ରାଜ୍ୟସଭାରେ ପୁଣି ଉଷୁନା ଚାଉଳ ପ୍ରସଙ୍ଗ । ରାଜ୍ୟସଭାର ଶୂନ୍ୟକାଳରେ ବିଜେଡି ପୁରୁଣା ଦାବି ଦୋହରାଇଛି । ସାଂସଦ ସସ୍ମିତ ପାତ୍ର, ଅମର ପଟ୍ଟନାୟକ,ପ୍ରସନ୍ନ ଆଚାର୍ଯ୍ୟ ଓ ପ୍ରଶାନ୍ତ ନନ୍ଦ ଉଷୁନା ଚାଉଳ ପ୍ରସଙ୍ଗରେ ପୁଣି ଦାବି ଉଠାଇଛନ୍ତି । ସାଂସଦମାନେ ଗୃହରେ କହିଥିଲେ ଯେ, ରାଜ୍ୟର ବଳକା ଉଷୁନା ଚାଉଳ ଏଫସିଆଇ ଉଠାଉନାହିଁ । ଯାହା ଫଳରେ ରାଜ୍ୟର ବହୁ ଚାଷୀ ପ୍ରଭାବିତ ହେଉଛନ୍ତି । ଏବଂ ଜାଣିଶୁଣି ଉଦ୍ଦେଶ୍ୟମୂଳକ ଭାବେ ଏଭଳି କରାଯାଉଛି ବୋଲି ସାଂସଦ ମାନେ କହିଥିଲେ ।
ତୁରନ୍ତ ଉଷୁନା ଚାଉନ ଉଠାଇବାକୁ ବିଜେଡି ସାଂସଦ ଦାବି କରିଛନ୍ତି । କେନ୍ଦ୍ର ଏକ ତରଫା ଏହି ଚାଉଳ ଉଠାଉନାହିଁ ବୋଲି ସାଂସଦ ଅଭିଯୋଗ କରିଛନ୍ତି । ଏହା ପୂର୍ବରୁ କେନ୍ଦ୍ର ସରକାରଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଷୁନା ଚାଉଳ ପ୍ରସଙ୍ଗରେ ଚିଠି ଲେଖିଥିଲେ । କିନ୍ତୁ କେନ୍ଦ୍ର ସରକାର ରାଜ୍ୟ ସରକାରଙ୍କ ଦାବି ଶୁଣୁନଥିବାରୁ ବିଜେଡି ସାଂସଦ ମାନେ ରାଜ୍ୟସଭାରେ ଅସନ୍ତୋଷ ପ୍ରକାଶ କରିଛନ୍ତି ।
ଉଷୁନା ଚାଉଳ ଉଠାଇବାକୁ ନେଇ ଦୀର୍ଘ ଦିନ ହେଲା ରାଜ୍ୟ-କେନ୍ଦ୍ର ମଧ୍ୟରେ ବିବାଦ ଲାଗିରହିଛି । ରାଜ୍ୟ ଏନେଇ କେନ୍ଦ୍ରକୁ ବାରମ୍ବାର ଅବଗତ କଲେ ମଧ୍ୟ କିଛି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି । ବିଜେଡି ସାଂସଦ ମାନେ ଦର୍ଶାଇଛନ୍ତି ଯେ, ରାଜ୍ୟରେ ବର୍ଷକୁ ବର୍ଷ ଅଧିକ ଧାନ ଉତ୍ପାଦନ ହେଉଛି । ସରକାର ଚାଷୀଙ୍କ ସ୍ୱାର୍ଥ ପାଇଁ ଉତ୍ପାଦିତ ଧାନର ଉଚିତ ମୂଲ୍ୟ ଦେବାକୁ ଅଧିକ ଧାନ ସଂଗୃହିତ କରୁଛନ୍ତି । ଯାହା ଫଳରେ ଅଧିକରୁ ଅଧିକ ଉଷୁନା ଚାଉଳ ମହଜୁଦ ରହିଛି । ମାତ୍ର ଏଫସିଆଇ ଏହି ବଳକା ଉଷୁନା ଚାଉଳ ଉଠାଉନଥିବାରୁ ଚାଷୀ କୂଳ ବହୁ ମାତ୍ରାରେ ପ୍ରଭାବିତ ହେଉଛି ବୋଲି ବିଜେଡି ସାଂସଦ କହିଛନ୍ତି ।