କ୍ୟାମେରାମ୍ୟାନ ମାନସ ସ୍ୱାଇଁ ଅପହରଣ ଓ ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ କୁହାଯାଉଥିବା ଶର୍ମିଷ୍ଠା ରାଉତ ଖୁବ ଶୀଘ୍ର ଗିରଫ ହୋଇପାରନ୍ତି । ତେବେ ହାଇକୋର୍ଟରେ ଶର୍ମିଷ୍ଠାଙ୍କ ଆଗୁଆ ଜାମିନ ଆବେଦନ ଖାରଜ ହୋଇଛି । ଗିରଫଦାରୀକୁ ଏଡାଇବା ପାଇଁ ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ ଶର୍ମିଷ୍ଠା । ଓଡିଶା ହାଇକୋର୍ଟ ଜାମିନ ଆବେଦନ ଖାରଜ କରିଦେଇଛନ୍ତି ।
ମାନସ ସ୍ୱାଇଁ ହତ୍ୟାକାଣ୍ଡରେ ମୁଖ୍ୟ ଅଭିଯୁକ୍ତ ଶର୍ମିଷ୍ଠାଙ୍କୁ ଧରିବାରେ ପୁଲିସ ଏଯାଏ ବିଫଳ ହୋଇଛି । ହତ୍ୟାକାଣ୍ଡ ପରଠୁ ଶର୍ମିଷ୍ଠା ଫେରାର ଥିବା ବେଳେ ପୁଲିସ ତାଙ୍କ ପତ୍ତା ପାଉନାହିଁ । ଗତକାଲି ସୂଚନା ଓ ଲୋକସଂପର୍କ ବିଭାଗର ପୂର୍ବତନ ବୈଷୟିକ ନିର୍ଦ୍ଦେଶକ ନିରଞ୍ଜନ ସେଠୀ ଗିରଫ ହେବା ପରେ ଶର୍ମିଷ୍ଠାଙ୍କ ସହ ଅଡୁଆ ଆହୁରି ବଢିଯାଇଛି । ଶର୍ମିଷ୍ଠାଙ୍କ ସହ ଆଉ ଜଣେ ମହିଳା ସହଯୋଗୀଙ୍କୁ ଖୋଜୁଛି ପୁଲିସ । ସେମାନଙ୍କୁ ଗିରଫ ପାଇଁ ପୁଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି ।
ମାନସ ହତ୍ୟା ମାମଲାରେ ଏଯାଏ ୫ ଜଣଙ୍କୁ ଗିରଫ କଲାଣି ପୁଲିସ । ଗତକାଲି ପୂର୍ବତନ ଓଆଇଏସ ନିରଞ୍ଜନ ସେଠୀ ଓ ଅନ୍ୟ ଜଣେ ଅଭିଯୁକ୍ତଙ୍କୁ ପୁଲିସ ଗିରଫ କରିଥିଲା । ଏମାନଙ୍କୁ ରିମାଣ୍ଡରେ ନେବାକୁ ପୁଲିସ ଆବେଦନ କରିବ । ରିମାଣ୍ଡରେ ନେଇ ପୁରା ଘଟଣା ପଛରେ ଆଉ କେଉଁ ମାନଙ୍କ ସଂପୃକ୍ତି ଅଛି ଏବଂ କାହିଁକି ମାନସଙ୍କୁ ହତ୍ୟା କଲେ ସେ ନେଇ ପଚରାଉଚରା କରାଯିବ । ତେବେ ଏକ ଚିପ୍ ପାଇଁ ଏହି ହତ୍ୟାକାଣ୍ଡ ହୋଇଥିବା ଜଣାପଡିଛି । ଏହି ଚିପ୍ରେ କଣ ଥିଲା ଯାହା ପାଇଁ ମାନଓ ସ୍ୱାଇଁଙ୍କୁ ହତ୍ୟା କରାଗଲା ତାହା ଜଣାପଡିନାହିଁ । ମାନସ ଫେବୃଆରି ୬ ତାରିଖରେ ଏକ ବାହାଘରରେ ଭିଡିଓ ସୁଟିଂ କରିବାକୁ ଯାଇଥିଲେ । ତା ପରଦିନ ସକାଳେ ଭୂବନେଶ୍ୱର ଫେରୁଥିବା ବେଳେ ଅଧାବାଟରୁ ତାଙ୍କୁ ଅପହରଣ କରି ଦୟାଲ ଆଶ୍ରମ ଆଣିଥିଲେ । ସେଠାରେ ଆଣି ତାଙ୍କୁ ପ୍ରବଳ ମାଡ଼ ମାରିଥିଲେ । ମାଡ଼ ମାରିବା ପରେ ସେଠାରେ ମାନସଙ୍କ ମୃତ୍ୟୁ ହୋଇଥିଲା । ଏହା ପରେ ତାଙ୍କ ମୃତଦେହକୁ ନେଇ ନୟାଗଡ଼ ବଧିପାଟଣା ପାହାଡ଼ ତଳେ ପୋତିଦେଇଥିଲେ ।