ଭୁବନେଶ୍ବର: ବିଧାନସଭାରେ ଶାସକ ଦଳ ଓ ବିରୋଧୀ ବିଜେପି ମଧ୍ୟରେ ବାକ୍ ଯୁଦ୍ଧ ଚାଲିଛି। ଗୃହ ଭିତରେ ପ୍ରତିବାଦ ପରେ ଆଜି ଗୃହ ବାହାରେ ଦୁଇ ପ୍ରମୁଖ ଦଳ ପକ୍ଷରୁ କରାଯିବ ବିକ୍ଷୋଭ ଶୋଭାଯାତ୍ରା। ରାଜଧାନୀ ରାଜରାସ୍ତାରେ ଗର୍ଜିବେ ଦୁଇ ଦଳ। ମୁହାଁମୁହିଁ ହେବେ ବିଜେଡି ,ବିଜେପି। ଗତ ସାତ ଦିନ ହେବ ବିଧାନସଭାରେ ଶୀତ ଅଧିବେଶନ ଗୋଟିଏ ବି ଦିନ ଚାଲିପାରିନଥିବା ବେଳେ ପ୍ରତିଦିନ ଗୃହରେ ବିରୋଧୀ ଓ ଶାସକ ଦଳର ସଦଦ୍ୟଙ୍କ ହୋହଲ୍ଲାଙ୍କୁ ଯୋଗୁଁ ଗୃହକୁ ମୁଲତବି କରାଯାଉଛି। ନିଜ ନିଜ ଜିଦରେ ବିରୋଧୀ,ଶାସକ ଦଳ ବିଧାୟକ ଅଟଳ ଥିବା ବେଳେ ଆଜି ରାଜରାସ୍ତାକୁ ଓହ୍ଲାଇ ପ୍ରତିବାଦ କରିବେ।
ମମିତା ମେହେର ହତ୍ୟା ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀଙ୍କୁ ବହିଷ୍କାର ଓ ସିବିଆଇ ତଦନ୍ତ ଦାବିରେ ଆଜି ବିଧାନସଭା ଘେରାଉ ଡାକରା ଦେଇଛି ବିଜେପି ଯୁବମୋର୍ଚ୍ଚା।ମମିତା ମେହେରକୁ ନ୍ୟାୟ ପ୍ରଦାନ ଦାବିରେ ବିଜେପି ଯୁବ ମୋର୍ଚ୍ଚା ବିଧାନସଭା ଘେରିବ। ଏଥିରେ ୧୦ ହଜାରରୁ ଅଧିକ ଲୋକଙ୍କୁ ସାମିଲ କରିବାକୁ ଦଳ ଯୋଜନା କରିଛି। ରାମ ମନ୍ଦିର ଛକରୁ ବିଜେପି ଯୁବ ମୋର୍ଚ୍ଚାର ଏକ ବିଶାଳ ଶୋଭାଯାତ୍ରା ବାହାରି ପିଏମଜିରେ ପହଞ୍ଚିବ। ସେଠାରେ
ଦଳ ପକ୍ଷରୁ ପ୍ରତିବାଦ କରାଯିବ। ଯେପର୍ଯ୍ୟନ୍ତ ମମିତାଙ୍କ ନ୍ୟାୟ ନମିଳିଛି ସେପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଦଳ ପକ୍ଷରୁ କୁହାଯାଇଛି।
ସେପଟେ ସମାନ ଦିନରେ କେନ୍ଦ୍ର ବିରୋଧରେ ଯୁଦ୍ଧଂ ଦେହି ଡାକରା ଦେଇ ଆଜି ବିଜେଡି ପକ୍ଷରୁ ରାଜଧାନୀରେ ବିକ୍ଷୋଭ, ଶୋଭାଯାତ୍ରା କରିବାକୁ ଯାଉଛି। ଦଳର ଯୁବ ମୋର୍ଚ୍ଚା ଓ ମହିଳା ଶାଖା ପକ୍ଷରୁ ଏକ ବିଶାଳ ଶୋଭଯାତ୍ରା କରାଯିବ।ତେବେ ବିଜେଡି ଶୋଭାଯାତ୍ରା ନିକୋ ପାର୍କରୁ ବାହାରି ସଚିବାଳୟ ମାର୍ଗ ଯାଏ ଯିବ। ବେକାରୀ,ଅହେତୁକ ଦରଦାମ ବୃଦ୍ଧି ପ୍ରତିବାଦରେ ଆଜି ବିଜେଡି ଆନ୍ଦୋଳନକୁ ଓହ୍ଲାଇବ।
ସେପଟେ ଆସନ୍ତାକାଲି ରାସ୍ତାକୁ ଓହ୍ଲାଇବ କଂଗ୍ରେସ। ମମିତା ମେହେର ପ୍ରସଙ୍ଗକୁ ନେଇ ଛାତ୍ର କଂଗ୍ରେସ ପକ୍ଷରୁ ବିଧାନସଭା ଘେରାଉ କରାଯିବ। ତେବେ ଆଜି ବିଜେପି ଓ ବିଜେଡି ପକ୍ଷରୁ ଆନ୍ଦୋଳନ ଡାକରା ଦିଆଯାଇଥିବାରୁ କମିସନରେଟ ପୁଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ୧୮ ପ୍ଲାଟୁନ ପୁଲିସ ଫୋର୍ସ. ୩ ଡିସିପି, ୬ ଅତିରିକ୍ତ ଡିସିପି, ୧୨ ଏସିପି, ୨୧ ଜଣ ଇନ୍ସପେକ୍ଟର ନିୟୋଜିତ ହେବେ ।