ଆଇଆଇଟି ଦିଲ୍ଲୀ ସମାବର୍ତ୍ତନରେ ‘ବିକଶିତ ଭାରତ’ ପାଇଁ ପ୍ରଧାନମନ୍ତ୍ରୀ ଦେଲେ ବଡ଼ ବାର୍ତ୍ତା
ନୂଆଦିଲ୍ଲୀ: ଆଇଆଇଟି ଦିଲ୍ଲୀର ସମାବର୍ତ୍ତନ ସମାରୋହରେ ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇବା ବେଳେ ‘ବାଗେଶ୍ୱର ବାବା’ଙ୍କ ଉଦାହରଣ ଦେଇ ହସାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଛାତ୍ରଛାତ୍ରୀଙ୍କ ମନରେ ଭବିଷ୍ୟତ, ଦରମା, ନୂଆ ସହର, ଷ୍ଟାର୍ଟଅପ୍ ଭଳି ବିଭିନ୍ନ ଚିନ୍ତା ଚାଲିଥିବା କହି ମୋଦୀ କହିଥିଲେ, “ମୁଁ ବାଗେଶ୍ୱର ବାବା ନୁହେଁ, କିନ୍ତୁ ଆପଣମାନଙ୍କ ମନରେ କ’ଣ ଚାଲିଛି ନିଶ୍ଚୟ କିଛି ଅଛି।” ସମାବର୍ତ୍ତନ ସମାରୋହରେ ୫୮୭ ଜଣ ପିଏଚ୍ଡି ଗବେଷକଙ୍କ ସମେତ ୩ ହଜାରରୁ ଅଧିକ ଛାତ୍ରଛାତ୍ରୀଙ୍କୁ ଡିଗ୍ରୀ ପ୍ରଦାନ କରାଯାଇଛି। ଛାତ୍ରଛାତ୍ରୀମାନେ କେବଳ ଡିଗ୍ରୀ ନୁହେଁ, ଦେଶ ପାଇଁ କିଛି କରିବାର ସ୍ୱପ୍ନ ନେଇ ଆଗକୁ ବଢ଼ୁଛନ୍ତି ବୋଲି ମୋଦୀ କହିଛନ୍ତି। ଏହି ଅବସରରେ ଉତ୍କୃଷ୍ଟ ପ୍ରଦର୍ଶନ କରିଥିବା ଛାତ୍ରଛାତ୍ରୀଙ୍କୁ ରାଷ୍ଟ୍ରପତି ସ୍ୱର୍ଣ୍ଣପଦକ, ନିର୍ଦ୍ଦେଶକ ସ୍ୱର୍ଣ୍ଣପଦକ, ଶଙ୍କର ଦୟାଲ ଶର୍ମା ସ୍ୱର୍ଣ୍ଣପଦକ ଓ ପର୍ଫେକ୍ଟ ଟେନ୍ ସ୍ୱର୍ଣ୍ଣପଦକ ଭଳି ସମ୍ମାନ ପ୍ରଦାନ କରାଯାଇଥିଲା।
ମୋଦୀ ଛାତ୍ରୀମାନଙ୍କ ସଫଳତାକୁ ନେଇ ମଧ୍ୟ ହାସ୍ୟରସ କରି କହିଥିଲେ, “କିଛି ଝିଅ ମେଧାବୀ ଛାତ୍ରୀ ହୋଇଥିଲେ ଆହୁରି ଭଲ ହୋଇଥାନ୍ତା। କ୍ଷମା କରିବେ, କିଛି ନୁହେଁ, ଅନେକ ଝିଅ ମେଧାବୀ ଛାତ୍ରୀ ହୋଇଛନ୍ତି।” ଏହି ଅବସରରେ ଆଇଆଇଟି ଦିଲ୍ଲୀର ସୋନିପତ କ୍ୟାମ୍ପସରେ ଏଆଇ ଆଧାରିତ ଉଚ୍ଚକ୍ଷମତା ସମ୍ପନ୍ନ ସୁପରକମ୍ପ୍ୟୁଟିଂ ସୁବିଧା ‘ପରମ ପ୍ରଜ୍ଞା’ର ଭର୍ଚୁଆଲ ଉଦ୍ଘାଟନ କରିଥିଲେ ପ୍ରଧାନମନ୍ତ୍ରୀ। ଏହା କୃତ୍ରିମ ବୁଦ୍ଧିମତ୍ତା, ତଥ୍ୟ ବିଜ୍ଞାନ, ଉନ୍ନତ କମ୍ପ୍ୟୁଟିଂ ଓ ବହୁବିଷୟୀ ଗବେଷଣାକୁ ଆହୁରି ସୁଦୃଢ଼ କରିବ।