ଭୁଲ ତରିକାରେ ୧୧ ଥର ଟିକା ନେଇଥିଲେ । ଆଉ ଏବେ ଗିରଫ ହୋଇପାରନ୍ତି ବିହାର ମଧେପୁର ଜିଲ୍ଲାର ୮୪ ବର୍ଷୀୟ ବୃଦ୍ଧ ବ୍ରହ୍ମାଦେବ ମଣ୍ଡଳ । ବ୍ରହ୍ମାଦେବ ମଣ୍ଡଳଙ୍କ ବିରୋଧରେ ପୁରେନୀ ଥାନାରେ ମାମଲା ରୁଜୁ କରାଯାଇଛି । ଜିଲ୍ଲା ସ୍ୱାସ୍ଥ୍ୟ ଅଧିକାରୀ ଡାକ୍ତର ବିନୟ କୃଷ୍ଣ ପ୍ରସାଦଙ୍କ ଅଭିଯୋଗ ପରେ ବିଭିନ୍ନ ଧାରାରେ ମାମଲା ରୁଜୁ କରାଯାଇଛି । ଏବେ ତାଙ୍କୁ କୌଣସି ମୁହୃ ର୍ରେ ବି ଗିରଫ କରାଯାଇପାରେ । ବ୍ରହ୍ମାଦେବ ମଣ୍ଡଳଙ୍କ ବିରୋଧରେ ଧାରା ୧୮୮,୪୧୯, ୪୨୦ ଅନ୍ତର୍ଗତ ମାମଲା ରୁଜୁ କରାଯାଇଛି । ଯାହାକି ଜାମିନ ବୀହିନ ଧାରା ଅଟେ । କିନ୍ତୁ ବ୍ରହ୍ମାଦେବ ବୟସ୍କ ହୋଇଥିବା କାରଣରୁ ତାଙ୍କୁ ଜାମିନ ମିଳିଯାଇପାରେ ।
ବ୍ରହ୍ମାଦେବ ଗତ କିଛି ଦିନ ହେବ କରୋନାର ୧୧ ଟିକା ନେଇ ଚର୍ଚ୍ଚାରେ ଅଛନ୍ତି । କେତେବେଳେ ଆଧାର କାର୍ଡ ତ କେତେବେଳେ ଭୋଟର କାର୍ଡ ଦେଖାଇ ବ୍ରହ୍ମାଦେବ ଟିକା ନେଇଛନ୍ତି । ସବୁଠୁ ବଡ଼ କଥା ହେଉଛି, ବ୍ରହ୍ମାଦେବ କେଉଁ ଟିକାକରଣ କେନ୍ଦ୍ରରୁ କେତେ ଥର ଟିକା ନେଇଛନ୍ତି ତାର ତଥ୍ୟ ରହିଛି ।
୨୦୨୧, ଫେବୃଆରୀ ୧୩ରେ ସେ ପ୍ରଥମ ଡୋଜ ଟିକା ନେଇଥିଲେ । ଏହାପରେ ୨୦୨୧ ଡିସେମ୍ବର ୩୦ ମଧ୍ୟରେ ସେ ୧୧ ଥର ଟିକା ନେଇସାରିଛନ୍ତି । ତେବେ ୧୧ ଟିକା ନେବା ପରେ ବ୍ରହ୍ମାଦେବ ମଣ୍ଡଳ ଦାବି କରିଛନ୍ତି ଯେ, ଟିକା ନେବାରୁ ସେ ତାଙ୍କ ଶରୀରରେ ଥିବା ଗୁରୁତର ରୋଗରୁ ମୁକ୍ତି ପାଇଛନ୍ତି । ବ୍ରହ୍ମାଦେବ ହେଉଛନ୍ତି ଡାକ ବିଭାଗର ଜଣେ ଅବସରପ୍ରାପ୍ତ କର୍ମଚାରୀ ।