କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲାରେ ପୁଣି ରିମାଣ୍ଡରେ ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଓ ଝୁନା ଭୋଇ । ଉଭୟଙ୍କୁ ଆଜିଠୁ ପୁଣି ୩ ଦିନିଆ ରିମାଣ୍ଡରେ ନେଇ ଗୁଡାଇତୁଡାଇ ପ୍ରଶ୍ନ କରିବ କ୍ରାଇମବ୍ରାଞ୍ଚ । ଶର୍ମିଷ୍ଠା ଓ ଝୁନାଙ୍କୁ ଜେରା କରିବା ବେଳେ ଆଉ ଅନେକ ରହସ୍ୟ ଉପରୁ ପରଦା ଉଠିପାରେ । ନିରଞ୍ଜନଙ୍କ ଡାଏରୀକୁ ନେଇ ମୁଖ୍ୟତଃ ଫୋକସ ରହିବ । ଏଯାଏଁ ମିଳିନଥିବା ମେମୋରୀ ଚିପ୍କୁ ନେଇ ମଧ୍ୟ ପଚରାଉଚରା ହେବ । ସମ୍ପୂର୍ଣ୍ଣ ୱେବ ଚ୍ୟାନେଲ କମ୍ପୁଟରରୁ ମିଳିଥିବା ତଥ୍ୟର ମଧ୍ୟ ଯାଞ୍ଚ ହେବା ନେଇ କ୍ରାଇମବ୍ରାଞ୍ଚ ସୂତ୍ରରୁ ସୂଚନା ମିଳିଛି ।
୪ ଅଭିଯୁକ୍ତଙ୍କୁ ୫ ଦିନିଆ ରିମାଣ୍ଡରେ ଆଣି କ୍ରାଇମବ୍ରାଞ୍ଚ ଅନେକ ତଥ୍ୟ ପଦାକୁ ଆଣିଥିଲା ବେଳେ ଏବେ ବି ଅନେକ ରହସ୍ୟ ଭିତରେ ରହିଯାଇଛି । ମାନସଙ୍କୁ କେମିତି ଅପହରଣ କରିଥିଲେ, କେଉଁଠି ହତ୍ୟା କରିଥିଲେ, କେଉଁଠି ମୃତଦେହକୁ ପୋତିଥିଲେ । ଅଭିଯୁକ୍ତଙ୍କୁ ନେଇ ଏସବୁର ସିନ୍ ରିକ୍ରିଏସନ କରିଥିଲା କ୍ରାଇମବ୍ରାଞ୍ଚ । ଅଭିଯୁକ୍ତଙ୍କଠୁ ଗୋଟି ଗୋଟି କରି ସବୁ ସତ ଉଗାଳିଥିଲା । କିନ୍ତୁ ଏବେ ମାନସଙ୍କୁ କାହିଁକି ମାରିଲେ ତାହା ସ୍ପଷ୍ଟ ହୋଇନାହିଁ । ଏହା ସହ ମେମୋରି ଚିପ୍ରେ କଣ ଥିଲା ଏବେ ଏଯାଏଁ ଚିପ୍ଟି ମିଳିନଥିବା ବେଳେ ସେ ନେଇ ମଧ୍ୟ ଜେରା କରାଯିବ ।