ଭୁବନେଶ୍ୱର: ମୟୂରଭଞ୍ଜର ଶୁକ୍ରୁଳି ବ୍ଲକର ଖିଚିଂଠାରେ ପୂଜା ପାଉଛନ୍ତି ମାଆ କୀଚକେଶ୍ୱରୀ। କୀଚକେଶ୍ୱରୀଙ୍କୁ ଭଞ୍ଜମାଟିର ଅଧିଷ୍ଠାତ୍ରୀ ଦେବୀ ବୋଲି କୁହାଯାଏ। ଭଞ୍ଜ ରାଜ ବଂଶର ପ୍ରଥମ ରାଜା ଆଦି ଭଞ୍ଜ କୀଚକେଶ୍ୱରୀଙ୍କୁ ପ୍ରତିଷ୍ଠା କରାଇଥିଲେ। ସେତେବେଳେ ଖିଜିଙ୍ଗ କୋଟା ବା ଖିଚିଂ ଥିଲା ଭଞ୍ଜ ରାଜାମାନଙ୍କର ରାଜଧାନୀ।
କୀଚକେଶ୍ୱରୀଙ୍କ ପ୍ରଥମ ମନ୍ଦିର ପ୍ରାୟ ଦଶମ କି ଏକାଦଶ ଶତାବ୍ଦୀରେ ନିର୍ମିତ ହୋଇଥିଲା। ଏବେ ଥିବା ମନ୍ଦିରର ନିର୍ମାଣ କାମ ମହାରାଜା ସ୍ୱର୍ଗତ ପ୍ରତାପ ଚନ୍ଦ୍ର ଭଞ୍ଜଦେଓଙ୍କ ଅମଳରେ ଆରମ୍ଭ ହୋଇ ୧୯୪୨ ମାର୍ଚ୍ଚ ୧୪ ତାରିଖରେ ସରିଥିଲା। ମନ୍ଦିରର ଉଚ୍ଚତା ୬୮ଫୁଟ ଏବଂ ଏହା ସଂପୂର୍ଣ୍ଣ କଳା ମୁଗୁନି ପଥରରେ ନିର୍ମିତ ହୋଇଛି। କଳା ମୁଗୁନି ପଥରରେ ମଧ୍ୟ ଗଢ଼ା ହୋଇଛି ଦେବୀଙ୍କ ପ୍ରତିମା। ଦେବୀ ଏଠି ଚାମୁଣ୍ଡା ରୂପରେ ବିରାଜିତା। ମାଆ ଶବରୁଢ଼ା। ଶବର ନାଭିରୁ ଫୁଟିଛି ପଦ୍ମଫୁଲ। ପଦ୍ମଫୁଲ ଉପରେ ଦେବୀ ଚକା ଆସନରେ ଉପବିଷ୍ଟ।
ଶାରଦୀୟ ପୂଜାକୁ ନେଇ ଉତ୍ସବ ମୁଖର ହୋଇଥାଏ ଦେବୀପୀଠ। ଦେବୀ ପୂଜାପାଆନ୍ତି ଷୋଡ଼ଶ ଉପଚାରରେ। ବିଜୟାଦଶମୀ ଅବସରରେ ପୂର୍ଣ୍ଣାହୂତି ଦିଆଯାଏ। ଶାରଦୀୟ ପୂଜା ଅବସରରେ ମାଆଙ୍କ ଦର୍ଶନ ଦ୍ୱାରା ମହାପୁଣ୍ୟ ପ୍ରାପ୍ତି ହୋଇଥାଏ ବୋଲି ଭକ୍ତଙ୍କର ଅତୁଟ ବିଶ୍ୱାସ ରହିଛି।
ମାଆଙ୍କ ପାଖରେ ଲାଗୁଥିବା ସିନ୍ଦୁର ଭକ୍ତଙ୍କୁ ସର୍ବସିଦ୍ଧି ପ୍ରଦାନ କରିଥାଏ ବୋଲି ମଧ୍ୟ ବିଶ୍ୱାସ ରହିଆସିଛି। ଦେବୀ ରାଜବଂଶର ଆରାଧ୍ୟା ଠାକୁରାଣୀ ହୋଇଥିବାରୁ ଶାରଦୀୟ ପୂଜା ରାଜପୂଜା ଭାବେ ଖ୍ୟାତ। ରାଜ ପରିବାର ଦାୟଦଙ୍କ ନାମରେ ସଙ୍କଳ୍ପ କରାଯାଇ ମାଆଙ୍କ ନବରାତ୍ର ପୂଜା ହୋଇଥାଏ। ବିଜୟା ଦଶମୀ ଦିନ ମନ୍ଦିର ନିକଟରେ ରାବଣ ପୋଡ଼ି ଅନୁଷ୍ଠିତ ହୋଇଥାଏ।