ନୂଆ ଦିଲ୍ଲୀ: କେନ୍ଦ୍ର ସରକାର ଗ୍ରାମୀଣ ରୋଜଗାର କ୍ଷେତ୍ରରେ ବଡ଼ ପରିବର୍ତ୍ତନ ଆଣି ‘ଭିବି-ଜିରାମ-ଜି’ ଆଇନକୁ ଜୁଲାଇ ୧, ୨୦୨୬ରୁ ସମଗ୍ର ଦେଶରେ ଲାଗୁ କରିବାକୁ ଅଧିସୂଚନା ଜାରି କରିଛନ୍ତି। ଏହି ନୂତନ ଯୋଜନା ‘ବିକଶିତ ଭାରତ-ଗ୍ୟାରେଣ୍ଟି ଫର୍ ରୋଜଗାର ଏବଂ ଆଜୀବିକା ମିଶନ ଗ୍ରାମୀଣ’ ନାମରେ ପରିଚିତ ହେବ ଏବଂ ପୂର୍ବତନ ମନରେଗା ଯୋଜନାର ସ୍ଥାନ ନେବ।
କେନ୍ଦ୍ର ସରକାରଙ୍କ ମତାନୁସାରେ, ମନରେଗାରେ ଦୁର୍ନୀତି ଓ କାମର ଅଭାବକୁ ଦୃଷ୍ଟିରେ ରଖି ଏହି ନୂତନ ଆଇନ ଆଣାଯାଇଛି। ପୂର୍ବରୁ ୧୦୦ ଦିନର ରୋଜଗାର ଗ୍ୟାରେଣ୍ଟି ଥିବାବେଳେ ଏବେ ଏହାକୁ ବଢ଼ାଇ ୧୨୫ ଦିନ କରାଯାଇଛି। ଏଥିରେ ଗ୍ରାମୀଣ ଗରିବ, ଚାଷୀ, ଶ୍ରମିକ ଓ ବେକାର ଯୁବକ-ଯୁବତୀମାନେ ଅଧିକ ଲାଭ ପାଇବେ ବୋଲି ସରକାର କହିଛନ୍ତି।
ନୂତନ ଯୋଜନା ଅଧୀନରେ ଗ୍ରାମରେ ସଡ଼କ, ପୋଲ, ଜଳସଂରକ୍ଷଣ ପ୍ରକଳ୍ପ, ବିଦ୍ୟାଳୟ ଶୌଚାଳୟ ଓ କୃଷକଙ୍କ ପାଇଁ ଫସଲ ମଣ୍ଡି ଭଳି ବିକାଶମୂଳକ କାମ କରାଯିବ। ପ୍ରକଳ୍ପ ପାଇଁ ଗ୍ରାମବାସୀ ଓ ସରପଞ୍ଚ ମିଳିତ ଭାବେ ଯୋଜନା ପ୍ରସ୍ତୁତ କରିବେ। ଏହି ଯୋଜନାରେ ଖର୍ଚ୍ଚର ୬୦ ପ୍ରତିଶତ କେନ୍ଦ୍ର ସରକାର ଓ ୪୦ ପ୍ରତିଶତ ରାଜ୍ୟ ସରକାର ବହନ କରିବେ। ଶ୍ରମିକଙ୍କ ପାରିଶ୍ରମିକ ସିଧାସଳଖ ବ୍ୟାଙ୍କ କିମ୍ବା ଡାକଘର ଖାତାକୁ ଯିବ। ଏହାସହ କାମ ନମିଳିଲେ ବେରୋଜଗାରୀ ଭତ୍ତା ଓ ପାରିଶ୍ରମିକରେ ବିଳମ୍ବ ହେଲେ କ୍ଷତିପୂରଣର ବ୍ୟବସ୍ଥା ମଧ୍ୟ ରହିଛି।