ୟୁକ୍ରେନ-ଋଷ ମଧ୍ୟରେ ଯୁଦ୍ଧର ଆଜି ହେଉଛି ଅଷ୍ଟମ ଦିନ । ଋଷ ଘନ ଘନ ମିସାଇଲ ମାଡ଼ କରୁଛି । ୟୁକ୍ରେନର ଅକ୍ଟିର୍କା ଓ ଖାରକିଭରେ ଋଷର ଆକ୍ରମଣ ହେତୁ ବଡ଼ ଧରଣର କ୍ଷତି ହୋଇଛି । ୟୁକ୍ରେନ ଦାବି କରିଛି ଯେ, ଆକ୍ରମଣରେ ଖାରକିଭର ତିନୋଟି ସ୍କୁଲ ଓ ଚର୍ଚ୍ଚ ଧ୍ୱଂସ ହୋଇଯାଇଛି । ଅକ୍ଟିର୍କାରେ ଋଷର
ବୋମାମାଡ଼ରେ ପ୍ରାୟ ୧୦ ହଜାର କୋଠା ଧ୍ୱଂସବିଧ୍ୱସ୍ତ ହୋଇଯାଇଛି। ୟୁକ୍ରେନର ଖାରକିଭ ଓ ମାରିୟୁପୋଲ ସହର ଉପରେ ଋଷ ବଡ ଧରଣର ଆକ୍ରମଣ କରିଛି ।
ଏହା ସହିତ ଋଷ ସେନା ଖୋରସନକୁ କବଜା କରିନେଇଛନ୍ତି । କିଭ୍ ଆଡକୁ ଋଷ ସେନା ଅଗ୍ରସର ହେଉଥିବା ବେଳେ ୟୁକ୍ରେନ ତରଫରୁ ତାଙ୍କୁ ଅଟକାଯାଉଥିବା ଦାବି କରାଯାଉଛି । ଗତକାଲି ବିଳମ୍ବିତ ରାତିରେ ବିଭିନ୍ନ ସ୍ଥାନରେ ପ୍ରଚଣ୍ଡ ବିସ୍ଫୋରଣ କରିଛନ୍ତି ଋଷ ସେନା । କିଭର ପ୍ରତିରକ୍ଷା ମନ୍ତ୍ରାଳୟ ନିକଟରେ ବିସ୍ଫୋରଣ କରାଯାଇଛି । ଆଜିର ଆକ୍ରମଣ ପୂର୍ବରୁ କିଭ୍ର ଆଲର୍ଟ ଜାରି କରାଯାଇଛି । ଋଷର ଫାଇଟର ଜେଟ ଟାର୍ଗେଟରେ ରହିଛି ୧୫ ସହର । ଏହି ସବୁ ସହରରେ ଆକାଶ ମାର୍ଗରୁ ଆକ୍ରମଣ କରୁଛି ଋଷ ।