ଇସଲାମବାଦ; ବଦଳିଲେ ପାକିସ୍ତାନ ସେନା ମୁଖ୍ୟ । କମର ଜାବେଦ ବାଜୱାଙ୍କ ସ୍ଥାନ ନେବେ ସୟଦ ଆସିମ ମୁନିର । ନୂତନ ସେନା ମୁଖ୍ୟଙ୍କ ନାମ ଘୋଷଣା କରିଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ଶରିଫ । ଆନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ମୁତାବକ ପାକିସ୍ତାନର ସୂଚନା ମନ୍ତ୍ରୀ ଏକ ଟ୍ୱିଟ କରିଛନ୍ତି । ଏହି ଟ୍ୱିଟରେ ସେ କହିଛନ୍ତି କି ପ୍ରଧାନମନ୍ତ୍ରୀ ଶାହବାଜ ଶରିଫ ଲେଫ୍ଟନାଣ୍ଟ ଜେନେରାଲ ଅସୀମ ମୁନୀରଙ୍କୁ ପାକିସ୍ତାନର ସେନା ମୁଖ୍ୟଭାବେ ଚୟନ କରିଛନ୍ତି ।
ମରିୟମ ଔରଙ୍ଗଜେବଙ୍କ ସୂଚନା ଅନୁସାରେ, ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ ଜେନେରାଲ ସାହିର ଶ୍ୟାମଶାଦ ମିର୍ଜାଙ୍କୁ ଯୁଗ୍ମ ମୁଖ୍ୟ କମିଟିର ଅଧ୍ୟକ୍ଷ ଏବଂ ଲେଫ୍ଟନାଣ୍ଟ ଜେନେରାଲ ସୟଦ୍ ଆସିମ ମୁନିରଙ୍କୁ ସେନା ମୁଖ୍ୟ ଭାବେ ନିଯୁକ୍ତି ଦେବାକୁ ନିଷ୍ପତ୍ତି ନେଇଛନ୍ତି । ତେବେ ପାକିସ୍ତାନର ରାଷ୍ଟ୍ରପତି ଆରିଫ ଅଲ୍ଲି ଏହି ଦୁଇ ନିଯୁକ୍ତି ଉପରେ ଅନ୍ତିମ ମୋହର ଲଗାଇବେ ।
ସୂଚନା ଅନୁଯାୟୀ ଚଳିତମାସ ଶେଷରେ ଜେନେରାଲ କମର ଜାବେଦ ବାଜୱା ସେନାମୁଖ୍ୟ ପଦରୁ ଅବସର ନେଉଛନ୍ତି । ବାଜୱା ୨୦୧୬ ରେ ପାକିସ୍ତାନର ସେନା ମୁଖ୍ୟ ଦାୟିତ୍ୱ ଗ୍ରହଣ କରିଥିଲେ । ତାଙ୍କର ପ୍ରଥମ କାର୍ଯ୍ୟକାଳ ୨୯ ନଭେମ୍ବର ୨୦୧୯ରେ ଶେଷ ହୋଇଥିଲା । ହେଲେ କାର୍ଯ୍ୟକାଳ ଶେଷ ହେବା ପୂର୍ବରୁ ଆଉ ୩ ବର୍ଷ ବଢ଼ାଇ ଦିଆଯାଇଥିଲା । ତେବେ ବାଜୱାଙ୍କ ପରେ କିଏ ହେବ ପାକିସ୍ତାନର ସେନାମୁଖ୍ୟ ତାହାକୁ ନେଇ ଅନେକଦିନ ହେବ କଳ୍ପନା ଜଳ୍ପନା ଲାଗି ରହିଥିଲା । ଏନେଇ ସେନାର ୬ ଜଣ କମାଣ୍ଡରଙ୍କ ନାମକୁ ନେଇ ଚର୍ଚ୍ଚା ହେଉଥିଲା । ହେଲେ ଏବେ ପ୍ରଧାନମନ୍ତ୍ରୀଙ୍କ ନିଷ୍ପତ୍ତି ପରେ ଲେଫ୍ଟନାଣ୍ଟ ଜେନେରାଲ ଅସୀମ ମୁନୀରଙ୍କ ନାମ ରାଷ୍ଟ୍ରପତିଙ୍କ ସ୍ୱୀକୃତି ପାଇଁ ପଠାଯାଇଛି ।