ନୂଆଦିଲ୍ଲୀ: ଦିଲ୍ଲୀରେ ଧାରଣା ଓ ବିରୋଧ ପ୍ରଦର୍ଶନ ପାଇଁ ନିର୍ଦ୍ଧାରିତ ସ୍ଥାନରେ ବଡ଼ ପରିବର୍ତ୍ତନ ହୋଇଛି। ଦୀର୍ଘଦିନ ଧରି ବିଭିନ୍ନ ଆନ୍ଦୋଳନର କେନ୍ଦ୍ର ପାଲଟିଥିବା ଜନ୍ତରମନ୍ତରକୁ ଏହି ତାଲିକାରୁ ବାଦ୍ ଦିଆଯାଇଛି। ଏହା ବଦଳରେ ରାମଲୀଳା ମୈଦାନ, ବୁରାରି ଗ୍ରାଉଣ୍ଡ ଓ ପୂର୍ବ ଦିଲ୍ଲୀର ସିବିଡି ଗ୍ରାଉଣ୍ଡକୁ ପ୍ରତିବାଦ ପାଇଁ ନୂଆ ସ୍ଥାନ ଭାବେ ଚିହ୍ନଟ କରାଯାଇଛି।
ଦିଲ୍ଲୀ ପୋଲିସର ଷ୍ଟାଣ୍ଡିଂ ଅର୍ଡର ଅନୁଯାୟୀ, କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ପ୍ରତିବାଦ ଓ ଧାରଣା ପାଇଁ ବିକଳ୍ପ ସ୍ଥାନ ଚିହ୍ନଟ କରିବାକୁ ଏକ କମିଟି ଗଠନ କରାଯାଇଥିଲା। ନାଗରିକମାନେ ଶାନ୍ତିପୂର୍ଣ୍ଣ ଭାବେ ନିଜର ମତ ରଖିବା ଓ ବିରୋଧ ପ୍ରଦର୍ଶନ କରିବା ପାଇଁ ଉପଯୁକ୍ତ ସ୍ଥାନ ନିର୍ଦ୍ଧାରଣ କରିବା ଏହି କମିଟିର ଦାୟିତ୍ୱ ଥିଲା। କମିଟିର ସୁପାରିସ ପରେ ଜନ୍ତରମନ୍ତରକୁ ତାଲିକାରୁ ହଟାଇ ତିନୋଟି ନୂଆ ସ୍ଥାନକୁ ସାମିଲ କରାଯାଇଛି। ପ୍ରଦର୍ଶନ ପାଇଁ ଅନୁମତି ଓ ନିୟମାବଳୀ ସମ୍ପର୍କରେ ପରବର୍ତ୍ତୀ ମାନକ କାର୍ଯ୍ୟପଦ୍ଧତିରେ ସବିଶେଷ ତଥ୍ୟ ଦିଆଯିବ।
ଜନ୍ତରମନ୍ତର ଦୀର୍ଘବର୍ଷ ଧରି ଦେଶର ବିଭିନ୍ନ ଆନ୍ଦୋଳନ ଓ ଜନସ୍ୱାର୍ଥ ସମ୍ପର୍କିତ ପ୍ରତିବାଦର ପ୍ରମୁଖ ସ୍ଥାନ ଭାବେ ପରିଚିତ। ୨୦୧୧ରେ ଆନ୍ନା ହଜାରେଙ୍କ ଦୁର୍ନୀତି ବିରୋଧୀ ଆନ୍ଦୋଳନ ଏହାକୁ ଜାତୀୟ ସ୍ତରରେ ପରିଚିତି ଦେଇଥିଲା। ଏବେ ଏହି ସ୍ଥାନକୁ ପ୍ରତିବାଦ ସ୍ଥଳ ତାଲିକାରୁ ହଟାଯିବା ପରେ ରାଜନୈତିକ ଓ ସାମାଜିକ ଆନ୍ଦୋଳନ କେଉଁ ଦିଗକୁ ଗତି କରିବ, ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି।