ଥାନାରେ ପହଞ୍ଚିଲା ଚୁଲି ଭାଙ୍ଗିବା ମାମଲା, ଏପଟେ କାର୍ଯ୍ୟାନୁଷ୍ଠାନ ଦାବି କଲେ ବିଜୟ
ପୁରୀ ଶ୍ରୀମନ୍ଦିର ରୋଷଘର ଚୁଲି ଭାଙ୍ଗିବା ଘଟଣା ଏବେ ଥାନାରେ ପହଞ୍ଚିଛି । ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏତଲା ଦିଆଯାଇଛି । ଦୋଷୀଙ୍କ ବିରୋଧରେ ଖୁବ ଶୀଘ୍ର କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳ କହିଛନ୍ତି । ସେପଟେ ଏହାକୁ କଡ଼ା ନିନ୍ଦା କଲେ ବରିଷ୍ଠ ନେତା ବିଜୟ ମହାପାତ୍ର । କିଏ ରୋଷ ଘର ଚୁଲି ଭାଙ୍ଗିଲା ସେ ନେଇ କାର୍ଯାନୁଷ୍ଠାନ ଦାବି କରିଛନ୍ତି ବିଜୟ ମହାପାତ୍ର । । ସେ ସାମ୍ବାଦିକ ସମ୍ମିଳନୀ କରି କହିଛନ୍ତି, ବ୍ରିଭାଟ ଓ ବିଶୃଙ୍ଖଳାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ । ଏହା ସହିତ ଯେଉଁମାନେ ଦାୟିତ୍ୱରେ ଅଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିଜୟ ।
ବିଜୟ ମହାପାତ୍ର କହିଛନ୍ତି, ବଡ଼ ଦେଉଳରେ ପୂର୍ବରୁ କେବେ ଏଭଳି ଘଟଣା ଘଟିନଥିଲା । ଏହା ଜଗନ୍ନାଥ ପ୍ରେମୀଙ୍କୁ ବହୁତ ଆଘାତ ଦେଇଛି । କିଭଳି ପ୍ରଶାସନ ସାମନାରେ ଏଭଳି ଘଟଣା ଘଟିଲା ତାକୁ ନେଇ ପ୍ରଶ୍ନ ଉଠାଇଛନ୍ତି ବିଜୟ । ରୋଷ ଘରେ ସିକ୍ୟୁରିଟି ଥିଲେ ଏଭଳି ଘଟି ନଥାନ୍ତା । ମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନ କୌଣସି ପଦକ୍ଷେପ ନନେଲେ ଅଧିକ ବିଳମ୍ବ ହେଲେ ଲୋକେ ବଡ଼ଦାଣ୍ଡକୁ ଓହ୍ଲାଇବେ ବୋଲି କହିଛନ୍ତି ବିଜୟ ମହାପାତ୍ର । ଶ୍ରୀମନ୍ଦିର ଐତିହ୍ୟ ପ୍ରକଳ୍ପ ପ୍ରସଙ୍ଗରେ ମଧ୍ୟ ବିଜୟ ମତ ରଖିଛନ୍ତି ।
କହିଛନ୍ତି, ନୀତିକାନ୍ତି ଓ ନିର୍ମାଣ କାର୍ଯ୍ୟରେ ବଡ଼ ବିଭ୍ରାଟ ହୋଇଛି । ସୁପ୍ରିମକୋର୍ଟଙ୍କ ରାୟକୁ ରାଜ୍ୟ ସରକାର ମାନୁନାହାନ୍ତି । ଶ୍ରୀମନ୍ଦିର ଚାରିପଟେ ଚାଲିଥିବା ନିର୍ମାଣ କାର୍ଯ୍ୟକୁ ନେଇ ଭକ୍ତଙ୍କ ମହଲରେ ଅସନ୍ତୋଷ ଥିବା ସତ୍ୱେ କିଭିଳି ଏଭଳି କାର୍ଯ୍ୟ କରାଯାଉଛି ତାକୁ ନେଇ ପ୍ରଶ୍ନ କରିଛନ୍ତି ବିଜୟ । ଏହି ମାମଲାରେ ଏଏସଆଇ ଏଯାବତ୍ ଚୁପ୍ ରହିଛି । ଏଏସଆଇର କୌଣସି ଅଧିକାରୀ ଏଯାଏଁ ଘଟଣା ସ୍ଥଳକୁ ଆସିନାହାନ୍ତି । ଯାହା ସବୁଠୁ ଦୁଃଖଦାୟକ । ମୁଖ୍ୟମନ୍ତ୍ରୀ ତୁରନ୍ତ ଘଟଣାର ଅନୁଧ୍ୟାନ କରନ୍ତୁ ବୋଲି କହିଛନ୍ତି ବିଜୟ ମହାପାତ୍ର । ।