ଲକ୍ଷ୍ନୌ: ଚୋରି କରିଥିବା ମାନିଲେ। ଆଉ ଚୋରି ଜିନିଷ ଫେରାଇଲେ। ଉତ୍ତର ପ୍ରଦେଶ ଲକ୍ଷ୍ନୌରେ ବିଚ ରାସ୍ତା ଉପରୁ ଚୋରି ହୋଇଯାଇଥିବା ଯୁଦ୍ଧ ବିମାନ ମିରାଜର ଚକ ମିଳିଛି। ଯେଉଁମାନେ ଏହି ଯୁଦ୍ଧ ବିମାନର ଚକ ଚୋରି କରିଥିଲେ, ସେମାନେ ନିଜେ ହିଁ ଆସି ଫେରାଇଛନ୍ତି। ଚୋରି କରିଥିବା ଯୁବକ କହିଛନ୍ତି, ତାଙ୍କୁ ଜଣାନଥିଲା ଏହା ମିରାଜର ଟାୟାର ବୋଲି। ଏହାକୁ ଟ୍ରକର ଟାୟାର ଭାବି ସେମାନେ ଚୋରି କରିନେଇଥିଲେ।
ଲକ୍ଷ୍ନୌ କମିସନରେଟ ପୁଲିସ ପକ୍ଷରୁ ଟାୟାର ମିଳିଥିବା ନେଇ ସ୍ପଷ୍ଟ କରାଯାଇଛି। ପୁଲିସ ପକ୍ଷରୁ କୁହାଯାଇଛି ଯେ, ବିକେଟି ଏୟାରଫୋର୍ସ ଷ୍ଟେସନରେ ଦୁଇ ଜଣ ଯୁବକ ଆସି ଏହି ଟାୟାର ଅଧିକାରୀଙ୍କୁ ଫେରାଇଛନ୍ତି। ଟାୟାର ସହିଦ ପଥ ରାସ୍ତାରୁ ଚୋରି ହୋଇଥିଲା। ଏବଂ ଡିସେମ୍ବର ୧ରେ ଏନେଇ ମାମଲା ରୁଜୁ କରାଯାଇଥିଲା।
ଟ୍ରକରେ ମିରାଜ ଯୁଦ୍ଧ ବିମାନର ଟାୟାରକୁ ବକ୍ସି-କା –ତାଲାବ ଏୟାରବେସରୁ ଯୋଧପୁର ଏୟାରବେସକୁ ନିଆଯାଉଥିଲା। କିନ୍ତୁ ସହିଦ ପଥ ରାସ୍ତାରେ ଟ୍ରାଫିକ ଜାମ ଥିବା ବେଳେ ଟ୍ରକ ଫସି ରହିଥିଲା। ଏହାର ଫାଇଦା ନେଇ ସ୍କର୍ପିଓରେ ଆସିଥିବା ଦୁର୍ବୃତମାନେ ଟ୍ରକର ବେଲ୍ଟ କାଟି ମିରାଜ ଯୁଦ୍ଧ ବିମାନର ଚକ ନେଇଯାଇଥିଲେ। ଟ୍ରକ ଡ୍ରାଇଭ ହେମ ସିଂହ ଯେତେବେଳେ ଏହା ଜାଣିଥିଲେ ସେତେବେଳେ ଚୋର ମାନେ ଫେରାର ହୋଇସାରିଥିଲେ।
ଟ୍ରକ ଡ୍ରାଇଭର୍ଙ୍କ କହିବା ଅନୁସାରେ, ରାତି ସାଢେ ୧୨ରୁ ଗୋଟାଏ ମଧ୍ୟରେ ଏହି ଚୋରି ହୋଇଥିଲା। ନଭେମ୍ବର ୨୭ରେ ଏହି ଘଟଣାଟ ଘଟିଥିଲା। ଡିସେମ୍ବର ୧ରେ ଏନେଇ ଥାନାରେ ଏତଲା ଦିଆଯାଇଥିଲା। ଟ୍ରକରେ ମିରାଜ ଫାଇଟର ଜେଟ୍ର ୫ଟି ଚକ ଯାଉଥିଲା। ସେଥିରୁ ଗୋଟିଏ ଚକ ଚୋରି ହୋଇଯାଇଥିଲା ।