ପର୍ଯ୍ୟଟକଙ୍କୁ ହୋଟେଲ ଛାଡିବାକୁ ନିର୍ଦେଶ

ପୁରୀ: ଭୀଷଣ ରୂପ ଧାରଣ କରି ଆସୁଥିବା ବାତ୍ୟା ଫନିକୁ ଦୃଷ୍ଟିରେ ରଖି ପୁରୀ ଜିଲ୍ଲା ପ୍ରଶାସନ ସମସ୍ତ ପର୍ଯ୍ୟଟକଙ୍କୁ ହୋଟେଲ ଛାଡି ଚାଲିଯିବାକୁ ନିର୍ଦେଶ ଦେଇଛି । ପୁରୀ ଜିଲ୍ଲାପାଳ ଜ୍ୟୋତିପ୍ରକାଶ ଦାସ ସମସ୍ତ ହୋଟେଲ ମାଲିକଙ୍କୁ ଏ ନେଇ ନିର୍ଦେଶ ଦେବା ସହିତ ହୋଟେଲ ଖାଲି କରିବା ପାଇଁ କହିଛନ୍ତି ।
ଜିଲ୍ଲା ପ୍ରଶାସନ କହିଛି, ଫନି ଆସନ୍ତା ୩ ତାରିଖ ଅପରାହ୍ନରେ ପୁରୀ ବାଲୁଖଣ୍ଡ ନିକଟରେ ସ୍ଥଳ ଭାଗକୁ ସ୍ପର୍ଶ କରିବ । ଏହିସମୟରେ ପବନର ବେଗ ଘଣ୍ଟା ପ୍ରତି ୧୮୦ରୁ ୨୦୦ କିଲୋମିଟର ଥାଇପାରେ । ବିଜୁଳି ସରବରାହ ବ୍ୟାହତ ହେବାର ଆଶଙ୍କା ରହିଛି । ଏହାସହିତ ଯୋଗାଯୋଗ ମଧ୍ୟ ବିଚ୍ଛିନ୍ନ ହୋଇପାରେ ।ଏଣୁ ପର୍ଯ୍ୟଟକଙ୍କୁ ହୋଟେଲ ଛାଡିବା ଲାଗି ନିର୍ଦେଶ ଦେବାକୁ ପ୍ରଶାସନ ଅନୁରୋଧ କରିଛି । ୫ ତାରିଖ ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ ।