ନୂଆଦିଲ୍ଲୀ : କେନ୍ଦ୍ର ସରକାର ରାଜ୍ୟସଭାକୁ ୪ ଜଣକୁ ମନୋନୀତ କରିଛନ୍ତି । ସେମାନେ ହେଲେ ଆଥଲେଟ୍ ପି.ଟି.ଉଷା, ସଂଗୀତଜ୍ଞ ଇଲୈୟା ରାଜା, ସମାଜସେବୀ ବୀରେନ୍ଦ୍ର ହେଗଡେ ଓ ଲେଖକ ବିଜୟେନ୍ଦ୍ର ପ୍ରସାଦ । ରାଜ୍ୟସଭାକୁ ମନୋନୀତ ହୋଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟୁଇଟ୍ କରି ସେମାନଙ୍କୁ ଅଭିନନ୍ଦନ ଜଣାଇଛନ୍ତି ।
ପିଏମ୍ ମୋଦି ପିଟି ଉଷାଙ୍କ ସମ୍ପର୍କରେ ସୂଚନା ଦେଇ କହିଛନ୍ତି କି ପିଟି ଉଷା ଖେଳରେ ନିଜ ଉପଲବ୍ଧି ପାଇଁ ବେଶ୍ ଜଣାଶୁଣା । କିନ୍ତୁ ଗତ କିଛି ବର୍ଷରେ ସେ ନୂଆ ଖେଳାଳୀଙ୍କୁ ମାର୍ଗଦର୍ଶନ କରିଛନ୍ତି ଯାହା କି ପ୍ରଶଂସାଯୋଗ୍ୟ । ତାଙ୍କୁ ରାଜ୍ୟସଭାକୁ ମନୋନୀତ କରାଯାଉଛି ଏବଂ ଏଥିପାଇଁ ତାଙ୍କୁ ଶୁଭେଚ୍ଛା ମଧ୍ୟ ଜଣାଇଛନ୍ତି ପିଏମ୍ । ଇଲାୟାରାଜାଙ୍କ ସମ୍ପର୍କରେ କହିଛନ୍ତି କି ସେ ପିଢି ପରେ ପିଢି ଲୋକଙ୍କୁ ମନ୍ତ୍ରମୁଗ୍ଧ କରିଆସିଛନ୍ତି । ସେ ଜଣେ ବିନମ୍ର ବ୍ୟକ୍ତି ଏବଂ ସେ ବହୁତ କିଛି ହାସଲ କରିଛନ୍ତି । ସେ ରାଜ୍ୟସଭାକୁ ମନୋନୀତ ହେବା ଅତି ଖୁସିର କଥା ବୋଲି ପିଏମ୍ କହିଛନ୍ତି ।
ଅନ୍ୟପକ୍ଷରେ ବୀରେନ୍ଦ୍ର ହେଗଡେ ସମାଜସେବା, ସ୍ବାସ୍ଥ୍ୟ, ଶିକ୍ଷା ଓ ସଂସ୍କୃତି କ୍ଷେତ୍ରରେ ଅନେକ କାର୍ଯ୍ୟ କରିଛନ୍ତି । ସେ ସଂସଦୀୟ କାର୍ଯ୍ୟପ୍ରଣାଳୀକୁ ସମୃଦ୍ଧ କରିବେ ବୋଲି ମୋଦୀ ଲେଖିଛନ୍ତି । ସେହିପରି ଭି.ବିଜୟେନ୍ଦ୍ର ପ୍ରସାଦ ବିଗତ କିଛି ଦଶନ୍ଧୀ ଧରି କଳାଜଗତରେ ସକ୍ରିୟ ଅଛନ୍ତି । ତାଙ୍କର ଲେଖା ଭାରତୀୟ ସଂସ୍କୃତିକୁ ଦର୍ଶାଇଥାଏ । ସେ ରାଜ୍ୟସଭାକୁ ମନୋନୀତ ହୋଇଥିବାରୁ ତାଙ୍କୁ ଅଭିନନ୍ଦନ ।