ଭୁବନେଶ୍ବର; ପଶ୍ଚିମବଙ୍ଗ ବୀରଭୂମି ଜିଲ୍ଲାରୁ ଆସିଲା ଆଶ୍ଚର୍ଯ୍ୟଜନକ ଖବର । ସ୍କୁଲ ପିଲାଙ୍କୁ ଦିଆଯାଇଥିବା ମଧ୍ୟାହ୍ନ ଭୋଜନରୁ ମିଳିଲା ସାପ । ଏହି ବିଷାକ୍ତ ଖାଦ୍ୟ ଖାଇ ଅସୁସ୍ଥ ହୋଇପଡ଼ିଛନ୍ତି ୩୦ ଜଣ ଶିକ୍ଷାର୍ଥୀ। ସେମାନଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ, ମୟୂରଶ୍ୱର ବ୍ଲକରେ ଥିବା ଗୋଟିଏ ପ୍ରାଥମିକ ସ୍କୁଲର ୩୦ ଜଣ ପିଲା ମଧ୍ୟାହ୍ନ ଭୋଜନ ଖାଇଥିଲେ । ଏହାପରେ ପିଲାମାନେ ବାନ୍ତି କରିଥିଲେ। ତେଣୁ ସେମାନଙ୍କୁ ତୁରନ୍ତ ରାମପୁରହାଟ ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେପଟେ ପିଲାଙ୍କ ପାଇଁ ମଧ୍ୟାହ୍ନ ଭୋଜନ ପ୍ରସ୍ତୁତ କରୁଥିବା କର୍ମଚାରୀ କହିଛନ୍ତି ଯେ ରୋଷେଇ ପାଇଁ ରହିଥିବା ବାସନରୁ ଗୋଟିଏ ସାପ ମିଳିଥିଲା ।
ତେଣୁ ଅସୁସ୍ଥତା ପଛରେ ସାପ ରହିଥିବା ଆଶଙ୍କା କରାଯାଉଛି । ତେବେ ସମସ୍ତ ଶିକ୍ଷାର୍ଥୀ ସୁସ୍ଥ ଥିବା ଖବର ଆସିଛି । ଅନ୍ୟପକ୍ଷରେ ଖବର ମିଳିବା ପରେ ଗାଁ ଲୋକମାନେ ପ୍ରଧାନ ଶିକ୍ଷକଙ୍କୁ ଘେରାଉ କରିବା ସହ ସ୍କୁଲ ବାହାରେ ଥିବା ବାଇକ ଭଙ୍ଗା ରୁଜୁ କରିଥିଲେ । ପୁଲିସ୍ ସେମାନଙ୍କୁ ବୁଝାସୁଝା କରିବା ପରେ ଘେରାଉ ହଟିଥିଲା।