ପୁଣି ବାତ୍ୟା ଭୟ । ଖରାର ଦାଉ ଭିତରେ ପୁଣି ଦେଖାଦେଇଛି ବାତ୍ୟା ଆଶଙ୍କା । ଦକ୍ଷିଣ ପୂର୍ବ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାକୁ ଯାଉଛି । ଏହି ଲଘୁଚାପ ଘନୀଭୂତ ହୋଇ ଏଇ ମାସରେ ବାତ୍ୟାର ରୂପ ନେଇପାରେ ବୋଲି ଆଶଙ୍କା ସୃଷ୍ଟି ହୋଇଛି । ଆସନ୍ତା ୨୦ ତାରିଖ ବେଳକୁ ଦକ୍ଷିଣ ପୂର୍ବ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବ । ଏବଂ ୨୨ ତାରିଖ ବେଳକୁ ଏହା କ୍ରମଶଃ ଘନୀଭୂତ ହୋଇ ଉ ର ବଙ୍ଗୋପସାଗରରେ ପହଞ୍ଚିବ । ଏବଂ ଏହା ବାତ୍ୟାର ରୂପ ନେଇପାରେ ବୋଲି ଆଶଙ୍କା କରାଯାଉଛି । ବିଭିନ୍ନ ପାଣିପାଗ ମଡେଲ ଏହି ସମ୍ଭାବ୍ୟ ଚିତ୍ର ଦେଖାଇଛନ୍ତି । ତେବେ ଏହାର ତୀବ୍ରତା,ଗତିପଥ ଏବଂ ଏହା କେତେ ଘନୀଭୂତ ହେବ ସେ ନେଇ କୌଣସି ସ୍ପଷ୍ଟ ସୂଚନା ନାହିଁ । ତେବେ ଲଘୁଚାପଟି ବାରମ୍ବାର ଦିଗ ପରିବର୍ତ୍ତନ କରିବାର ସମ୍ଭାବନା ଥିବାରୁ ଏହା ଭାରତ କିମ୍ବା ଓଡିଶାରେ ସ୍ପର୍ଶ କରିବ କି ନାହିଁ ଏହା ଆକଳନ କରିବା କଷ୍ଟକର ।
ଲଘୁଚାପ ସୃଷ୍ଟି ହେବା ପରେ ସେତେବେଳର ଜଳବାୟୁ ସ୍ଥିତି ଅନୁଯାୟୀ ସମ୍ଭାବ୍ୟ ଗତିପଥ ଓ ତୀବ୍ରତା ଜଣାପଡିବ । ଏହା ଭାରତ କି ଓଡିଶା ସ୍ପର୍ଶ କରିବା ଆକଳନ କରିବା କଷ୍ଟକର ଥିବା ବେଳେ ଏହା ପ୍ରଭାବରେ ଉପକୂଳ ଓଡିଶାରେ ପାଗ ବଦଳିବା ସମ୍ଭାବନା ରହିଛି । ତେବେ ଯଦିଓ ଲଘୁଚାପଟି ବାତ୍ୟାର ରୂପ ନିଏ ଓ ଭାରତ ଉପକୂଳ ସ୍ପର୍ଶ କରିବ ତେବେ ଏହା ଗତ ୧୨୧ ବର୍ଷରେ ମାର୍ଚ୍ଚ ମାସର ସପ୍ତମ ବାତ୍ୟା ହେବ । କାରଣ ୧୯୦୧ ମସିହାଠୁ ଚଳିତବର୍ଷ ପର୍ଯ୍ୟନ୍ତ ମାର୍ଚ୍ଚରେ ମାତ୍ର ୬ଟି ବାତ୍ୟା ସୃଷ୍ଟି ହୋଇଛି ବୋଲି ବିଶିଷ୍ଟ ପାଣିପାଗ ବିଶେଷଜ୍ଞ ସୁରେନ୍ଦ୍ର ନାଥ ପଶୁପାଳକ କହିଛନ୍ତି ।