ବିଜୟଙ୍କ ପାଇଁ ନବୀନ-ଧର୍ମେନ୍ଦ୍ର ମୁହାଁମୁହିିଁ
ପାଟକୁରା ନିର୍ବାଚନ ବନ୍ଦ ପାଇଁ ନବୀନ ନିବେଦନ କରିଥିଲେ
ଆପତ୍ତି ଉଠାଇଲେ ଧର୍ମେନ୍ଦ୍ର, ନିର୍ବାଚନ କରିବା ଲାଗି କହିଲେ
ବିଜେଡି ବିରୋଧରେ ବିଷୋଦଗାର କଲା ବିଜେପି, କହିଲା ଡରୁଛନ୍ତି
ଭୁବନେଶ୍ୱର:ପାଟକୁରାରେ ନିର୍ବାଚନ ହେବ କି ନାହି, ତାହାକୁ ନେଇ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ଗତକାଲି ନୂଆଦିଲ୍ଲୀ ଗସ୍ତରେ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାରତର ନିର୍ବାଚନ କମିସନଙ୍କୁ ଭେଟି ସମ୍ଭାବ୍ୟ ବାତ୍ୟା ଫନି ପରିପ୍ରେକ୍ଷୀରେ ପାଟକୁରା ନିର୍ବାଚନ ବନ୍ଦ କରିବା ଲାଗି ନିବେଦନ କରିଥିଲେ । ଦର୍ଶାଇଥିଲେ ଯେ ବାତ୍ୟା ପ୍ରଭାବରେ କେନ୍ଦ୍ରାପଡା ପ୍ରଭାବିତ ହେବ । ଦଳମତ ନିର୍ବିଶେଷରେ ସମସ୍ତଙ୍କ ସହଯୋଗରେ ହିଁ ଏହି ବିପର୍ଯ୍ୟୟ ମୁକାବିଲା କରାଯାଇପାରିବ । ବର୍ତମାନ ପରିସ୍ଥିତିରେ ଏଠାରେ ନିର୍ବାଚନ ସମ୍ଭବ ନୁହେଁ, କାରଣ, ଲୋକଙ୍କୁ ସ୍ଥାନାନ୍ତର କରିବାକୁ ପଡିବ ଓ ବିପର୍ଯ୍ୟୟ କାରଣରୁ ପରିସ୍ଥିତିରେ କେବେ ସୁଧାର ଆସିବ, ତାହା ପୂର୍ବାନୁମାନ କରାଯାଇପାରିବ ନାହିଁ । ପ୍ରଭାବିତ ହେବାକୁ ଥିବା ସମ୍ଭାବ୍ୟ ଜିଲ୍ଲାରେ ନିର୍ବାଚନ ଆଚରଣ ବିଧି କୋହଳ କରିବାକୁ ମଧ୍ୟ ନବୀନ ନିବେଦନ କରିଥିଲେ ।
ଏହାକୁ ଆଧାର କରି ଗତକାଲି ୧୧ଟି ଜିଲ୍ଲାରେ ନିର୍ବାଚନ କମିସନ ଆଚରଣ ବିଧି କୋହଳ କରିଛନ୍ତି । ପାଟକୁରା ନିର୍ବାଚନ ହେବ କି ନାହିଁ, ତାହା ଜଣାପଡିନାହିଁ । ଏପରି ପରିସ୍ଥିତିରେ ଆଜି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏକ ପ୍ରତିନିଧି ମଣ୍ଡଳୀ ନେଇ ନିର୍ବାଚନ କମିସନଙ୍କୁ ଭେଟି ନବୀନଙ୍କ ନିବେଦନ ଉପରେ ଆପତ୍ତି ଜଣାଇଛନ୍ତି । ନିର୍ବାଚନ କରିବା ଲାଗି ସେ ଦାବି କରିଛନ୍ତି । ବିଜେଡି ଡରରେ ଏହି ନିର୍ବାଚନ ଘୁଞ୍ଚାଇବାକୁ ଚାହୁଁଛି ଓ ଏହା ପରାଜୟର ପ୍ରତିଫଳନ ବୋଲି ନିର୍ବାଚନ କମିସନଙ୍କୁ ଜଣାଇଛନ୍ତି ।
