ନ୍ୟୁଜ୍ ବ୍ୟୁରୋ: ଭେନେଜୁଏଲାର ବିରୋଧୀ ଦଳ ନେତା ମାରିଆ କୋରିନା ମାଚାଡୋ ନୋବେଲ ଶାନ୍ତି ପୁରସ୍କାର ବିଜୟୀ ହୋଇଛନ୍ତି। ଭେନେଜୁଏଲାରେ ଗଣତନ୍ତ୍ର ଏବଂ ଲୋକଙ୍କ ଅଧିକାର ପାଇଁ ନିଜ ଜୀବନକୁ ଉତ୍ସର୍ଗ କରିଦେଇଛନ୍ତି ମାରିଆ। ଭେନେଜୁଏଲାରେ ଏକଚ୍ଛତ୍ରବାଦୀ ଶାସନ ପରିବର୍ତ୍ତେ ଗଣତନ୍ତ୍ର ପ୍ରତିଷ୍ଠା ପାଇଁ ତାଙ୍କର ନିରବଚ୍ଛିନ୍ନ କାର୍ଯ୍ୟ ପାଇଁ ସେ ଏହି ପୁରସ୍କାର ପାଇଁ ଯୋଗ୍ୟ ବିବେଚିତ ହୋଇଛନ୍ତି।
ମାରିଆଙ୍କ ନାମ ଘୋଷଣା ହେବା ପରେ ସେ ଆଶ୍ଚର୍ଯ୍ୟ ହୋଇଥିବା କହିଛନ୍ତି। ନୋବେଲ କମିଟି ମଧ୍ୟ ପୁରସ୍କାର ଘୋଷଣା ସମୟରେ ତାଙ୍କ କାର୍ଯ୍ୟକୁ ଭୁରି ଭୁରି ପ୍ରଶଂସା କରିଛନ୍ତି। ଗଣତନ୍ତ୍ର ପ୍ରତିଷ୍ଠା ଦିଗରେ ମାରିଆଙ୍କ ଶାନ୍ତିପୂର୍ଣ୍ଣ ଆନ୍ଦୋଳନ ସତ୍ବେ ତାଙ୍କ ଜୀବନ ପ୍ରତି ବହୁ ବିପଦ ରହିଥିଲା। କିନ୍ତୁ ସେ ଦେଶ ଛାଡ଼ି ନ ଥିଲେ। ଯାହା ଦେଶବାସୀଙ୍କୁ ବେଶ୍ ପ୍ରେରଣା ଯୋଗାଇଥିଲା। ତାଙ୍କ ସମର୍ଥକମାନଙ୍କ ମନୋବଳ ବୃଦ୍ଧି କରିଥିଲା। ଦେଶରେ ଏକଚ୍ଛତ୍ରବାଦ ଶାସନ ହଟାଇ ଗଣତନ୍ତ୍ର ପ୍ରତିଷ୍ଠା ଦିଗରେ ମାରିଆଙ୍କ ଶାନ୍ତିପୂର୍ଣ୍ଣ ଉଦ୍ୟମ ପ୍ରଶଂସନୀୟ, ଯେଉଁଥିପାଇଁ ତାଙ୍କୁ ଏହି ସର୍ବୋଚ୍ଚ ସମ୍ମାନ ପ୍ରଦାନ କରାଯାଇଛି।
ନୋବେଲ ଶାନ୍ତି ପୁରସ୍କାର ନରୱେ କେବଳ ଏକ ପୁରସ୍କାର ଅଟେ ଯାହାକି ନରୱେରେ ପ୍ରଦାନ କରାଯାଇଥାଏ। ଅନ୍ୟ ଚାରୋଟି ପୁରସ୍କାର ସ୍ବିଡେନର ଷ୍ଟକହୋମରେ ପ୍ରଦାନ କରାଯାଇଥାଏ। ସୋମବାର ଚିକିତ୍ସା କ୍ଷେତ୍ରରେ, ମଙ୍ଗଳବାରରେ ପଦାର୍ଥ ବିଜ୍ଞାନ, ବୁଧବାର ଦିନ ରସାୟନ ବିଜ୍ଞାନ, ଗୁରୁବାର ଦିନ ସାହିତ୍ୟକ୍ଷେତ୍ର ପାଇଁ ନୋବେଲ ପୁରସ୍କାର ବିଜେତାଙ୍କର ନାମ ଘୋଷଣା କରାଯାଇଥିଲା। ତେବେ ମାରିଆଙ୍କୁ ନୋବେଲ ଶାନ୍ତି ପୁରସ୍କାର ମିଳିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନିରାଶ ହେବାକୁ ପଡ଼ିଛି। ଡୋନାଲ୍ଡ ଟ୍ରମ୍ପ ଗାଜାରେ ଶାନ୍ତି ସ୍ଥାପନା କରିବାର ଦାବି କରିଥିଲେ। ମାତ୍ର ନୋବେଲ କମିଟିର ସଦସ୍ୟ ବହୁ ସମୟ ଧରି ଟ୍ରମ୍ପଙ୍କ ଗତି ବିଧି ଉପରେ ନଜର ରଖିଥିଲେ। ଡୋନାଲଡ ଟ୍ରମ୍ପ ବହୁ ଆନ୍ତର୍ଜାତିକ ସ୍ତରରେ ବୈଦେଶିକ ନୀତିରେ ହସ୍ତକ୍ଷେପ କରି ବ୍ୟକ୍ତିଗତ ଶ୍ରେୟ ନେଇଛନ୍ତି। ଯାହା ତାଙ୍କୁ ନୋବେଲ ଶାନ୍ତି ପୁରସ୍କାର ଠାରୁ ବହୁ ଦୂର କରିଛି।