ଯାଜପୁର: ଯାଜପୁର ବାଣ ବିସ୍ଫୋରଣ ଘଟଣାରେ କଟକ ବଡ଼ ମେଡିକାଲରେ ଗୁରୁତରଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି। ଯାଜପୁର ଜିଲ୍ଲା ବାସୁଦେବପୁର ଜାଲପୁର ଗାଁରେ ଘଟିଥିଲା ଭୟାବହ ବାଣ ବିସ୍ଫୋରଣ।ଏଥିରେ ୪ ଜଣ ଆହତ ହୋଇଥିଲେ। ୨ ବୟସ୍କଙ୍କ ସମେତ ୨ ଜଣ ଶିଶୁ ଆହତ ହୋଇଥିଲେ।
ସୂଚନା ମୂତାବକ ଗତକାଲି ଯାଜପୁର ଟାଉନ ଥାନା ଜାଲପୁର ଗାଁରେ ଥିବା ଏକ ବେଆଇନ ବାଣ କାରଖାନାରେ ଭୟଙ୍କର ବିସ୍ଫୋରଣ ଘଟିଥିଲା। ଗାଁର ନିଶିକାନ୍ତ ପତି ନାମକ ଜଣେ ବ୍ୟକ୍ତି ଦୀର୍ଘ ଦିନ ହେବ କିଛି ଲୋକଙ୍କୁ ଲଗାଇ ନିଜ ଘରେ ବାଣ କାରଖାନା ଚଳାଉଥିଲେ। ହଠାତ୍ କୌଣସି କାରଣ ବଶତଃ ଗତକାଲି ବାଣ ଭିଡୁଥିବାବେଳେ ବିସ୍ଫୋରଣ ଘଟିଥିଲା। ଫଳରେ ୪ ଜଣ ବ୍ୟକ୍ତି ଗୁରୁତର ଆହତ ହୋଇଥିଲେ। ସେମାନଙ୍କୁ ତୁରନ୍ତ ଉଦ୍ଧାର କରି କଟକ ବଡ ମେଡିକାଲକୁ ପଠାଯାଇଥିଲା। ମାତ୍ର ଚିକିତ୍ସାଧୀନ ଅବସ୍ଥାରେ ଜଣଙ୍କର ମୃତ୍ୟୁ ଘଟିଛି। ମୃତ ଶ୍ରମିକ ଜଣକ ହେଲେ ସ୍ଥାନୀୟ ଯୁବକ ବାଦଲ ପାତ୍ର।
ବାଦଲ ବାଣ ଭିଡୁଥବା ବେଳେ ହଠାତ୍ ବିସ୍ପୋରଣ ଘଟିଥିଲା। ବାଣ ତିଆରିରେ ଲାଗିଥିବା ଶ୍ରମିକ ଓ କର୍ମଚାରୀ ମାନେ ଗୁରୁତର ହୋଇପଡିଥିଲେ। ବିସ୍ଫୋରଣର ମାତ୍ରା ଏତେ ଅଧିକ ଥିଲା ଯେ ଘରର ଛାତ ସଂପୁର୍ଣ୍ଣ ଉଡିଯାଇଥିଲା। ଗୁରୁତର ଅବସ୍ଥାରେ ବାଦଲ, ନଳିନୀକାନ୍ତ ପତି, ନାରାୟଣ ବେହେରାଙ୍କୁ ପ୍ରଥମେ ଯାଜପୁର ମୁଖ୍ୟ ଡାକ୍ତରଖାନାରେ ଭର୍ତି କରାଯାଇଥିଲା। ସେଠାରୁ ପ୍ରାଥମିକ ଚିକିତ୍ସା ପରେ ବାଦଲଙ୍କୁ କଟକ ସ୍ଥାନାନ୍ତର କରାଯାଇଥିଲା। ଅନ୍ୟ ଦୁଇ ଜଣଙ୍କ ଅବସ୍ଥା ଗୁରୁତର ଥିବା ବେଳେ ବିସ୍ଫୋରଣ ସ୍ଥଳ ନିକଟରେ କାମ କରୁଥିବା ଦୁଇ ଜଣ ଶ୍ରମିକ ମଧ୍ୟ ଛାତରୁ ଖସି ପଡି ଆହତ ହୋଇଥିବା ଜଣାପଡିଛି।