ଭୁବନେଶ୍ବର; ଆଜି ହେଉଛି ଆଲୋକର ପର୍ବ ଦୀପାବଳି । ଦୀପ ଆଲୋକରେ ସଜେଇ ହେବ ଘର ଠାରୁ ବାହାର । ବିଶ୍ବାସ ରହିଛି ଯେ ଏହି ଦିନ ପିତୃପୁରୁଷଙ୍କୁ ଶ୍ରାଦ୍ଧ ଅର୍ପଣ କରାଗଲେ ସେମାନେ ମୁକ୍ତି ଲାଭ କରିଥାନ୍ତି । ପୌରାଣିକ କଥା ଅନୁଯାୟୀ ଖୁସିର ପର୍ବ, ଦୀପାବଳିରେ ଲଙ୍କା ଉପରେ ଭଗବାନ ରାମଙ୍କ ବିଜୟର ଉତ୍ସବକୁ ଆନନ୍ଦରେ ପାଳନ କରାଯାଏ | ତ୍ରେତୟା ଯୁଗରେ ପ୍ରଭୁ ରାମଚନ୍ଦ୍ର ୧୪ ବର୍ଷର ବନବାସ ଶେଷ କରି ମାତା ସୀତା ଏବଂ ଭ୍ରାତା ଲକ୍ଷ୍ମଣଙ୍କ ସହ ଅଯୋଧ୍ୟାକୁ ପ୍ରତ୍ୟାବର୍ତ୍ତନ କରିଥିଲେ । ପ୍ରଭୁ ରାମ ଅଯୋଧ୍ୟା ଫେରୁଥିବାରୁ ସମଗ୍ର ନଗରୀକୁ ମାଟି ଦୀପରେ ସଜାଇ ଆଲୋକିତ କରିଥିଲେ ଅଯୋଧ୍ୟାବାସୀ । ତେଣୁ ପ୍ରଭୁ ରାମଙ୍କର ପ୍ରତ୍ୟାଗମନକୁ ମନେ ରଖିବା ପାଇଁ ପ୍ରତି ବର୍ଷ ଦୀପାବଳି ପାଳନ କରାଯାଇଥାଏ ।
ଏହି ଉତ୍ସବର ଆଗମନରେ ସାରା ଦେଶ ପ୍ରଫୁଲିତ ହୋଇଥାଏ । ଆଜି ମା’ କାଳୀଙ୍କର ପୂଜା । ତେଣୁ ହିନ୍ଦୁ ରିତିନିତୀରେ ବିଧି ବିଧାନର ସହ ଆଜିର ଦିନକୁ ପାଳନ କରାଯାଇଥାଏ । ୨ବର୍ଷ ଧରି କୋଭିଡ୍ କଟକଣା ଯୋଗୁ ଦୀପାବଳି ପାଳନ ଉପରେ ବ୍ରେକ୍ ଲାଗିଥିଲା। ହେଲେ ଏଥର କଟକଣା ଉଠିଯାଇଥିବାରୁ ଲୋକଙ୍କ ମଧ୍ୟରେ ଦୀପାବଳି ପାଳନ ନିମନ୍ତେ ଦେଖିବାକୁ ମିଳିଛି ପ୍ରବଳ ଉତ୍ସାହ । ଲୋକଙ୍କ ଚାହିଦାକୁ ଦେଖି ଏଥର ବଜାରରେ ଭଳିକି ଭଳି ବାଣର ପସରା ମେଲିଛି । ତେବେ ଗ୍ରୀନ କ୍ରାକରକୁ ଅଧିକ ଗୁରୁତ୍ୱ ମିଳୁଛି । ଯେହେତୁ ୧୨୫ ଡେସିବିଲ୍ରୁ ଅଧିକ ଶବ୍ଦର ବାଣ ଉପରେ ପ୍ରତିବନ୍ଧକ ଲାଗିଛି ତେଣୁ ଚାଇନା ବମ୍ ଓ ତାଳଫୋଟକା ଭଳି ବାଣ ବଜାରରୁ ଦେଖିବାକୁ ମିଳୁନି ।