ନ୍ୟୁଜ୍ ବ୍ୟୁରୋ: ମହାନଦୀ ଜଳ ବିବାଦ ସମାଧାନ ପାଇଁ ଗଠିତ ଟ୍ରିବ୍ୟୁନାଲର ଅବଧିକୁ କେନ୍ଦ୍ର ସରକାର ଆହୁରି ବଢ଼ାଇଛନ୍ତି। ନୂତନ ନିଷ୍ପତ୍ତି ଅନୁସାରେ, ଟ୍ରିବ୍ୟୁନାଲର ମେୟାଦ ୨୦୨୭ ଜାନୁଆରୀ ୧୩ ପର୍ଯ୍ୟନ୍ତ ବୃଦ୍ଧି କରାଯାଇଛି। ଏହା ସମ୍ପର୍କରେ ଜଳ ସମ୍ପଦ, ନଦୀ ବିକାଶ ଓ ଗଙ୍ଗା ସଂରକ୍ଷଣ ମନ୍ତ୍ରାଳୟ ପକ୍ଷରୁ ବିଜ୍ଞପ୍ତି ଜାରି ହୋଇଛି। ପୂର୍ବତନ ଅବଧି ଏପ୍ରିଲ ୧୪ରେ ସମାପ୍ତ ହେବାକୁ ଥିଲା। କିନ୍ତୁ ବିବାଦ ନିରାକରଣ ଶେଷ ପର୍ଯ୍ୟାୟରେ ଥିବାରୁ ଅବଧି ବଢ଼ାଇବା ଆବଶ୍ୟକ ହୋଇଥିଲା।
ମହାନଦୀ ଜଳ ବଣ୍ଟନକୁ ନେଇ ଓଡ଼ିଶା ଓ ଛତିଶଗଡ଼ ମଧ୍ୟରେ ଦୀର୍ଘଦିନ ଧରି ବିବାଦ ଚାଲିଆସୁଛି। ୨୦୧୮ ମସିହାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଏହି ଟ୍ରିବ୍ୟୁନାଲ ଗଠିତ ହୋଇଥିଲା। ଟ୍ରିବ୍ୟୁନାଲ ଏପର୍ଯ୍ୟନ୍ତ ୪୯ଟି ଶୁଣାଣି ସମାପ୍ତ କରିଛି ଏବଂ ବର୍ତ୍ତମାନ ଶେଷ ପର୍ଯ୍ୟାୟରେ ପହଞ୍ଚିଛି। ଦୁଇ ରାଜ୍ୟ ମଧ୍ୟରେ ଆଲୋଚନା ମାଧ୍ୟମରେ ସମାଧାନ ମିଳିବା ନେଇ ଆଶା ରହିଛି, ଯଦିଓ ଏପର୍ଯ୍ୟନ୍ତ କୌଣସି ସମ୍ମତି ହୋଇନାହିଁ। ଏହି ପରିସ୍ଥିତିରେ ଓଡ଼ିଶା ସରକାର ଅବଧି ବଢ଼ାଇବା ପାଇଁ ଅନୁରୋଧ କରିଥିଲେ, ଯାହାକୁ କେନ୍ଦ୍ର ସରକାର ମନୋନୀତ କରି ଆଉ ୯ ମାସ ପର୍ଯ୍ୟନ୍ତ ଟ୍ରିବ୍ୟୁନାଲର ସମୟସୀମା ବଢ଼ାଇଛନ୍ତି।