ନୂଆଦିଲ୍ଲୀ; ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ଚଳିତ ମାସ ଆରମ୍ଭରେ ଘୋଷଣା କରିଥିଲା ଯେ ଖୁବ୍ ଶୀଘ୍ର ଡିଜିଟାଲ୍ ବ୍ୟବହାର (ଇ-ରୂପୀ) ର ପାଇଲଟ୍ ଲଞ୍ଚ ଆରମ୍ଭ ହେବ। ବର୍ତ୍ତମାନ ଆରବିଆଇର ନିଜସ୍ୱ ଡିଜିଟାଲ୍ ମୁଦ୍ରା ବାସ୍ତବରେ ପରିଣତ ହେବାକୁ ଯାଉଛି | କେନ୍ଦ୍ରୀୟ ବ୍ୟାଙ୍କ ଡିଜିଟାଲ କରେନ୍ସିକୁ ନେଇ ଭାରତୀୟ ରିଜର୍ଭ ବ୍ୟାଙ୍କ ତତ୍ପରତା ପ୍ରକାଶ କରିଛି । କେନ୍ଦ୍ରୀୟ ବ୍ୟାଙ୍କ ପକ୍ଷରୁ ହୋଲସେଲ ସେଗମେଣ୍ଟରେ ଡିଜିଟାଲ ମୁଦ୍ରା ବା ଇ-ଟଙ୍କାର ପାଇଲଟ୍ ପରୀକ୍ଷଣ ଆଜିଠୁ ଆରମ୍ଭ ହେଉଛି । ସ୍ୱତନ୍ତ୍ର ବ୍ୟବହାର ପାଇଁ ଏହାକୁ ଉପଯୋଗ କରାଯିବ ବୋଲି ଜଣାପଡ଼ିଛି । ଏହି କରେନ୍ସିର ନାଁ ରହିଛି ସିବିଡିସି-ହୋଲସେଲ ବା ‘ଇ ରୁପି-ଡବ୍ୟୁ’ ।
ସୂଚନା ଅନୁସାରେ, ପାଇଲଟ୍ ପରୀକ୍ଷଣରେ ସେକେଣ୍ଡାରୀ ମାର୍କେଟ ସେଟେଲମେଣ୍ଟ ପାଇଁ ଡିଜିଟାଲ ମୁଦ୍ରାକୁ ସରକାରୀ ସିକ୍ୟୁରିଟିଜ୍ ଟ୍ରାଞ୍ଜାକ୍ସନ ଲାଗି ବ୍ୟବହାର କରାଯିବ । ଅକ୍ଟୋବର ୩୧ରେ ଆରବିଆଇ ପକ୍ଷରୁ ଜାରି ଏକ ବିଜ୍ଞପ୍ତିରୁ ଏହା ଜଣାପଡ଼ିଛି । ପାଇଲଟ୍ ପରୀକ୍ଷଣରେ ୯ଟି ପ୍ରମୁଖ ବ୍ୟାଙ୍କ ଅଂଶଗ୍ରହଣ କରିବେ ।
ବ୍ୟାଙ୍କଗୁଡ଼ିକ ହେଲା, ଭାରତୀୟ ଷ୍ଟେଟ୍ ବ୍ୟାଙ୍କ, ବ୍ୟାଙ୍କ ଅଫ୍ ବରୋଦା, ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ, ଏଚ୍ଡିଏଫ୍ସି ବ୍ୟାଙ୍କ, ଆଇସିଆଇସିଆଇ ବ୍ୟାଙ୍କ, କୋଟାକ ମହିନ୍ଦ୍ରା ବ୍ୟାଙ୍କ, ୟେସ୍ ବ୍ୟାଙ୍କ, ଆଇଡିଏଫ୍ସି ଫାର୍ଷ୍ଟ ବ୍ୟାଙ୍କ ଏବଂ ଏଚଏସ୍ବିସି । ଇ-ରୁପି-ଡବ୍ଲ୍ୟୁ ଆନ୍ତଃ-ବ୍ୟାଙ୍କ ବଜାରକୁ ଅଧିକ ଦକ୍ଷ କରିବ । କେନ୍ଦ୍ରୀୟ ବ୍ୟାଙ୍କର ଇ-ରୁପିରେ ସେଟେଲ୍ମେଣ୍ଟ ଦ୍ୱାରା ଟ୍ରାଞ୍ଜାକ୍ସନ ଖର୍ଚ୍ଚ କମିବ । କାରଣ ସେଟେଲ୍ମେଣ୍ଟ ରିସ୍କ କମ୍ କରିବା ପାଇଁ ସେଟେଲ୍ମେଣ୍ଟ ଗ୍ୟାରେଣ୍ଟି ଭିତ୍ତିଭୂମି କିମ୍ବା ବନ୍ଧକର ଆବଶ୍ୟକତା ପଡ଼ିବ ନାହିଁ । ପାଇଲଟ୍ ପରୀକ୍ଷଣ ମଙ୍ଗଳବାରଠାରୁ ଆରମ୍ଭ ହେବ । ରିଟେଲ ସିବିଡିସିକୁ ସମସ୍ତେ ବ୍ୟବହାର କରିପାରିବେ ।