ପାକିସ୍ତାନରେ ଭୟଙ୍କର ଆତ୍ମଘାତୀ ବିସ୍ଫୋରଣ, ୧୧ ମୃତ; ୩୦ ଆହତ
ପାକିସ୍ତାନ: ଉତ୍ତର-ପଶ୍ଚିମ ପାକିସ୍ତାନର ଖୈବର ପଖ୍ତୁନଖ୍ୱା ପ୍ରଦେଶର ଡେରା ଇସମାଇଲ ଖାନ୍ ଜିଲ୍ଲାରେ ଶନିବାର ଭୟଙ୍କର ଆତ୍ମଘାତୀ ବୋମା ବିସ୍ଫୋରଣ ଘଟିଛି। ରାସ୍ତାକଡ଼ରେ ଥିବା ପୁଲିସ ଚେକ୍ପୋଷ୍ଟକୁ ଲକ୍ଷ୍ୟ କରି ବିସ୍ଫୋରକ ଭର୍ତ୍ତି ଏକ ଗାଡ଼ି ଦ୍ୱାରା ଏହି ଆକ୍ରମଣ କରାଯାଇଥିବା ସୂଚନା ମିଳିଛି। ବିସ୍ଫୋରଣରେ ପ୍ରାୟ ୧୧ ଜଣଙ୍କ ମୃତ୍ୟୁ ହୋଇଥିବାବେଳେ ୩୦ ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁସଂଖ୍ୟା ବଢ଼ିବା ଆଶଙ୍କା ରହିଛି। ଆକ୍ରମଣ ପରେ ଘଟଣାସ୍ଥଳରେ ସୁରକ୍ଷାବଳ ମୁତୟନ କରାଯାଇ ତଦନ୍ତ ଆରମ୍ଭ ହୋଇଛି।
ଏହାପରେ ଅତିରିକ୍ତ ସୈନ୍ୟ ନେଇ ଯାଉଥିବା ଏକ ଗାଡ଼ିକୁ ମଧ୍ୟ ଟାର୍ଗେଟ କରି ଆକ୍ରମଣ ହୋଇଥିବା ସୂଚନା ମିଳିଛି। ସେଠାରେ ମଧ୍ୟ ମୃତାହତ ହୋଇଥିବା ଖବର ରହିଛି। ପୁଲିସ ଚେକ୍ପୋଷ୍ଟ ଉପରେ ହୋଇଥିବା ଆକ୍ରମଣ ପଛରେ ତେହରିକ୍-ଇ-ତାଲିବାନ୍ ପାକିସ୍ତାନ (ଟିଟିପି)ର ହାତ ଥିବା ନେଇ ସୂଚନା ମିଳିଛି। ପାକିସ୍ତାନରେ ଗତ କିଛି ବର୍ଷ ଧରି ଆତଙ୍କୀ ଆକ୍ରମଣ ବୃଦ୍ଧି ପାଇଥିବା ବେଳେ ଟିଟିପି ଏବଂ ବାଲୁଚ୍ ଲିବରେସନ୍ ଆର୍ମି ଭଳି ଗୋଷ୍ଠୀ ବିଭିନ୍ନ ଆକ୍ରମଣ ପାଇଁ ଦାୟୀ ରହିଆସିଛନ୍ତି।