ଆମେରିକା: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଝିଅ ଇଭାଙ୍କା ଟ୍ରମ୍ପଙ୍କୁ ହତ୍ୟା କରିବା ପାଇଁ ଏକ ଷଡ଼ଯନ୍ତ୍ର ରଚାଯାଇଥିବା ଅଭିଯୋଗ ଏବେ ଆମେରିକାରେ ଚର୍ଚ୍ଚାର ବିଷୟ ହୋଇଛି। ଆମେରିକୀୟ ମାଧ୍ୟମ ରିପୋର୍ଟ ଅନୁସାରେ, ଇରାନର ଇସଲାମିକ୍ ରିଭୋଲ୍ୟୁସନରୀ ଗାର୍ଡ କର୍ପସ (IRGC) ସହ ସଂଯୋଗ ଥିବା ଜଣେ ଇରାକୀ ସନ୍ଦିଗ୍ଧଙ୍କୁ ଗିରଫ କରାଯାଇଛି। ତଦନ୍ତକାରୀ ସଂସ୍ଥା ଅନୁଯାୟୀ, ୩୨ ବର୍ଷୀୟ ମହମ୍ମଦ ବାକର ସାଦ ଦାଉଦ ଅଲ-ସାଦି ନାମକ ବ୍ୟକ୍ତି ସୋଲେମାନୀଙ୍କ ମୃତ୍ୟୁର ପ୍ରତିଶୋଧ ନେବାକୁ ଚାହୁଁଥିଲେ। ୨୦୨୦ ମସିହାରେ ଆମେରିକାର ଡ୍ରୋନ୍ ଆକ୍ରମଣରେ ଇରାନୀ କମାଣ୍ଡର କାସେମ ସୋଲେମାନୀ ନିହତ ହୋଇଥିଲେ। ଅଭିଯୋଗ ଅନୁସାରେ, ଅଲ-ସାଦି IRGC ସହ ଜଡିତ ଥିଲେ ଏବଂ ଆମେରିକାରେ ପ୍ରବେଶ କରି ଇଭାଙ୍କାଙ୍କୁ ଟାର୍ଗେଟ କରିଥିଲେ।
ତଦନ୍ତକାରୀମାନେ ସନ୍ଦିଗ୍ଧଙ୍କ ପାଖରୁ ଇଭାଙ୍କା ଟ୍ରମ୍ପଙ୍କ ଫ୍ଲୋରିଡା ଘରର ବ୍ଲୁପ୍ରିଣ୍ଟ ଜବତ କରିଥିବା ଦାବି କରିଛନ୍ତି। ସେ କିଛି ସମୟ ଧରି ଇଭାଙ୍କାଙ୍କ ଚଳାଚଳ ଉପରେ ନଜର ରଖୁଥିବା ବେଳେ ସୁରକ୍ଷା ଏଜେନ୍ସିମାନଙ୍କ ସନ୍ଦେହ ହେବା ପରେ ତାଙ୍କୁ ଗିରଫ କରାଯାଇଥିଲା।
ୱାଶିଂଟନରେ ଇରାକୀ ଦୂତାବାସର ପୂର୍ବତନ ଡେପୁଟି ମିଲିଟାରୀ ଆଟାଚି ଆଣ୍ଟିଫାଦ କାନବାର ମଧ୍ୟ କହିଛନ୍ତି ଯେ, ସୋଲେମାନୀଙ୍କ ମୃତ୍ୟୁ ପରଠାରୁ ଅଲ-ସାଦି ଟ୍ରମ୍ପ ପରିବାର ଉପରେ ପ୍ରତିଶୋଧ ନେବାକୁ ଚାହୁଁଥିଲେ। ତେବେ ଏହି ମାମଲାରେ ଇରାନ ସରକାର କିମ୍ବା IRGC ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଆସିନାହିଁ। ଆମେରିକୀୟ ଏଜେନ୍ସିମାନେ ଘଟଣାର ଅଧିକ ତଦନ୍ତ ଜାରି ରଖିଛନ୍ତି।