ନୂଆଦିଲ୍ଲୀ: କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ ଫାସ୍ ଟ୍ୟାଗ୍କୁ ନେଇ ବୁଧବାର ଏକ ବଡଘୋଷଣା କରିଛନ୍ତି। ବଦଳିଛି ଫାସ୍ ଟ୍ୟାଗ୍ ନିୟମ । ଅଗଷ୍ଟ ୧୫ରୁ ବାର୍ଷିକ ଫାସ୍ ଟ୍ୟାଗ୍ ବ୍ୟବସ୍ଥା ହେବ। ଏଣିକି ବାର୍ଷିକ ୩ ହଜାର ଟଙ୍କା ଦେଇ ପାଇ ପାରିବେ ସୁବିଧା। ବର୍ଷେ କିମ୍ବା ୨୦୦ ଟ୍ରିପ୍ ପର୍ଯ୍ୟନ୍ତ ବାର୍ଷିକ ଫାସ୍ ଟ୍ୟାଗ୍ ବ୍ୟବସ୍ଥା ଲାଗୁ ହେବ। କେବଳ ଘରୋଇ ଗାଡି ଚାଳକଙ୍କ ପାଇଁ ଏହି ନିୟମ ଲାଗୁ ହେବ। କାର୍, ଜିପ୍, ଭ୍ୟାନ୍ ପରି ଛୋଟ ଯାନ ପାଇଁ ପାସ୍ ବ୍ୟବସ୍ଥା ହେବ। ରାଜମାର୍ଗ ଯାତ୍ରା ଆପ୍, ଅଫିସିଆଲ ୱେବସାଇଟରେ ତଥ୍ୟ ରହିବ। ଏନେଇ ଏକ୍ସରେ ସଡକ ପରିବହନ ମନ୍ତ୍ରୀ ନୀତିନ ଗଡକରୀ ସୂଚନା ଦେଇଛନ୍ତି। ଫାଷ୍ଟାଗ୍ର ଏହି ସୁବିଧା ଅଣ-ବାଣିଜ୍ୟିକ ଯାନବାହନକୁ ଧ୍ୟାନରେ ରଖି ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଛି ଯାହା ଦ୍ୱାରା ଜାତୀୟ ରାଜପଥରେ ସୁଗମ ଯାତ୍ରା ସୁନିଶ୍ଚିତ ହୋଇପାରିବ।
ଏନେଇ କେନ୍ଦ୍ର ମନ୍ତ୍ରୀ ନୀତିନ ଗଡକରୀ କହିଛନ୍ତି ଯେ ଏନଏଚଏଆଇ ଏବଂ ଏମଓଆରଟିଏଚ ଏବଂ ‘ହାଇୱେ ଟ୍ରାଭେଲ୍ ଆପ୍’ର ୱେବସାଇଟ୍ରେ ଏହି ପାସ୍ ପାଇଁ ଏକ ପୃଥକ ଲିଙ୍କ୍ ଖୁବ୍ଶୀଘ୍ର ଉପଲବ୍ଧ କରାଯିବ, ଯାହା ପାସ୍ର ସକ୍ରିୟକରଣ ଏବଂ ନବୀକରଣକୁ ସରଳ ଏବଂ ସୁବିଧାଜନକ କରିବ।
ନୂତନ ବାର୍ଷିକ ପାସ୍ ନୀତି ୬୦ କିଲୋମିଟର ପରିଧି ମଧ୍ୟରେ ଅବସ୍ଥିତ ଟୋଲ୍ ପ୍ଲାଜା ବିଷୟରେ ଦୀର୍ଘକାଳୀନ ଚିନ୍ତାକୁ ଦୂର କରିବ ଏବଂ ଏକକ ସୁଲଭ କାରବାର ମାଧ୍ୟମରେ ଟୋଲ୍ ପେମେଣ୍ଟକୁ ସୁଗମ କରିବ। ପୂର୍ବ ଅପେକ୍ଷା ସମୟ ହ୍ରାସ ଓ ଭିଡ଼ ହ୍ରାସ କରିବା ସହ ଟୋଲ୍ ପ୍ଲାଜାରେ ବିବାଦକୁ କମ କରିବ। ବାର୍ଷିକ ପାସ୍ ନୀତି ଲକ୍ଷ ଲକ୍ଷ ବ୍ୟକ୍ତିଗତ ଯାନ ଚାଳକଙ୍କୁ ବଡ଼ ଆଶ୍ୱସ୍ତି ପ୍ରଦାନ କରିବ ବୋଲି ଆଶା କରାଯାଉଛି ଏହା ସେମାନଙ୍କ ଯାତ୍ରାକୁ ମଧ୍ୟ ତ୍ୱରାନ୍ୱିତ କରିବ ଏବଂ ଏକ ଉତ୍ତମ ଅଭିଜ୍ଞତା ପ୍ରଦାନ କରିବ ବୋଲି ମନ୍ତ୍ରୀ ମତ ରଖିଛନ୍ତି।