କେବଳ ସେତିକି ନୁହେଁ, ଧର୍ମେନ୍ଦ୍ର ମତଦାନ ସମୟରେ ବିଜେପି କର୍ମୀଙ୍କ ଉପରେ ଶାସକ ଦଳର ହିଂସାର ପ୍ରମାଣ ନିର୍ବାଚନ କମିସନଙ୍କୁ ଦେଇଛନ୍ତି । ବିଜେପି ଅଭିଯୋଗ କରିଛି ଯେ ରାଜ୍ୟ ନିର୍ବାଚନ ଅଧିକାରୀ ଭ୍ରଷ୍ଟ, ଶାସକ ଦଳ ପାଇଁ ସେ କାର୍ଯ୍ୟ କରୁଛନ୍ତି । ମିଛ ସଂଗଠନର ଆବେଦନ ଉପରେ ଶାସକ ଦଳକୁ ସମର୍ଥନ ପାଇଁ କିଛି ବୁଥରେ ପୁଣି ଭୋଟ ପାଇଁ ସିଇଓ ଷଡଯନ୍ତ୍ର କରୁଛନ୍ତି ।
ବିଜେପି ଏକଥା ଅଭିଯୋଗ କରିଛି ଯେ ବାତ୍ୟା କାରଣରୁ ଆଚରଣ ବିଧି କୋହଳ ହେବାକୁ ଆୟୁଧ କରି ୧୦୦୦ କୋଟିର ମିଛ ବିଲ ପାଇଁ ରାଜ୍ୟ ସରକାର ଷଡଯନ୍ତ୍ର ଚଳାଇଛନ୍ତି । ଏହି ପ୍ରତିନିଧି ଦଳରେ ବିଜେପିର ବରିଷ୍ଠ ନେତାମାନେ ସାମିଲ ଥିଲେ ।
ଉଲ୍ଲେଖଯୋଗ୍ୟ, ପାଟକୁରାରେ ବିଜେପିର ବରିଷ୍ଠ ନେତା ବିଜୟ ମହାପାତ୍ର ନିର୍ବାଚନ ଲଢୁଛନ୍ତି । ସେଠାରେ ବିଜେଡି ପ୍ରାର୍ଥୀ ବେଦ ପ୍ରକାଶ ଅଗ୍ରଵାଲଙ୍କର ମୃତ୍ୟୁ ହେବାରୁ ନିର୍ବାଚନ ସ୍ଥଗିତ ହୋଇଥିଲା । ପରେ ୨୪ ତାରିଖରେ ନିର୍ବାଚନ କମିସନ ଆସନ୍ତା ମେ ୧୯ ତାରିଖରେ ନିର୍ବାଚନ ହେବ ବୋଲି ଘୋଷଣା କରିଥିଲେ । ସେ ଅନୁସାରେ ଆଜି ଅର୍ଥାତ୍ ବୁଧବାର ନାମାଙ୍କନ ପତ୍ର ଦାଖଲର ଶେଷ ତାରିଖ ଥିଲା । ଏହାର ଅବ୍ୟବହିତ ପୂର୍ବରୁ ଅନୁକମ୍ପା ଗୋଟାଇବା ପାଇଁ ବିଜେଡି ବେଦପ୍ରକାଶଙ୍କ ପତ୍ନୀ ସାବିତ୍ରୀ ଅଗ୍ରଵାଲଙ୍କୁ ପ୍ରାର୍ଥୀ କରିଥିଲା । ସେ ମଙ୍ଗଳବାର ନାମାଙ୍କନ ପତ୍ର ଦାଖଲ କରିଥିଲା ।
୨୦୦୦ ମସିହାରେ ଶେଷ ମୁହୂର୍ତରେ ବିଜୟ ମହାପାତ୍ରଙ୍କ ଟିକେଟ୍ କାଟିଦେଇଥିଲା ବିଜେଡି । ସେବେଠାରୁ ବିଜୟଙ୍କୁ ବିଧାନସଭାରେ ପ୍ରବେଶ ରୋକିବାଲାଗି କୌଣସି ସୁଯୋଗ ହାତଛଡା କରିନାହିଁ ।