ଇତିହାସର ସବୁଠୁ ବଡ଼ ଆର୍ଥିକ ସଙ୍କଟ ଦେଇ ଗତି କରୁଛି ଶ୍ରୀଲଙ୍କା । ଆର୍ଥିକ ସଙ୍କଟ ଯୋଗୁ ଦେଶରେ ଜରୁରୀ ପରିସ୍ଥିତି ସୃଷ୍ଟି ହୋଇଛି । ଖାଇବା ମିଳୁନି, ପିଇବାକୁ ପାଣି ନାହିଁ । ଲୋକମାନେ ଦୟନୀୟ ପରିସ୍ଥିତିରେ ଥିବାବେଳେ ସହାୟତାର ହାତ ବଢାଇଛି ଭାରତ । ଭାରତ ଶ୍ରୀଲଙ୍କାକୁ ୪୦ ହଜାର ଟନ୍ ଡିଜେଲ ପଠାଇଛି । ଭାରତର ଏହା ହେଉଛି ଚତୃର୍ଥ ସହାୟତା ।
ରାଷ୍ଟ୍ରାୟାତ୍ତ ଇନ୍ଧନ ୟୁନିଟ୍ ସିଲନ୍ ବିଦ୍ୟୁତ ବୋର୍ଡର ଅଧିକାରୀମାନେ କହିଛନ୍ତି ଯେ, ଶ୍ରୀଲଙ୍କାରେ ଚାଲିଥିବା ବିଜୁଳି କାଟରେ ଭାରତର ଡିଜେଲ ଯୋଗାଣକୁ କିଛି ମାତ୍ରାରେ ଆଶ୍ୱସ୍ତି ଆଣିବ । ଶ୍ରୀଲଙ୍କାରେ ୧୩ ଘଣ୍ଟା ବିଜୁଳି କାଟ କରାଯାଇଛି । କୁହାଯାଉଛି ୧୯୯୬ରେ ବିଦ୍ୟୁତ ବିଭାଗ କର୍ମଚାରୀଙ୍କ ଧର୍ମଘଟ ଯୋଗୁଁ ହୋଇଥିବା ବିଜୁଳି କାଟ ପରେ ଏହା ହେଉଛି ସବୁଠି ଅଧିକ ସମୟରେ ହୋଇଥିବା ବିଦ୍ୟୁତ କାଟ୍ ଭାରତ ଶ୍ରୀଲଙ୍କାକୁ ୪ ହଜାର ଟନ ଡିଜେଲ ପଠାଇଥିବା ବେଳେ ୪୦ ହଜାର ମେଟ୍ରିକ ଚାଉଳ ଓ ଔଷଧ ମଧ୍ୟ ପଠାଇଛି ।
ଶ୍ରୀଲଙ୍କାରେ ପରିସ୍ଥିତିକୁ ନିୟନ୍ତ୍ରଣରେ ରଖିବା ପାଇଁ ୩୬ ଘଣ୍ଟିଆ କର୍ଫ୍ୟୁ ଲଗାଯାଇଛି । ଦେଶରେ ଏବେ ଲୋକ ଭୋକ ଉପାସରେ ଆଉଟପାଉଟ ହେଉଛନ୍ତି । ଦରଦାମ ଆକାଶଛୁଆଁ ହୋଇଛି । ଲୋକମାନେ ରାସ୍ତା ଉପରକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରୁଛନ୍ତି । ଚାଉଳ କିଲୋ ୫୦୦ ଟଙ୍କା ହୋଇଥିବା ବେଳେ ଚିନି କିଲୋ ୨୯୦ ଟଙ୍କା ହୋଇଛି । ଏପରିକି ଚା କପ୍ ପାଇଁ ୧୦୦ ଟଙ୍କା ଦେବାକୁ ପଡୁଛି । ବିଦେଶୀ ଋଣ ବୋଝ ଏତେ ମାତ୍ରାରେ ବଢିଯାଇଛି ଯେ, ଋଣ ସୁଝିବାକୁ ଶ୍ରୀଲଙ୍କା ସରକାର ପାଖରେ ଅର୍ଥ ନାହିଁ ।