ଋଷ ଓ ୟୁକ୍ରେନ ମଧ୍ୟରେ ଯୁଦ୍ଧ ସ୍ଥିତି ଓ ୟୁକ୍ରେନର ଦୁଇ ଅଞ୍ଚଳକୁ ଋଷ ସ୍ୱତନ୍ତ୍ର ଦେଶର ମାନ୍ୟତା ଦେବାର ଘୋଷଣା ପରେ ଆମେରିକା ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଆମେରିକା ରାଷ୍ଟ୍ରପତି ଜୋ ବାଇଡେନ ଦେଶକୁ ସମ୍ବୋଧନରେ କହିଛନ୍ତି, ନୂଆ ତଥାକଥିତ ଦେଶ ଘୋଷଣା କରିବାର ଅଧିକାର କିଏ ଦେଇଥାଏ? ସେ କହିଛନ୍ତି ୟୁକ୍ରେନ ଉପରେ ଏହା ହେଉଛି ଋଷ ଆକ୍ରମଣର ଆରମ୍ଭ । ସେ କହିଛନ୍ତି, ମୁଁ ଭାବୁଛି , ଭ୍ଲାଦିମିର ପୁଟିନ ବଳ ଦ୍ୱାରା ଅଧିକ ଅଞ୍ଚଳ ନେବାକୁ ଯୁକ୍ତି ସ୍ଥାପନ କରୁଛନ୍ତି । ୟକ୍ରେନର ଦୁଇ ଅଞ୍ଚଳକୁ ପୁଟିନ ସ୍ୱାଧୀନ ଘୋଷଣା କରିବା ଆନ୍ତର୍ଜାତୀୟ ଆଇନର ଉଂଲଘନ । ଆମେ ଋଷକୁ ଶଦ୍ଦ ଦ୍ୱାରା ନୁହେଁ ବଂର କାର୍ଯ୍ୟକଳାପ ଦ୍ୱାରା ବିଚାର କରିବୁ ।
ବାଇଡେନ କହିଛନ୍ତି, ପୁଟିନ ଜାଣିଶୁଣି ୟୁକ୍ରେନ ଉପରେ ହମଲା କରୁଛନ୍ତି । ଏଥିପାଇଁ ସେ ଋଷ ଉପରେ ବଡ଼ ଧରଣର ଆର୍ଥିକ କଟକଣା ଲାଗୁ କରିଛନ୍ତି । ପୁଟିନ ୟୁକ୍ରେନର ଦୁଇ ଅଞ୍ଚଳକୁ ସେନା ପଠାଇ ଏହାକୁ ଅକ୍ତିଆର କରିନେଇଛନ୍ତି । ଏହା ଆଦୌ ଗ୍ରହଣୀୟ ନୁହେଁ । ଏଥିପାଇଁ ଋଷ ଉପରେ ଆର୍ଥିକ କଟକଣା ଲାଗୁ କରାଯାଉଛି । ପଶ୍ଚିମ ଦେଶଗୁଡିକ ପକ୍ଷରୁ ଋଷକୁ ମିଳୁଥିବା ଆର୍ଥିକ ସହାୟତା ବନ୍ଦ କରିଦିଆଯିବ । ଆମେରିକା ସମେତ ପଶ୍ଚିମ ଦେଶ ଗୁଡିକ ଋଷ ସହ କୌଣସି ବ୍ୟବସାୟ କରିବ ନାହିଁ ।ଋଷର ବ୍ୟାଙ୍କ ଓ ସେଠାକାର ଧନୀ ଲୋକଙ୍କ ଉପରେ ମଧ୍ୟ କଟକଣା ଲାଗୁ କରାଯିବ । ଆଗକୁ ଯଦି ଋଷ ଉତ୍ତେଜନା ହ୍ରାସ ନକରିବ, ଆଗକୁ ଆହୁରି କଠୋର ପଦକ୍ଷେପ ଗ୍ରହଣ କରାଯିବ ବୋଲି ବାଇଡେନ ଚେତାବନୀ ଦେଇଛନ୍ତି । ବାଇଡେନ କହିଛନ୍ତି , ଋଷର ଦୁଇଟି ବଡ଼ ବଡ଼ ଆର୍ଥିକ ପ୍ରତିଷ୍ଠାନ, ଆର୍ଥିକ ସହାୟତା କମ୍ପାନୀ ଭିଇବି ଓ ଏହାର ସାମରିକ ବ୍ୟାଙ୍କ ଉପରେ ସମ୍ପୂର୍ଣ୍ଣ ନିଷେଧାଦେଶ ଲାଗୁ କରିଛୁ । ସେହିପରି ଜର୍ମାନୀ ମଧ୍ୟ ଋଷ ସହ ମିଶି କରୁଥିବା ତୈଳ ପାଇପ ଲାଇନ କାମ ନୋର୍ଡ ଷ୍ଟ୍ରିମ-୨ ପ୍ରକଳ୍ପ ଉପରେ ରୋକ ଲଗାଇଛନ୍ତି । ଏହିପାଇପ ଲାଇନ ଦ୍ୱାରା ୟୂରୋପୀୟ ଦେଶ ଗୁଡିକୁ ଋଷ ତୈଳ ଓ ଗ୍ୟାସ ଯୋଗାଣ କାରିଥାନ୍ତି ।