କଳାହାଣ୍ଡି କଂଗ୍ରେସକୁ ଭକ୍ତ ଅଡୁଆ

ଭୁବନେଶ୍ୱର: କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଆସନ୍ତା ୬ ତାରିଖ ଦିନ ଓଡ଼ିଶା ଗସ୍ତରେ ଆସୁଛନ୍ତି । ରାହୁଲ ଉଭୟ ଭବାନୀପାଟଣା ଓ ରାଉରକେଲାରେ ସଭା କରିବେ । ଉଭୟ ସୁନ୍ଦରଗଡ ଓ କଳାହାଣ୍ଡି ଆସନକୁ ଫେରାଇ ଆଣିବା ଲାଗି ପିସିସି ଏଭଳି ଗୋଟିଚାଳନା କରିଛି ।
ସ୍ଥାନୀୟ ନେତାମାନେ କଂଗ୍ରେସକୁ ସଶକ୍ତ କରିବା ଲକ୍ଷ୍ୟରେ କାର୍ଯ୍ୟ ଆରମ୍ଭ କରିଥିଲେ ହେଁ, ପୂର୍ବତନ କେନ୍ଦ୍ରମନ୍ତ୍ରୀ ଭକ୍ତ ଚରଣ ଦାସଙ୍କ ବିରୋଧରେ ମେଳି ବାନ୍ଧିଲେଣି । ଏମିତି ଯେ ଦଳର କିଛି ବରିଷ୍ଠ ନେତା ନିକଟରେ ରାଜଧାନୀ ଆସି ଶୀର୍ଷ ନେତୃତ୍ୱକୁ ଭେଟି ଆଲୋଚନା କରିଥିବା ଜଣାପଡିଛି । ରୋକ୍‍ଠୋକ୍‍ ଶୁଣାଇ ଦେଇ ଯାଇଛନ୍ତି ଯେ ଭକ୍ତ ଦାସ ଦଳକୁ ନଷ୍ଟଭ୍ରଷ୍ଟ କରିଦେଲେ । ଏବେ ଶ୍ରୀ ଦାସ ନିଜେ ସାଂସଦ ପ୍ରାର୍ଥୀ ହେବାକୁ ଚାହୁଁଛନ୍ତି ଓ ପୁଅକୁ ଭବାନୀପାଟଣା ଆସନରେ ପ୍ରାର୍ଥୀ କରିବା ଲାଗି ଜୋରଦାର ଉଦ୍ୟମ ଚଳାଇଛନ୍ତି । ଯଦି ଏହା ହୁଏ, ତେବେ କଳାହାଣ୍ଡି ଜିଲ୍ଲାରେ ହାତ ଛିଡିପଡିବ ବୋଲି ଏହି ନେତାମାନେ ରାଜ୍ୟ ନେତୃତ୍ୱଙ୍କୁ ଜଣାଇ ଦେଇଛନ୍ତି ।
ନିଜ ନାମ ଗୋପନ ସର୍ତରେ ଜଣେ ବରିଷ୍ଠ ନେତା କହିଛନ୍ତି, ତେଲେଙ୍ଗାନାରେ ଭକ୍ତ ଓ ତାଙ୍କ ପୁଅଙ୍କୁ ନେଇ ଯେଉଁ କାଣ୍ଡ ଘଟିଲା ତାହା କଳାହାଣ୍ଡିରେ ଚର୍ଚ୍ଚାର ବିଷୟ ହୋଇଛି । କଂଗ୍ରେସ ଭୋଟ ବ୍ୟାଙ୍କ ପ୍ରଭାବିତ ହେବା ପଛର ଏହା ବଡ କାରଣ ବୋଲି କୁହାଯାଇପାରେ । ଏବେ ପୁଣି ବିବାଦରେ ଥିବା ଶ୍ରୀ ଦାସ ପରିବାର ଯଦି ଦୁଇ ଦୁଇଟି ଟିକେଟ ନିଅନ୍ତି, ତେବେ ସ୍ଥିତି ଗମ୍ଭୀର ହୋଇଯିବ ।
