ଭୁବନେଶ୍ବର୍; ରାଜଧାନୀ ଭୁବନେଶ୍ୱରର ଭିଏସଏସ ନଗରରେ ଗାଡ଼ି ପାର୍କିଂକୁ ନେଇ ଗଣ୍ଡଗୋଳ। ଜଣେ ବିଏସ୍ଏଫ୍ ଯବାନଙ୍କ ଆକ୍ରମଣରେ ଆହତ ହୋଇଛନ୍ତି ଜଣେ ଟ୍ରାଫିକ କନଷ୍ଟେବଲ। ଆହତ କନଷ୍ଟେବଳଙ୍କ ନାଁ ମନୋଜ ବେହେରା। ତାଙ୍କୁ କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି କରାଯାଇଛି। ଅନ୍ୟପକ୍ଷରେ ଅଭିଯୁକ୍ତ ବିଏସ୍ଏଫ୍ ଯବାନ ସଂଗ୍ରାମ ବିଶ୍ୱାଳଙ୍କୁ ସହିଦ ନଗର ଥାନାରେ ଅଟକ ରଖି ପୁଲିସ୍ ପଚରାଉଚରା କରୁଛି। ସଂଗ୍ରାମ ବିଏସ୍ଏଫ୍ରେ ଆସିଷ୍ଟାଣ୍ଟ କମାଣ୍ଡାଣ୍ଟ ଅଛନ୍ତି।
ସୂଚନା ଅନୁଯାୟୀ, ଆଜି ସଂଗ୍ରାମ ବିଶ୍ୱାଳ ମଟନ୍ ନେବା ପାଇଁ ଭିଏସ୍ଏସ୍ ନଗର ହାଟକୁ ଯାଇଥିଲେ। ସେ ତାଙ୍କ ବାଇକ୍କୁ ହାଟର ନୋ ପାର୍କିଂ ଜୋନରେ ରଖିଥିଲେ। ଏହା ଦେଖି ସେଠାରେ ଡ୍ୟୁଟିରେ ଥିବା ଟ୍ରାଫିକ କନଷ୍ଟେବଲ ମନୋଜ ବେହେରା ଅଟକାଇ ଥିଲେ। ବାଇକ୍ ହଟାଇବାକୁ ସେ ସଂଗ୍ରାମଙ୍କୁ କହିଥିଲେ। କିନ୍ତୁ ସଂଗ୍ରାମ ମାନି ନଥିଲେ। ଏହା ପରେ ସେମାନଙ୍କ ମଧ୍ୟରେ କଥା କଟାକଟି ହୋଇଥିଲା। ପରେ କଥା ଠେଲାପେଲା ଓ ଆକ୍ରମଣ ଆଡ଼କୁ ଚାଲି ଯାଇଥିଲା ଏବଂ ଯବାନଙ୍କ ଆକ୍ରମଣରେ ଆହତ ହୋଇଥିଲେ ଟ୍ରାଫିକ କନଷ୍ଟେବଲ।