଙ୍କୁ କରୋନା ଟିକା ନେଇ ଫେଜ ଟୁ ଓ ଫେଜ ଥ୍ରୀ ଟ୍ରାଏଲ କରିଥିଲା । ଟ୍ରାଏଲରେ ପିଲାଙ୍କ କୌଣସି କ୍ଷତି ହୋଇନଥିବା ପ୍ରମାଣିତ ହୋଇଛି । ଟ୍ରାଏଲ ଶେଷ ପରେ ଡିସିଜିଆଇକୁ ଭାରତ ବାୟୋଟେକ ରିପୋର୍ଟ ଦେଇଥିଲା । ଏବେ ଡିସିଜିଆଇ କୋଭାକ୍ସିନକୁ ଅନୁମୋଦନ କରିଛି । ଭାରତ ବାୟୋଟେକ ଓ ଆଇସିଏମଆର ମିଶି କୋଭାକ୍ସିନ ଟିକା ବିକଶିତ କରିଥିଲେ । ଏହା ସ୍ୱଦେଶୀ କରୋନା ଟିକା । କରୋନା ଭାଇରସ ବିରୋଧରେ କୋଭାକ୍ସିନ କ୍ଲିନିକାଲ ଟ୍ରାଏଲରେ ୭୮ ପ୍ରତିଶତ ପ୍ରଭାବଶାଳୀ ପ୍ରମାଣିତ ହୋଇଛି ।
ଆଗକୁ କରୋନା ତୃତୀୟ ଲହର ଆସିବାର ସମ୍ଭାବନା ଥିବାରୁ ଏହା ପୂର୍ବରୁ ଶିଶୁଙ୍କୁଏହି ଟିକା ଦିଆଯିବ ଖୁବ ପ୍ରଭାବୀ ସାବ୍ୟସ୍ତ ହେବ । ଯଦି ତୃତୀୟ ଲହର ପୂର୍ବରୁ ପିଲାଙ୍କୁ କରୋନା ଟିକା ମିଳେ ତେବେ ଦେଶ ପାଇଁ ଏହା ଏକ ବଡ଼ ଉପଲବ୍ଧି ହେବ । ସୂଚନା ଅନୁସାରେ ସେହି ପିଲାଙ୍କୁ ଆଗ କରୋନା ଟିକା ଦିଆଯିବ,ଯାହାଙ୍କ ଶ୍ୱାସ ସମସ୍ୟା ରହିଛି । ସରକାର ଡାକ୍ତରଖାନାରେ ଏହି ଟିକା ମାଗଣାରେ ମିଳିବ ।
ଦେଶରେ ଏବେ ୮୦ କୋଟିରୁ ଅଧିକ ଲୋକଙ୍କୁ ଟିକା ଦିଆସରିଲାଣି । ଦେଶରେ କରୋନାକୁ ମାତ ଦେବା ପାଇଁ ଟିକାକରଣକୁ ବ୍ୟାପକ କରିଛନ୍ତି କେନ୍ଦ୍ର ସରକାର । ସଂକ୍ରମଣ ସାମାନ୍ୟ ହ୍ରାସ ପାଇବା ପରେ ନବମ ଓ ଦଶମ ଶ୍ରେଣୀ ପିଲାଙ୍କ ପାଇଁ ସ୍କୁଲ ଖୋଲାଯାଇ ଶ୍ରେଣୀ ଗୃହରେ ପାଠପଢା ଆରମ୍ଭ ହୋଇଛି । ଆଗକୁ ପ୍ରାଥମିକ ସ୍ତରରେ ସ୍କୁଲ ଖୋଲିବାକୁ ଯୋଜନା ରଖିଛନ୍ତି ସରକାର । ଏହାରି ଭିତରେ ଶିଶୁଙ୍କୁ ପାଇଁ କୋଭାକ୍ସିନ ଟିକାକୁ ଅନୁମତି ମିଳିବ ସାମାନ୍ୟ ଆଶ୍ୱସ୍ତି ଆଣିଛି ।