ଋଷ-ୟୁକ୍ରେନ ମଧ୍ୟରେ ମହାଯୁଦ୍ଧ ଆଜି ସପ୍ତମ ଦିନରେ ପହଞ୍ଚିଛି । ଖେରସନକୁ ଋଷ ସେନା ଦଖଲ କରିଥିବା ବେଳେ କିଭ୍କୁ କବଜା କରିବା ପାଇଁ ଋଷ ସେନା ଅଗ୍ରସର ହେଉଛନ୍ତି । ଖାରକିଭରେ ମଧ୍ୟ ଘନଘନ ବିସ୍ଫୋରଣ କରୁଛିୁ ଋଷ ସେନା। ଖାରକିଭରେ ସେନା ହସ୍ପିଟାଲ ଓ ସେନା ଏକାଡେମୀ ଉପରେ ଆକ୍ରମଣ କରି ଧଳିସାତ କରିଦେଇଛନ୍ତି ଋଷ ସେନା । ଏସବୁ ଭିତରେ ଋଷ ପୁଣି ଥରେ ଧମକ ଦେଇଛି । ୟୁକ୍ରେନକୁ କୌଣସି ବି ପରିସ୍ଥିତିରେ ପରମାଣୁ ଅସ୍ତ୍ର ଅକ୍ତିଆର କରିବାକୁ ଅନୁମତି ଦେବୁ ନାହିଁ ବୋଲି ଋଷ ଚେତାବନୀ ଦେଇଛି ।
ଋଷ କହିଛନ୍ତି, ଆମେରିକା କଥାରେ ୟୁକ୍ରେନ ପରିଚାଳିତ ନହେଉ । ଆମେ ଦ୍ୱିତୀୟ ପର୍ଯ୍ୟାୟ ଆଲୋଚନା ପାଇଁ ପ୍ରସ୍ତୁତ ଅଛୁ । କିନ୍ତୁ ୟୁକ୍ରେନ ଆଲୋଚନାରେ ଆମେରିକା କଣ୍ଢେଇ ସାଜି ନନାଚୁ ଏବଂ ତୃତୀୟ ବିଶ୍ୱଯୁଦ୍ଧ ହେଲେ ପରମାଣୁ ଆକ୍ରମଣ କରିବ ବୋଲି ଧମକ ଦେଇଛନ୍ତି ଋଷର ବୈଦେଶିକ ମନ୍ତ୍ରୀ ସେରେଜ ଲାଭରୋଭ । ସେପଟେ ୟୁକ୍ରେନ ରାଷ୍ଟ୍ରପତି କହିଛନ୍ତି, ଋଷ ସୈନିକ ଆମର ଇତିହାସକୁ ମାଟିରେ ମିଶାଇବାକୁ ପ୍ରୟାସ କରୁଛନ୍ତି । ବିଭି୍ନ୍ନ ଧାର୍ମିକ ସ୍ଥଳ ଉପରେ ଋଷ ଆକ୍ରମଣ କରୁଛି । କିନ୍ତୁ ଆମର ଇତିହାସ ବାବଦରେ ଋଷ ବୋଧହୁଏ କିଛି ଜାଣିନାହିଁ ବୋଲି ସେ କହିଛନ୍ତି। ଖାରକିଭରେ ଋଷ ଲଗାତର ଆକ୍ରମଣ କରିଚାଲିଥିବା ବେଳେ ଏବେ ଯାଏଁ ୨୧ ଜଣଙ୍କ ମୃତ୍ୟୁ ହୋଇଛି । ୧୧୨ ଜଣ ଆହତ ହୋଇଥିବା ଜଣାପଡିଛି । ୟୁକ୍ରେନ ମଧ୍ୟ ଋଷର ଏକାଧିକ ଯୁଦ୍ଧାସ୍ତ୍ର ନଷ୍ଟ କରିଦେଇଥିବା ଦାବି କରିଛି । ୬ ଦିନରେ ୬ ହଜାର ଋଷୀୟ ନିହତ ହୋଇଥିବା ରାଷ୍ଟ୍ରପତି ଜେଲେନସ୍କି ଦାବି କରିଛନ୍ତି । ସେପଟେ ଋଷ ଓ ୟୁକ୍ରେନ ମଧ୍ୟରେ ଦ୍ୱିତୀୟ ପର୍ଯ୍ୟାୟ ଆଲୋଚନା ଥିବା ବେଳେ କିଛି ସମାଧାନର ରାସ୍ତା ବାହାରିବ ବୋଲି ଆଶା କରାଯାଉଛି ।