ସରକାରୀ ଡାକ୍ତରଙ୍କ କୋଟି କୋଟି ସମ୍ପତ୍ତି। ଡାକ୍ତରଙ୍କ ଘରୁ ନଗଦ ଜବତ ହୋଇଥିଲା କୋଟିଏ ୧୨ ଲକ୍ଷ ଟଙ୍କା । ଯାହା ଓଡିଶା ଭିଜିଲାନ୍ସରେ ସର୍ବାଧିକ ନଗଦ ଜବତ ଟଙ୍କା । ଭିଜିଲାନ୍ସ ଅଧିକାରୀମାନେ ପୁଳା ପୁଳା ଟଙ୍କା ଦେଖି ତାଜୁବ ହୋଇଯାଇଥିବା ବେଳେ ଆଜି ଡାକ୍ତର ସୁକାନ୍ତ ଜେନାଙ୍କୁ ଗିରଫ କରି କୋର୍ଟ ଚାଲାଣ କରିଛି ପୁଲିସ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କୁ ଗିରଫ କରାଯାଇଛି ।
କୁବେର ଡାକ୍ତର ଜଣକ ହେଉଛନ୍ତି ପୁରୀ ଜିଲ୍ଲା ଚାରି ଛକ ସିଏଚସିର ସ୍ତ୍ରୀ ଓ ପ୍ରସୂତି ବିଭାଗର ଡାକ୍ତର ସୁକାନ୍ତ ଜେନା । ସୁକାନ୍ତ ଜଣେ ଗର୍ଭବତୀଙ୍କଠୁ ଅସ୍ତ୍ରୋପଚାର ପାଇଁ ୮ ହଜାର ଟଙ୍କା ଲା ନେଉଥିବା ବେଳେ ଭିଜିଲାନ୍ସ ହାବୁଡରେ ପଡିଥିଲେ । ଏହା ପରେ ତାଙ୍କ ଭୁବନେଶ୍ୱର କଳାରାହାଙ୍ଗ ସ୍ଥିତ କସମୋ ଡୁପ୍ଲେକ୍ସରେ ଛାପା ପଡିଥିଲା । ସେଠୁ ଭିଜିଲାନ୍ସକୁ ପୁଳା ପୁଳା ଟଙ୍କା ମିଳିଥିଲା । ସାରା ରାତି ଡାକ୍ତରଙ୍କ ଘରେ ଚାଲିଥିଲା ଟଙ୍କା ଗଣା । ଲାଞ୍ଚ ନେବା ବେଳେ ଧରାପଡିବା ପରେ ତାଙ୍କର ଗୁମର ଏବେ ଫିଟିଛି ।
ଏଇ ନିକଟରେ ଭିଜିଲାନ୍ସ ଯେତେ ଚଢାଉ କରିଛି ସବୁଠୁ ଅଧିକ ନଗଦ ଟଙ୍କା ଜବତ ହୋଇଛି ଡାକ୍ତରଙ୍କ ଘରୁ । ଡାକ୍ତର ସୁକାନ୍ତ ଜେନାଙ୍କର ଇନଫୋସିଟି ଥାନା କଳାରାହାଙ୍ଗରେ ୩ ମହଲା କୋଠା ରହିଛି । ପୁରୀରେ ଗୋଟିଏ ଷ୍ଟୁଡିଓ ଆପାର୍ଟମେଂଟ, ଜଟଣୀରେ କୋଠା, ୪୪ଲକ୍ଷ ୬ ହଜାର ଟଙ୍କାର ଗୋଟିଏ ଇନ୍ସୁରାନ୍ସ ପଲିସି,୩୮ ଲକ୍ଷ ୬୩ ହଜାର ଟଙ୍କାର ଫିକ୍ସ ଡିପୋଜିଟ,୨ଟି ଚାରି ଚକିଆ ଯାନ ଜବତ କରିଛି ଭିଜିଲାନ୍ସ ।
ତେବେ ସରକାରୀ ଡାକ୍ତର ବାବୁ ଜଣକ କୋଟି କୋଟି ଟଙ୍କା କେଉଁଠୁ ଆଣିଲେ ତାକୁ ନେଇ ଏବେ ପ୍ରଶ୍ନ ଉଠିଛି । ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଡାକ୍ତର ହୋଇ ଏତେ ଟଙ୍କା ଜମା କରିବାକୁ ଦୀର୍ଘ ବର୍ଷ ଲାଗିଯିବ । ତେବେ ଭିଜିଲାନ୍ସ ଆଗକୁ ଖୋଳତାଡ ହେଲେ ଏହା ଉପରୁ ପରଦା ଉଠିପାରେ ।