ଜାତୀୟ ସୁରକ୍ଷା ପରାମର୍ଶଦାତା(ଏନଏସଏ) ଅଜିତ ଡୋଭାଲଙ୍କ ଘରେ ଜଣେ ବ୍ୟକ୍ତି ଜବରଦସ୍ତ ପ୍ରବେଶ ପାଇଁ ଉଦ୍ୟମ କରିଛି । ମିଳିଥିବା ସୂଚନା ଅନୁସାରେ, ବ୍ୟକ୍ତି ଜଣକ କାର ନେଇ ଅଜିତ ଡୋଭାଲଙ୍କ ଘରେ ପ୍ରବେଶ କରିବାକୁ ଚେଷ୍ଟା କରିଥିଲା । କିନ୍ତୁ ସେଠାରେ ଥିବା ସୁରକ୍ଷାକର୍ମୀମାନେ ଠିକ ସମୟରେ ତାକୁ ଅଟକାଇ ହେପାଜତକୁ ନେଇଯାଇଛନ୍ତି । ଏବେ ଦିଳ୍ଲୀ ପୁଲିସର ଏକ ସ୍ପେଶାଲ ଟିମ ବ୍ୟକ୍ତି ଜଣକୁ ପଚରାଉଚରା ଜାରି ରଖିଛି ।
ପୁଲିସ ଅନୁସାରେ, ଅଟକ ରଖାଯାଇଥିବା ବ୍ୟକ୍ତି ଜଣକଠୁ ଆଶ୍ଚର୍ଯ୍ୟଜନକ କଥା ଶୁଣିବାକୁ ମିଳିଛି । ବ୍ୟକ୍ତି ଜଣକ କହିଛନ୍ତି ତାଙ୍କ ଦେହରେ କିଏ ଚିପ୍ ଲଗେଇ ଦେଇଛି ।ଏବଂ ରିମୋଟ୍ ଦ୍ୱାରା ତାଙ୍କୁ କଣ୍ଟ୍ରୋଲ କରାଯାଉଛି । କିନ୍ତୁ ଯାଞ୍ଚ ପରେ କୌଣସି ଚିପ୍ ମିଳିନାହିଁ । ଏହି ବ୍ୟକ୍ତି ଜଣକ କର୍ଣ୍ଣାଟକ ବେଙ୍ଗାଲୁରୁର ବାସିନ୍ଦା । ଲୋଧୀ କଲୋନୀ ସ୍ଥିତ ସ୍ପେଶାଲ ସେଲରେ ତାକୁ ପଚରାଉଚରା କରାଯାଉଛି । ଭାରତର ଜେମ୍ସ ବଣ୍ଡ କୁହାଯାଉଥିବା ଅଜିତ ଡୋଭାଲ ପାକିସ୍ତାନ ଓ ଚୀନର ନଜରରେ ରହିଛନ୍ତି । ଅନେକ ଆତଙ୍କବାଦୀ ସଂଗଠନର ଟାର୍ଗେଟରେ ମଧ୍ୟ ଡୋଭାଲ ଅଛନ୍ତି । ଗତ ବର୍ଷ ଫେବୃଆରୀରେ ଜୈସ ଆତଙ୍କବାଦୀଠୁ ଅଜିତ ଡୋଭାଲଙ୍କ ଅଫିସର ଏକ ରେକି ଭିଡିଓ ମିଳିଥିଲା । ଏହି ଭିଡିଓକୁ ଆତଙ୍କୀ ପାକିସ୍ତାନ ହ୍ୟାଣ୍ଡେଲରଙ୍କ ନିକଟକୁ ପଠାଇଥିଲା । ଏହା ପରେ ଡୋଭାଲଙ୍କ ସୁରକ୍ଷା ଆହୁରି ବଢାଇଦିଆଯାଇଥିଲା ।