ନକଲି ଡାକ୍ତର ରମେଶ ସ୍ୱାଇଁଙ୍କ ଭଉଣୀକୁ ବାନ୍ଧିଛି ପୁଲିସ । ଠକ ଡାକ୍ତର ରମେଶ ସ୍ୱାଇଁଙ୍କ ପତ୍ନୀ ତାଲିକା ଲମ୍ବି ଚାଲିଥିବା ବେଳେ ଏଥିରେ ତାଙ୍କୁ ସହଯୋଗ କରୁଥିବା ଭଉଣୀକୁ କମିସନରେଟ ପୁଲିସ ଗିରଫ କରିଛି । ଭିଣୋଇ କୁଆଡେ ଫେରାର ହୋଇଯାଇଛନ୍ତି । ଭାଇ-ଭଉଣୀ ଉଭୟଙ୍କୁ ମୁହାଁମୁହିଁ ଜେରା କରିବା ପରେ ରଶ୍ମିତାଙ୍କୁ ପୁଲିସ ଗିରଫ କରିଥିବା ଜଣାପଡିଛି ।ରମେଶ ସ୍ୱାଇଁଙ୍କ ଏକାଧିକ ବିବାହରେ ଭଉଣୀ ଉପସ୍ଥିତ ରହୁଥିଲୋ । ଏବଂ ମିଳୁଥିବା ଯୌତୁକକୁ ଭାଗ ବାଣ୍ଟି ନେଉଥିଲେ । ତେବେ ଠୋସ ପ୍ରମାଣ ମିଳିବା ପରେ ରମେଶଙ୍କ ଭଉଣୀକୁ ଗିରଫ କରାଯାଇଥିବା ଭୁବନେଶ୍ୱର ଡିସିପି ଉମାଶଙ୍କର ଦାସ କହିଛନ୍ତି ।
ରମେଶ ସ୍ୱାଇଁଙ୍କ ପତ୍ନୀଙ୍କ ନାଁରେ ଖୁଣ୍ଟୁଣୀରେ ମଧ୍ୟ ଏକ ଫାର୍ମାହାଉସ ରହିଛି । ସେଠାରେ ମଧ୍ୟ ପୁଲିସ ରେଡ କରିଛି । ରମେଶ ସ୍ୱାଇଁ ଆନ୍ଧ୍ର ବ୍ୟବସାୟୀଙ୍କଠୁ ଚାରା ଆଣି ଏହି ଫାର୍ମ ହାଉସରେ ଲଗାଉଥିଲେ । ଏହି ଫାର୍ମହାଉସକୁ ରମେଶ ଅନେକ ମହିଳାଙ୍କ ସହ ଯାଉଥିବା ଜଣାପଡିଛି । ସେହିପରି ରମେଶଙ୍କ ଢେଙ୍କାନାଳ କାମାକ୍ଷାନଗରରେ ମଧ୍ୟ ଏକ ଘର ରହିଛି । ଏହି ଘର ଭିତରେ ରହିଛି ଅନ୍ଧାରୀ ଗୁପ୍ତ ଭୂତଳ ଘର । ଏହି ଗୁପ୍ତ କୋଠରୀରେ ହିଁ ସେ ନିଜର କ୍ଲିନିକ ଖୋଲିଥିଲେ ।
ସେହିପରି କେନ୍ଦ୍ରାପଡାରେ ରମେଶଙ୍କ ପୈତୃକ ଘରେ ମଧ୍ୟ ପୁଲିସ ପହଞ୍ଚି ପଚରାଉଚରା କରିଛି । ପାଟକୁରାରେ ଥିବା ମଧ୍ୟ ଏକ ଫାର୍ମହାଉସରେ ପୁଲିସ ରେଡ କରିଛି । ରମେଶଙ୍କ ନାଁରେ ଅଭିଯୋଗରେ ତାଲିକା ଲମ୍ବିଚାଲିଥିବା ବେଳେ ଏବଂ ନୂଆ ନୂଆ ଗୁମର ଫିଟୁଥିବାରୁ ଆଉ ଅଧିକ ଦିନ ତାଙ୍କୁ ରିମାଣ୍ଡରେ ନେବାକୁ ଆବେଦନ କରାଯିବ ବୋଲି ପୁଲିସ କହିଛି ।