ପଞ୍ଜାବ: ସଂଜୀବ ଅରୋରା ଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଶନିବାର ମନି ଲଣ୍ଡରିଂ ମାମଲାରେ ଗିରଫ କରିଛି। ପଞ୍ଜାବର ଶିଳ୍ପ ମନ୍ତ୍ରୀ ତଥା ପୂର୍ବତନ ରାଜ୍ୟସଭା ସାଂସଦ ଥିବା ସଞ୍ଜୀବ ଅରୋରାଙ୍କ ବିରୋଧରେ ଜମି କାରବାର, ଭୁଆ ଜିଏସଟି ବିଲ୍, ହାୱାଲା ଏବଂ ଦୁବାଇରୁ ଭାରତକୁ ଅବୈଧ ଟଙ୍କା ଆଣିବା ଭଳି ଗୁରୁତର ଅଭିଯୋଗ ରହିଛି। ଇଡି ପକ୍ଷରୁ ଦିଲ୍ଲୀ, ଗୁରୁଗ୍ରାମ ଓ ଚଣ୍ଡୀଗଡ଼ ସହ ଏକାଧିକ ସ୍ଥାନରେ ଚଢ଼ାଉ କରାଯାଇଥିଲା। ଏହା ପରେ ସଞ୍ଜୀବ ଅରୋରାଙ୍କୁ ଗିରଫ କରାଯାଇଥିଲା।
ତଦନ୍ତକାରୀ ସଂସ୍ଥାର ଅଭିଯୋଗ ଅନୁସାରେ, ସଞ୍ଜୀବ ଅରୋରାଙ୍କ କମ୍ପାନୀ ‘ହ୍ୟାମ୍ପଟନ ସ୍କାଇ ରିଅଲଟି ଲିମିଟେଡ୍’ ଭୁଆ କମ୍ପାନୀ ମାଧ୍ୟମରେ ୧୦୦ କୋଟି ଟଙ୍କାରୁ ଅଧିକ ମୂଲ୍ୟର ନକଲି ଜିଏସଟି ବିଲ୍ ତିଆରି କରିଥିବା ସହ ଶେୟାର ବଜାରରେ ହେରଫେର କରିଥିବା ଅଭିଯୋଗ ରହିଛି। ଏହି ଟଙ୍କାକୁ ଦୁବାଇ ମାର୍ଗରେ ଭାରତକୁ ଆଣି “ରାଉଣ୍ଡ ଟ୍ରିପିଂ” କରାଯାଇଥିବା ମଧ୍ୟ ଇଡି ଦାବି କରିଛି। ଏହି ଗିରଫ ପରେ ପଞ୍ଜାବରେ ରାଜନୈତିକ ତାପମାତ୍ରା ବଢ଼ିଛି। ଭଗବାନ୍ତ ମାନ ଓ ଆମ ଆଦମୀ ପାର୍ଟି କେନ୍ଦ୍ର ସରକାର ଉପରେ ରାଜନୈତିକ ପ୍ରତିଶୋଧର ଅଭିଯୋଗ ଆଣିଛନ୍ତି।