ଭୁବନେଶ୍ବର: ରାଜ୍ୟରେ ଆଜି ଚତୁର୍ଥ ତଥା ଶେଷ ପର୍ଯ୍ୟାୟ ମତଦାନ ଜାରି ରହିଛି। ଅପରାହ୍ନ ୧ ଟା ସୁଦ୍ଧା ହାରାହାରି ୩୮ ପ୍ରତିଶତ ଭୋଟିଂ ହୋଇଛି। ବାଲେଶ୍ୱରରେ ୪୧.୪%,ଭଦ୍ରକରେ ୩୪.୭୩%,କଟକରେ ୩୯%,ଜଗତସିଂହପୁରରେ ୩୬.୮୫%,ଯାଜପୁରରେ ୩୩.୯୬%,କେନ୍ଦ୍ରାପଡ଼ାରେ ୩୪.୪୫%,ମୟୁରଭଞ୍ଜରେ ୩୯.୬୫% ଓ ପୁରୀରେ ୪୩.୮୫% ମତଦାନ ହୋଇଛି।
ରାଜ୍ୟ ନିର୍ବାଚନ ଅଧିକାରୀ ନିକୁଞ୍ଜ ଧଳ ଗଣମାଧ୍ୟମକୁ କହିଛନ୍ତି ଯେ ଆଜି ମହିଳାମାନେ ବହୁତ ସଂଖ୍ୟାରେ ଆସି ମତଦାନ କରୁଛନ୍ତି। ୨୦୧୯ ତୁଳନାରେ ଏଥର ମତଦାନ ହାର ଅଧିକ ହେବା ନେଇ ଆଶାପ୍ରକଟ କରିଛନ୍ତି ରାଜ୍ୟ ନିର୍ବାଚନ ଅଧିକାରୀ। ଏବେ ୧୦ ହଜାର ୮୮୨ଟି ପୁଲିଂ ବୁଥ୍ରେ ମତଦାନ ହେଉଛି। ତେବେ ବୁଥ୍ ବାହାରେ କିଛି ହିଂସାକାଣ୍ଡ ଖବର ଆସିଛି।
ଅନ୍ୟପକ୍ଷରେ କେନ୍ଦ୍ରାପଡ଼ା ଲୋକସଭା ଅଧୀନସ୍ଥ ସାଲେପୁର ମାଳଶାସନର ୧୮୪ ଓ ୧୮୫ ବୁଥ୍ରେ ନିର୍ବାଚନୀ ହିଂସା ଦେଖିବାକୁ ମିଳିଛି। ବିଜେପି ବିଧାୟକ ପ୍ରାର୍ଥୀଙ୍କ ଏଜେଣ୍ଟ ଓ ୩ ସମର୍ଥକଙ୍କୁ ବିଜେଡି କର୍ମୀମାନେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି।