ମୁମ୍ବାଇ: ବଲିଉଡ଼ର ଲଭ ବାର୍ଡ କ୍ୟାଟ୍ରିନା କୈଫ ଓ ଭିକ୍କି କୌଶଲ ଖୁବ ଶୀଘ୍ର ବିବାହ କରିବାକୁ ଯାଉଛନ୍ତି। ଡିସେମ୍ବର ୭ରୁ ୯ ତାରିଖ ଭିତରେ ଉଭୟ ବିବାହ କରିବା ନେଇ ଖବର ଆସୁଛି। ରାଜସ୍ଥାନର ଜୟପୁର ସ୍ଥିତ ସିକ୍ସ ସେନସନ୍ସ ଆଭିଜାତ୍ୟ ସମ୍ପନ୍ନ ହୋଟେଲରେ ଏହି ଚର୍ଚ୍ଚିତ ବିବାହ ଅନୁଷ୍ଠିତ ହେବ ବୋଲି ଜଣାପଡୁଛି। କୁହାଯାଉଛି ଯେ ବାହାଘରରେ ଅନ୍ତରଙ୍ଗ ବନ୍ଧୁ ଓ ପରିବାରର ସଦସ୍ୟ ହିଁ କେବେଳ ସାମିଲ ହେବେ।
ତେବେ ଜି ନ୍ୟୁଜ ରିପୋର୍ଟ ଅନୁସାରେ, ସୁପରଷ୍ଟାର ସଲମାନ ଖାନ୍ ପରିବାର ସହ ଏହି ବିବାହ କାର୍ଯ୍ୟକ୍ରମରେ ସାମିଲ ହେବେ ନାହିଁ। କୁହାଯାଉଛି ଯେ କ୍ୟାଟ୍ରିନା ଓ ଭିକ୍କିଙ୍କ ବିବାହରେ ଯୋଗଦେବାକୁ ସଲମାନ ଓ ତାଙ୍କ ପରିବାର ପାଖକୁ ପ୍ରଥମ ନିମନ୍ତ୍ରଣ ପଠାଯାଇଥିଲା। କିନ୍ତୁ ସଲମାନ ଏହି ବିବାହରେ ଯୋଗଦେଇନପାରନ୍ତି। ତେବେ ସମସ୍ତଙ୍କୁ ଜଣା ଅଛି ଯେ, ସଲମାନ ଓ କ୍ୟାଟ୍ରିନାଙ୍କ ମଧ୍ୟରେ ପାରିବାରିକ ସମ୍ପର୍କ ରହିଛି। ଭଲ ଓ ଖରାପ ସମୟରେ ସଲମାନ ସବୁବେଳେ କ୍ୟାଟ୍ରିନାଙ୍କ ସହ ଛିଡା ହୋଇଛନ୍ତି।
ଇଣ୍ଡିଆ ଟୁଡେ ରିପୋର୍ଟ ଅନୁସାରେ, କ୍ୟାଟ୍ରିନା ଓ ଭିକ୍କି ବିବାହ କାର୍ଯ୍ୟକ୍ରମରେ ଯୋଗଦେବାକୁ ଇଣ୍ଡଷ୍ଟ୍ରିରେ ବହୁ ସାଙ୍ଗ ଓ ମେଣ୍ଟର୍ସଙ୍କୁ ଡାକିବେ । ଏହି ତାଲିକାରେ କରଣ ଜୋହର, କିୟାରା ଆଡଭାନୀ,ସିଦ୍ଧାର୍ଥ ମଲହୋତ୍ରା , ମୀନି ମାଥୁର ଓ ରୋହିତ ସେଟ୍ଟୀଙ୍କ ନାଁ ରହିଛି । ଏହା ବ୍ୟତୀତ ବରୁଣ ଧୱନ ଓ ନତାଶା ଦଲାଲ ମଧ୍ୟ ବାହାଘରରେ ଯୋଗଦେଇପାରନ୍ତି।
ନିର୍ଦ୍ଦେଶକ କବୀର ଖାନ୍ଙ୍କ ମୁମ୍ବାଇ ଘରେ କ୍ୟାଟ୍ରିନାଙ୍କ ରୋକା ସମାରୋହ ଅନୁଷ୍ଠିତ ହୋଇଛି। କ୍ୟାଟ୍ରିନା , କବୀର ଖାନଙ୍କ ବହୁ ନିକଟତର। ଏବଂ ତାଙ୍କ ସହ ପାରିବାରିକ ସମ୍ପର୍କ ରହିଛି। ରୋକା କାର୍ଯ୍ୟକ୍ରମରେ କେବେଳ କ୍ୟାଟ୍ରିନା ଓ ଭିକ୍କିଙ୍କ ପରିବାର ଲୋକ ସାମିଲ ଥିଲେ।