ଆଜିକାଲି ବାହାଘର ନିମନ୍ତ୍ରଣ କାର୍ଡକୁ ନେଇ ଲୋକେ ଅଧିକ ସମ୍ବେଦନଶୀଳ ହୋଇଯାଇଛନ୍ତି। କାର୍ଡର ଡିଜାଇନ,କଲର ଓ ଏହାର ଲେଖା କିଭଳି ଅଧିକ ସୁନ୍ଦର ଓ ଆକର୍ଷଣ କରିହେବ ସେ ନେଇ ସମସ୍ତେ ଚିନ୍ତା କରୁଛନ୍ତି । ହେଲେ ଏବେ ସୋସିଆଲ ମିଡିଆରେ ଏକ ବାହାଘର କାର୍ଡ ଭାଇରାଲ ହୋଇଛି । ଆସାମ ଗୌହାଟିର ଜଣେ ଓକିଲଙ୍କ ବିବାହ କାର୍ଡ ଏବେ ସୋସିଆଲ ମିଡିଆରେ ଘୁରିବୁଲୁଛି । ଯେଉଁଥିରେ ଏହି ଦମ୍ପତ୍ତି ସେମାନଙ୍କର ବିଶେଷ ଦିନ ପାଇଁ ସମ୍ବିଧାନ ଥିମ ବିବାହ କାର୍ଡ ମୂଦ୍ରଣ କରିଛନ୍ତି ।
ଏହି ନିମନ୍ତ୍ରଣ କାର୍ଡ ଅଜୟ ଶର୍ମା ଓ ପୂଜା ଶର୍ମା ଛପାଇଛନ୍ତି । ଆସନ୍ତା ୨୮ ତାରିଖରେ ହେବାକୁ ଥିବା ଏହି ବାହାଘର କାର୍ଡରେ ଲେଖାଯାଇଛି , ‘ଇନ ଦ ବିୟୁଟିଫୁଲ କୋର୍ଟ ଅଫ ଲାଇଫ’ । ବିବାହ ନିମନ୍ତ୍ରଣରେ ଭାରତୀୟ ବିବାହର ନିୟମ ଓ ଅଧିକାର ବିଷୟରେ ଉଲ୍ଲେ୍ଖ କରାଯାଇଛି । ନିମନ୍ତ୍ରଣରେ ଆହୁରି ମଧ୍ୟ ଲେଖାଯାଇଛି ଯେ,ଯେତେବେଳେ ଆଇନଜୀବୀ ମାନେ ବାହା ହୁଅନ୍ତି, ସେମାନେ ହଁ କୁହନ୍ତି ନାହିଁ । ସେମାନେ କୁହନ୍ତି,ଆମେ ସର୍ତ୍ତାବଳୀ ଗ୍ରହଣ କରୁ । କାର୍ଡରେ ଲେଖାଯାଇଛି, ବିବାହର ଅଧିକାର ହେଉଛି ଭାରତୀୟ ସମ୍ବିଧାନର ଧାରା ୨୧ ଅନୁଯାୟୀ ଜୀବନ ଧାରଣ କରିବାର ଏକ ଉପାଦାନ । ତେଣୁ ମୋର ଏହି ମୌଳିକ ଅଧିକାରକୁ ୨୮ ନଭେମ୍ବରରେ ବ୍ୟବହାର କରିବାର ସମୟ ଆସିଛି ।
ତେବେ ସୋସିଆଲ ମିଡିଆରେ ଏହି କାର୍ଡଟି ଏତେ ମାତ୍ରାରେ ଭାଇରାଲ ହୋଇଛି ଯେ, ଲୋକଙ୍କର ବିଭିନ୍ନ କମେଣ୍ଟ ଆସିବାରେ ଲାଗିଛି । କିଛି ଜଣ ଏହି କାର୍ଡ ପଢିବା ପରେ ଥଟ୍ଟାରେ ଲେଖିଛନ୍ତି ଯେ,କ୍ଲାଟ ସିଲାବସର ଅଧା ପୂରଣ କରିଛନ୍ତି ।ସେହିଭଳି ଆଉ ଜଣେ କହିଛନ୍ତି , ବିବାହରେ ପଣ୍ଡିତଙ୍କ ସ୍ଥାନରେ ଜଣେ ବିଚାରପତି ବସନ୍ତୁ ।