ଶେଷରେ ମନ୍ତ୍ରୀଙ୍କ ହାତରେ ପଡିଛି ହାତକଡ଼ି । ମୋଷ୍ଟ ୱାେଣ୍ଟେଡ ଆତଙ୍କବାଦୀ ଦାଉଦ ଇବ୍ରାହିମ ଓ ଅଣ୍ଡରୱାଲ୍ଡଙ୍କ ସହ ଲିଙ୍କ ଅଭିଯୋଗରେ ପ୍ରବର୍ତ୍ତନ ନିର୍ଦ୍ଦେଶାଳୟ ଆଜି ମହାରାଷ୍ଟ୍ରର ମନ୍ତ୍ରୀ ତଥା ଏନସିପି ନେତା ନବାବ ମଲ୍ଲିକଙ୍କୁ ଗିରଫ କରିଛି । ଗିରଫ ପୂର୍ବରୁ ଇଡିର ଏକ ଟିମ୍ ନବାବଙ୍କୁ ଦୀର୍ଘ ସମୟ ଧରି ପଚରାଉଚରା କରିଥିଲା । ଗିରଫ ପରେ ନବାବ ମଲ୍ଲିକଙ୍କ ଜେଜେ ହସ୍ପିଟାଲରେ ମେଡିକାଲ ଯାଞ୍ଚ କରାଯାଇଥିଲା । ଏହା ପରେ ପିଏମଏଲଏ କୋର୍ଟରେ ହାଜର କରାଯାଇଥିଲା ।
ଅଣ୍ଡରୱାଲ୍ଡଙ୍କ ସହ ଜମି କିଣାବିକା ମାମଲାରେ ନବାବଙ୍କ ସମ୍ପୃକ୍ତି ଥିବା ପ୍ରମାଣ ପାଇବା ପରେ ଇଡି ଆଜି ନବାବ ମଲ୍ଲିକଙ୍କୁ ଗିରଫ କରିଛି । ଏହି ଜମି କିଣାବିକାରେ ଅର୍ଥ କାରବାର ମଧ୍ୟ ହୋଇଥିଲା । ଆଜି ସକାଳୁ ଇଡି ନବାବଙ୍କ ଘରକୁ ଯାଇ ସେଠାରେ ପାଖାପାଖି ଘଣ୍ଟାଏ ଧରି ପଚରାଉଚରା କରିଥିଲା । ଏହା ପରେ ଅଫିସକୁ ଆଣି ଜେରା କରାଯାଇଥିଲା । ନବାନଙ୍କୁ ଜେରା ବେଳେ ଇଡି କାର୍ଯ୍ୟାଳୟ ନିକଟସ୍ଥ ଏନସିପି ଅଫିସ ନିକଟରେ ଦଳୀୟ ସମର୍ଥକମାନେ ଏକାଠି ହୋଇ ନବାବଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ବିରୋଧ କରିଥିଲେ । କେନ୍ଦ୍ରର ବିଜେପି ସରକାରଙ୍କ ବିରୋଧରେ ସ୍ଲୋଗାନ ଦେଇଥିଲେ । ତାଙ୍କୁ ଜାଣିଶୁଣି କେନ୍ଦ୍ର ଟାର୍ଗେଟ କରି ଏଭଳି ଫସାଇଥିବା ଅଭିଯୋଗ କରିଥିଲେ ।
ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସ ଗତବର୍ଷ ନଭେମ୍ବରରେ ନବାବ ମଲ୍ଲିକ ଅଣ୍ଡରୱାଲ୍ଡ ଡନ ଦ୍ରାଉଦ ଇବ୍ରାହିମଙ୍କଠୁ ଘର କିଣିଥିବା ନେଇ ଅଭିଯୋଗ କରିଥିଲେ । ଏପରିକି ଏହି ପ୍ଲଟଟି ମୁମ୍ବାଇ ବିସ୍ଫୋରଣରେ ସାମିଲ ହୋଇଥିବା ଅଭିଯୁକ୍ତର ବୋଲି ସେ ଦାବି କରିଥିଲେ । ଏହା ପରେ ଇଡି ମୁମ୍ବାଇରେ ଅଣ୍ଡରୱାଲ୍ଡଙ୍କ ସହ ଜଡିତ ଲୋକଙ୍କ ଠିକଣା ଉପରେ ଚଢାଉ କରିଥିଲା । ପାଖାପାଖି ୧୦ଟି ସ୍ଥାନରେ ଏକାକାଳୀନ ରେଡ ହୋଇଥିଲା । ନିକଟରେ ମୁମ୍ବାଇ ଡ୍ରଗ୍ସ ଜବତ ମାମଲାରେ ଏନସିବିର ପୂର୍ବତନ ମୁମ୍ବାଇ ଜୋନାଲ ମୁଖ୍ୟ ସମୀର ୱାଙ୍ଖଡେଙ୍କ ବିରୋଧରେ ବହୁ ସଙ୍ଗୀନ ଅଭିଯୋଗ ଆଣି ଚର୍ଚ୍ଚାକୁ ଆସିଥିଲେ ନବାବ ମଲ୍ଲିକ ।