ହେ ଭଗବାନ! ଏମିତି ଦୁଃଖ କାହାକୁ ନଆସୁ। ଆଖି ଆଗରେ ଚାଲିଗଲା ମାଆ ଓ ୨ ମାସର ଭାଇର ଜୀବନ । ଆଉ ମୃତ୍ୟୁ ଫାଶରୁ ଅଳ୍ପକେ ବର୍ତ୍ତିଗଲା କୁନି ଝିଅ । ୩ ବର୍ଷର ଝିଅଟି ନିଜ ମାଆ ଓ କୁନି ଭାଇ ସହ ବସରେ ଘରକୁ ଖୁସିରେ ଫେରୁଥିଲା । ହେଲେ ସେହି ବସରେ ମାଆ ତା ହାତ ସବୁଦିନ ପାଇଁ ଛାଡିଯିବ ବୋଲି ସେ ଭାବିନଥିଲା । ଅଧାବାଟରେ ଜଗିଥିବା ମୃତ୍ୟୁ ଯେ ତା ମାଆକୁ ଛଡାଇନେବ ତାହା ଭାବିଲାବେଳକୁ ନିଶ୍ୱାସ ଅଟକି ଯିବା ପରି ଲାଗୁଛି ।
ଦୁର୍ଘଟଣା ମାଆ ପ୍ରାଣ ହରାଇଥିବା କଥା କୁନି ଝିଅ ଜାଣିନି । କେମିତି ବା ଜାଣିବ, ମୃତ୍ୟୁ କଣ ଜାଣିନଥିବା ଝିଅକୁ କେମିତି ବି ମାଲୁମ ହେବ ଯେ ତା ମାଆକୁ ମୃତ୍ୟୁ ନେଇଯାଇଛି ବୋଲି । ଦୁର୍ଘଟଣା ପରେ ସେ ଯେତେବେଳେ ତା ମାଆ ଓ ସାନ ଭଉଣୀକୁ ଖୋଜୁଛି କଇଁ କଇଁ କାନ୍ଦୁଛି । ଆଉ ନିରୀହ କଣ୍ଠରେ କହୁଛି ,ମୋ ମାଆ ପାଣି ପିଇବାକୁ ଯାଇଛି ।
ସୋର ବସ ଦୁର୍ଘଟଣା ପରେ ସମସ୍ତେ ନିଜ ନିଜ ସମ୍ପର୍କୀୟଙ୍କ କଥା ବୁଝିବାରେ ବ୍ୟସ୍ତ । ହେଲେ ସେତେବେଳେ କୁନି ଝିଅଟି ଆବାକ ହୋଇ ଏଣେତେଣେ ଚାହୁଁଥିଲା । ଅଜଣା ଜାଗାରେ କେମିତି କହିବ ତା ଘର କେଉଁଠି? ଅଜଣା ଲୋକଙ୍କ ଆଗରେ କିଛି ବି କହିପାରୁନି । କେମିତି ବା କହିବ? ଦୁନିଆକୁ କେତେବା ସିଏ ଜାଣିଛି । ଆଖି ଆଗରେ ମାଆକୁ ହରାଇ ଏକୁଟିଆ ହୋଇଯାଇଛି ଝିଅଟି ।ସବୁଠୁ ବଡ଼ କଥା ହେଲା କୁନି ଝିଅର କେହି ସମ୍ପର୍କୀୟ ଏଯାଏ ଆସିନାହାନ୍ତି । ସେ କେଉଁଠିକାର ବି ଜଣାପଡିନାହିଁ । ତା ଘର ମୟୂରଭଞ୍ଜ ଖୁଣ୍ଟା ବୋଲି ଖବର ମିଳୁଛି ।
ମୃତ୍ୟୁ କେତେବେଳେ ଆସେ?କେମିତି ଆସେ? କେହି ବି କହିପାରିବେ ନାହିଁ । ଏଇ ଯେମିତି ସୋର ବିଦୁ ଛକର ଛାତିଥର ବସ ଦୁର୍ଘଟଣାରେ ଅକାଳରେ ଚାଲିଗଲା ୬ ଜଣଙ୍କ ଜୀବନ । ମଝିର ରାସ୍ତାର ମୃତ୍ୟୁ ବାପ ହାତରୁ ଝିଅକୁ ଟାଣିନେଲା ତ କାହାଠୁ ମାଆ ଛଡାଇନେଲା । ଗତକାଲି ଦିନ ଦ୍ୱିପହରରେ ଉଦଳାରୁ ଭୁବନେଶ୍ୱର ଯାଉଥିଲା ଶାନ୍ତିଲତା ବସ । ବିଦୁ ଛକ ନିକଟରେ ପଛ ପଟୁ ଆସି ଏକ କୋଇଲା ବୋଝେଇ ଟ୍ରକ ଧକ୍କା ଦେଇଥିଲା । ଫଳରେ ବସଟି ୨୦ ଫୁଟ ତଳକୁ ଖସିପଡିଥିଲା । ଆଉ ନିମିଷକେ ଛାରଖାର ହୋଇଯାଇଥିଲା ସବୁକିଛି ।