ଏହି ନେତାମାନେ ଆହୁରି କହିଛନ୍ତି, ନବ ଦାସ ଦଳ ଛାଡି ଯିବା ପରେ ପ୍ରଦୀପ ମାଝୀଙ୍କୁ ପଶ୍ଚିମ ଓଡିଶା ଦାୟିତ୍ୱ ଦିଆଯାଇଛି । ଏହା ଭକ୍ତଙ୍କୁ ସୁହାଇଛି । ତାଙ୍କ ଧାରାରେ ସେ ଟିକେଟ ନେବା ପାଇଁ ଚାହୁଁଛନ୍ତି । ଯଦି ଭକ୍ତଙ୍କୁ ଦଳ ଗୁରୁତ୍ୱ ଦିଏ, ତେବେ ଅନ୍ୟମାନଙ୍କ ଆଶା କଂଗ୍ରେସ ହରାଇବ ବୋଲି ଏହି ନେତାମାନେ ଚେତାବନୀ ଦେଇଛନ୍ତିଷ
ସ୍ଥାନୀୟ ଅଞ୍ଚଳର ନେତାମାନଙ୍କର ଏଭଳି ଆଭିମୁଖ୍ୟ ଦେଖି ରାଜ୍ୟ କଂଗ୍ରେସର ଶୀର୍ଷ ନେତୃତ୍ୱ ବିଚଳିତ ହୋଇପଡିଲାଣି । ଯଦିଓ ଗୋଟିଏ ପରିବାରକୁ ଗୋଟିଏ ଟିକେଟ ଦିଆଯିବ ବୋଲି କଂଗ୍ରେସ ସ୍ଥିର କରିଛି ଓ ସେ ଦୃଷ୍ଟିକୋଣକୁ ଭକ୍ତଙ୍କ ପରିବାର ଭିତରୁ ଜଣେ ମାତ୍ର ଟିକେଟ ପାଇବେ, ତଥାପି ରାହୁଲଙ୍କ ସହିତ ଥିବା ତାଙ୍କର ସଂପର୍କକୁ ନେଇ ସେ ଏକାଧିକ ଆସନରେ ନିଜ ଇଚ୍ଛାରେ ପ୍ରାର୍ଥୀ କରିବା ବିଚିତ୍ର ନୁହେଁ ।
ଉଲ୍ଲେଖଥାଉକି, ରାଜ୍ୟ ନେତୃତ୍ୱ ମଧ୍ୟ ଭକ୍ତଙ୍କ ଲୋକପ୍ରିୟତା ଆଉ ଆଗ ଭଳି ନାହିଁ, ଏକଥା ଜାଣିସାରିଲେଣି । ତା ସତ୍ତ୍ୱେ ଭକ୍ତଙ୍କ ବିରୋଧରେ କଠୋର ଆଭିମୁଖ୍ୟ ନେବାର ଯୁ ନାହିଁ । ଯଦି ରାହୁଲ ନିଜେ ଏହି ସ୍ଥିତି ନ ବୁଝି ଏକତରଫା ନିଷ୍ପତ୍ତି ନିଅନ୍ତି, ତେବେ ଯେତେ ଗସ୍ତ କଲେ କଣ ଫଳ ମିଳିବ ବୋଲି କଂଗ୍ରେସ ଶିବିରରେ ଚର୍ଚ୍ଚା ହେଲାଣି ।
ଗତ ଥର କଂଗ୍ରେସ ଏଠାରେ ତୃତୀୟ ସ୍ଥାନରେ ଥିଲା । ପଞ୍ଚାୟତ ନିର୍ବାଚନରେ ବିଜେପି ଏହି ଜିଲ୍ଲାରେ ଭଲ ପ୍ରଦର୍ଶନ କରିଛି । ଏପରିସ୍ଥଳେ ଏଥର ଯଦି କଂଗ୍ରେସ କିଛି ଚମକାଇବା ଭଳି କାର୍ଯ୍ୟ ନ କରେ, ତେବେ ସ୍ଥିତି ଅସମ୍ଭାଳ ହୋଇଯିବ ଓ ହାତ ଖଣ୍ଡ ଖଣ୍ଡ ହୋଇଯିବା ବିଚିତ୍ର ନୁହେଁ ।