ନୂଆଦିଲ୍ଲୀ; ଆସନ୍ତା ବିଧାନସଭା ନିର୍ବାଚନକୁ ନଜରରେ ରଖି ୫ଟି ରାଜ୍ୟରେ ସୁରକ୍ଷା ବ୍ୟବସ୍ଥା କଡ଼ା କରାଯାଇଛି। ବିଏସ୍ଏଫ୍ ସହିତ କେନ୍ଦ୍ରୀୟ ଅର୍ଦ୍ଧସାମରିକ ବଳମାନଙ୍କୁ ବ୍ୟାପକ ଭାବେ ମୁତୟନ କରାଯାଉଛି।
ସୂଚନାନୁସାରେ, ଆସାମ , କେରଳ , ପୁଡୁଚେରୀ, ତାମିଲନାଡୁ ଏବଂ ପଶ୍ଚିମବଙ୍ଗରେ ହେବାକୁ ଯାଉଥିବା ବିଧାନସଭା ନିର୍ବାଚନ ପାଇଁ ପ୍ରାୟ ୨.୫ ଲକ୍ଷରୁ ୩ ଲକ୍ଷ ପର୍ଯ୍ୟନ୍ତ କେନ୍ଦ୍ରୀୟ ବଳ ନିୟୋଜନ ହେଉଛି। ନୂତନ ବ୍ୟବସ୍ଥା ଅନୁଯାୟୀ, ପ୍ରତ୍ୟେକ ଭୋଟ କେନ୍ଦ୍ରରେ ବିଏସ୍ଏଫ୍ କର୍ମଚାରୀମାନେ ମୁତୟନ ହେବେ। ଭୋଟରମାନଙ୍କର ପରିଚୟପତ୍ର ସଠିକ ଯାଞ୍ଚ କରିବେ। ମତଦାନ କେନ୍ଦ୍ରରେ ଲାଗିଥିବା ସିସିଟିଭି କ୍ୟାମେରା ଉପରେ ତୀକ୍ଷ୍ଣ ନଜର ରଖିବେ।
ପ୍ରତ୍ୟେକ ପୋଲିଂ ବୁଥରେ ଜଣେ ପୁରୁଷ ଓ ଜଣେ ମହିଳା ବିଏସ୍ଏଫ୍ ସୈନିକଙ୍କୁ ନିୟୋଜିତ କରିବା ପ୍ରସ୍ତାବ ରହିଛି, ଯାହା ଭୋଟରଙ୍କ ଯାଞ୍ଚ ଓ ସୁରକ୍ଷାକୁ ଆହୁରି ଶକ୍ତିଶାଳୀ କରିବ। ଏହାସହିତ, ୨୦୨୪ ସାଧାରଣ ନିର୍ବାଚନ ସମୟରେ ଏହି ରାଜ୍ୟଗୁଡ଼ିକରେ କାର୍ଯ୍ୟରତ ଥିବା ଇନ୍ସପେକ୍ଟର ଓ ଅନ୍ୟ ଅଧିକାରୀମାନଙ୍କୁ ତୁରନ୍ତ ବଦଳି କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ନିର୍ବାଚନକୁ ନିରପେକ୍ଷ, ସୁଚାରୁ ଓ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ କରିବା ପାଇଁ ଏହି ବ୍ୟାପକ ସୁରକ୍ଷା ବ୍ୟବସ୍ଥା ନିଆଯାଇଛି।