ଭୁବନେଶ୍ବର: ଶିକ୍ଷାନୁଷ୍ଠାନ ଖୋଲିବା ନେଇ ସରକାରଙ୍କ ବଡ଼ ନିଷ୍ପତି ଆସିଲା। ଜୁଲାଇ ୨୬ରୁ ଖୋଲିବ ଦଶମ ଓ ଦ୍ୱାଦଶ ଶ୍ରେଣୀ ସ୍କୁଲ । ସକାଳ ୧୦ଟାରୁ ଅପରାହ୍ନ ଗୋଟାଏ ୩୦ ପର୍ଯ୍ୟନ୍ତ ସ୍କୁଲ ଖୋଲିବ। ସମସ୍ତ ସରକାରୀ ଓ ବେସରକାରୀ ସ୍କୁଲରେ ଦଶମ ଓ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଠପଢା ଆରମ୍ଭ ହେବ। ଏନେଇ ଗଣଶିକ୍ଷା ସଚିବ ସତ୍ୟବ୍ରତ ସାହୁ ସୂଚନା ଦେଇଛନ୍ତି।
ସମସ୍ତ ଶିକ୍ଷକ ଓ ଶିକ୍ଷୟିତ୍ରୀ ମାନଙ୍କୁ ପ୍ରାଥମିକତା ଭିତ୍ତିରେ ଟିକାକରଣ କରାଯିବ। ଯେଉଁ ସ୍କୁଲରେ ମାଟ୍ରିକ ପରୀକ୍ଷା କେନ୍ଦ୍ର ହେବ , ତାହା ପରେ ଖୋଲିବା ନେଇ ସୂଚନା ଦିଆଯାଇଛି । ଅଭିଭାବକଙ୍କ ସହ ଆଲୋଚନା କରି ପିଲାମାନେ ସ୍କୁଲ ଯାଇପାରିବେ। ତେବେ କୋଭିଡ ଗାଇଡଲାଇନ ଅନୁସାରେ ସ୍କୁଲ ଖୋଲାଯିବ। ଥର୍ମାଲ ସ୍କାନିଂ, ସାନିଟାଇଜର ,ମାସ୍କ ବାଧ୍ୟତାମୂଳକ କରାଯାଇଛି। ସ୍କୁଲ ଖୋଲିବା ନେଇ ସ୍ଥଳବିଶେଷରେ ଜିଲ୍ଲାପାଳ ନିଷ୍ପତି ନେବେ।
ସେହିପରି କରୋନା ସଂକ୍ରମଣ ସ୍ଥିତି ସ୍ୱାଭାବିକ ହେଲେ ନବମ ଶ୍ରେଣୀର ପାଠପଢା ଅଗଷ୍ଟ ୧୬ରୁ ଆରମ୍ଭ କରିବା ଲାଗି ଯୋଜନା କରାଯାଉଥିବା ଗଣଶିକ୍ଷା ସଚିବ କହିଛନ୍ତି। ଏବଂ ସେପ୍ଟେମ୍ବର ୧୫ ପରେ ଏକାଦଶ ଶ୍ରେଣୀ ପାଠପଢା ଆରମ୍ଭ ହୋଇପାରେ ।
ନବମ ଓ ଦଶମ ଶ୍ରେଣୀ ପିଲାଙ୍କ ଆସେସମେଂଟ ହେବ । ତେଣୁ ସମସ୍ତ ପରୀକ୍ଷାକୁ ଗୁରୁତ୍ୱ ଦେବାକୁ ଛାତ୍ରଛାତ୍ରୀ ଓ ଅଭିଭାବକ ମାନଙ୍କୁ କୁହାଯାଇଛି । ଏହି ପରୀକ୍ଷା ଶ୍ରେଣୀ ଶିକ୍ଷକ ଓ ବିଷୟ ଶିକ୍ଷକଙ୍କ ଦ୍ୱାରା ହେବ। ସେହିପରି ଯୁକ୍ତ ଦୁଇ ସ୍ତରରେ କଣ୍ଟିନିୟସ ଆସେସମେଂଟ ପାଇଁ ଯୋଜନା ହେଉଥିବା ଗଣଶିକ୍ଷା ସଚିବ କହିଛନ୍ତି।