ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଘର ଉପରକୁ ଆକ୍ରମଣ । ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ ଟୁଇଟ କରି ଲେଖିଛନ୍ତି, ବିଜେପିର ଗୁଣ୍ଡା, ଅରବିନ୍ଦ କେଜ୍ରିୱାଲଙ୍କ ଘରେ ଭଙ୍ଗାରୁଜା କରିଛନ୍ତି । କେବଳ ସେତିକି ନୁହେଁ ବିଜେପିର ପୁଲିସ ସେମାନଙ୍କୁ ରୋକିବା ବଦଳରେ ତାଙ୍କୁ ଦ୍ୱାର ପର୍ଯ୍ୟନ୍ତ ଆଣିଥିଲା ବୋଲି ସେ ଅଭିଯୋଗ କରିଛନ୍ତି । କେଜ୍ରିୱାଲଙ୍କ ଘର ଉପରକୁ ଆକ୍ରମଣ କରାଯିବା ସହିତ ସିସିଟିଭି କ୍ୟାମେରା ଓ ସିକ୍ୟୁରିଟି ବ୍ୟାରିୟର ମଧ୍ୟ ଭାଙ୍ଗିଦେଇଛନ୍ତି । ତେବେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଏହି ଘର ଉପରକୁ ଆକ୍ରମଣ ହେବା ପଛରେ ବିଜେପି ଯୁବ ମୋର୍ଚ୍ଚାର ସିଧାସଳଖ ହାତ ଥିବା କୁହାଯାଉଛି ।
କାଶ୍ମୀର ହିନ୍ଦୁଙ୍କୁ ନେଇ କେଜ୍ରିୱାଲ ଦେଇଥିବା ବୟାନକୁ ବିଜେପି ଯୁବମୋର୍ଚ୍ଚା ବିରୋଧ କରୁଛି । ତେଣୁ ବିଜେପି ଯୁବମୋର୍ଚ୍ଚାର କିଛି କର୍ମୀ ଏଭଳି କରିଥିବା କୁହାଯାଉଛି । ଦିଲ୍ଲୀ ନର୍ଥ ଡିସିପି କହିଛନ୍ତି, ବିଜେପି ଯୁବମୋର୍ଚ୍ଚାର ବିରୋଧ ପ୍ରଦର୍ଶନ ଚାଲିଥିଲା । ଯେଉଁଥିରେ କିଛି ପ୍ରଦର୍ଶନକାରୀ ଏଭଳି କରିଛନ୍ତି । ଘଟଣାରେ ପୁଲିସ ୫୦ ଜଣଙ୍କୁ ହେପାଜତକୁ ନେଇଥିବା ସୂଚନା ମିଳିଛି ।