ପୁଣି ଏକ ବାତ୍ୟା ଆଶଙ୍କା । ଆସନ୍ତା ୩୦ ତାରିଖ ବେଳକୁ ଦକ୍ଷିଣ ଆଣ୍ଡାମାନ ସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ଏହା ବାତ୍ୟାରେ ପରିଣତ ହୋବାର ମଧ୍ୟ ସମ୍ଭାବନା ରହିଛି । ଏହା ଧୀରେ ଧୀରେ ପଶ୍ଚିମ-ଉତ୍ତର ପଶ୍ଚିମ ଆଡକୁ ଗତି କରିବା ସହିତ ୨ ତାରିଖ ବେଳକୁ ଅଧୀକ ଘନୀଭୂତ ହୋଇ ଗଭୀର ଅବପାତରେ ପରିଣତ ହୋଇପାରେ । ଏହି ଅବପାତ ପ୍ରଭାବରେ ଡିସେମ୍ବର ୩ରୁ ଓଡିଶା ଉପକୂଳରେ ବର୍ଷା ଆରମ୍ଭ ହୋଇପାରେ । ଏପରିକି ଦୁଇ ଦିନ ଧରି ପ୍ରବଳରୁ ଅତି ପ୍ରବଳ ବର୍ଷା ହେବା ନେଇ ପୂର୍ବାନୁମାନ କରିଛି ଆଇଏମଡି । ତେବେ ରାଜ୍ୟରେ କେଉଁ ଜିଲ୍ଲାରେ କେତେ ବର୍ଷା ହେବ ତାହା ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ହିଁ ସ୍ପଷ୍ଟ ହୋଇପାରିବ ।
ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଲଘୁଚାପ କ୍ଷେତ୍ର ସାଇକ୍ଲୋନିକ ଡିଷ୍ଟର୍ବାନ୍ସରେ ପରିଣତ ହେବା ନେଇ ୩୩% ରୁ ୬୭% ସଙ୍କେତ ମିଳିଛି । ଭାରତୀୟ ପାଣିପାଗ ବିଭାଗର ପୂର୍ବାନୁମାନ ପରେ ରାଜ୍ୟର ସମସ୍ତ ଜିଲ୍ଲାପାଳଙ୍କୁ ସତର୍କ କରିଛନ୍ତି ଏସଆରସି । ସମସ୍ତ ସ୍ଥିତିର ମୁକାବିଲା ପାଇଁ ପ୍ରସ୍ତୁତ ରହିବାକୁ ଜିଲ୍ଲାପାଳ ମାନଙ୍କୁ ଚିଠି କରାଯାଇଛି । ଏହି ଚିଠିରେ ଉଲ୍ଲେଖ ରହିଛି ଯେ, ରାଜ୍ୟର କେତେକ ସ୍ଥାନରେ ଘଡ଼ଘଡ଼ି ସହ ବର୍ଷାର ସମ୍ଭାବନା ରହିଛି । ଦକ୍ଷିଣ ଉପକୂଳ ସହିତ ୬ଟି ଜିଲ୍ଲାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି ।
ଆସନ୍ତା ୨ରୁ ୩ ତାରିଖ ଯାଏଁ ଜଗତସିଂହପୁର,କେନ୍ଦ୍ରାପଡା, କନ୍ଧମାଳ, ମାଲକାନଗିରି,କୋରାପୁଟ, ରାୟଗଡ଼ା ଜିଲ୍ଲାରେ ସ୍ୱଳ୍ୱରୁ ମଧ୍ୟମ ଧରଣର ବର୍ଷା ହେବ ବୋଲି ସତର୍କ ସୂଚନା ଜାରି କରାଯାଇଛି । ଏବେ ଧାନ ପାଚି ଅମଳ ସମୟ ହୋଇଥିବାରୁ ଏହି ବର୍ଷା ଚାଷୀ ଓ ଚାଷ କାର୍ଯ୍ୟ ପାଇଁ ଘାତକ ହେବ ବୋଲି ଆଶଙ୍କା କରାଯାଉଛି । ତେବେ ଡିସେମ୍ବର ମାସରେ ଓଡିଶାରେ ଲଘୁଚାପ ଜନିତ ବର୍ଷା ହେବା ନୂଆ କଥା ନୁହେଁ ।
୨୦୧୦,୨୦୧୫, ୨୦୧୭ ମସିହାରେ ମଧ୍ୟ ଲଘୁଚାପ ପ୍ରଭାବରେ ବର୍ଷା ହୋଇଛି । ସେ ସମୟରେ ଗଞ୍ଜାମ,ଗଜପତି, ଢେଙ୍କାନାଳ ସହ କିଛି ଜିଲ୍ଳାରେ ପ୍ରବଳରୁ ଅତି ପ୍ରବଳ ବର୍ଷା ହୋଇଛି । ଏବେ ପୁଣି ଯେଉଁ ଲଘୁଚାପ ଆସୁଛି ଯାହାର ପ୍ରଭାବ ଓଡିଶା ଉପରେ ରହିବ ବୋଲି ପାଣିପାଗ ବିଜ୍ଞାନୀ ମାନେ ଯେଉଁ ଆଶଙ୍କା କରିଛନ୍ତି, ସେମାନଙ୍କ ପକ୍ଷରୁ କୁହାଯାଉଛି ଯେ, ଲଘୁଚାପଟି ଘନୀଭୂତ ହୋଇ ଅବପାତ ଓ ଗଭୀର ଅବପାତର ରୂପ ନେବ । ଏବଂ ପରେ ଏହାର ସାଇକ୍ଲୋନିକ ଷ୍ଟର୍ମରେ ପରିଣତ ହୋଇପାରେ ବୋଲି ବର୍ତମାନ ପର୍ଯ୍ୟନ୍ତ ଆକଳନ କରାଯାଇଛି । ଯଦି ବିଭିନ୍ନ ପାଣିପାଗ ସଂସ୍ଥା କଥା କହିବା,ତେବେ ସେମାନେ ମଧ୍ୟ ଆକଳନ କରୁଛନ୍ତି।
ଓଡିଶା ଉପରକୁ ଏକ ବାତ୍ୟା ଆସିପାରେ । କିନ୍ତୁ ସ୍ପଷ୍ଟ ଚିତ୍ର ସେତେବେଳେ ଆସିବ ଯେତେବେଳେ ଲଘୁଚାପଟି ସୃଷ୍ଟି ହେବ। ଲଘୁଚାପ ସୃଷ୍ଟି ହେବା ପରେ ହିଁ ବାତ୍ୟାର ଗତିପଥ ଓ ଏହା କେଉଁ କେଉଁ ଦିଗ ଦେଇ ଗତି କରିବ, ପବନର ବେଗ କେତେ ରହିବ ତାହାର ସ୍ପଷ୍ଟଚିତ୍ର ଆସିପାରିବ। କିନ୍ତୁ ତା ପୂର୍ବରୁ ପାଣିପାଗ ବିଜ୍ଞାନୀ ମାନେ ଆକଳନ କରିଛନ୍ତି ଯେ, ୩ରୁ ୬ ତାରିଖ ପର୍ଯ୍ୟନ୍ତ ରାଜ୍ୟର ଅଧିକାଂଶ ଜିଲ୍ଲାରେ ବର୍ଷା ହେବ ।