ଭୁବନେଶ୍ବର: ମାଆ ମୁଁ ୫ ମିନିଟରେ ଆସୁଛି..ଏତିକି କହି ରାଜା ଯାଇଛି ଯେ ଯାଇଛି …। ରାଜଧାନୀର ମୁକୁଳା ଡ୍ରେନ ରାଜାକୁ ସବୁଦିନ ପାଇଁ ଭସାଇନେଇଛି । ୧୯ ଘଂଟା ଧରି ପାଣି ଭିତରେ ପୁଅକୁ ଖୋଜାଚାଲିଥିଲା, ଏପଟେ ମାଆ ଅନ୍ଧ ଲଉଡିର ଆସିବା ବାଟକୁ ଚାହିଁ ରହିଥିଲା । ରାତି ପାହିଗଲା.. ହେଲେ ସକାଳୁ ରାଜଧାନୀର ଛାତି ଉପରୁ ମାଆ ପାଖକୁ ଆସିଲା ଛାତିଥରା ଖବର। ପୁଅ ଆଉ ନାହିଁ…ରାଜା ଆଉ ନାହିଁ..। ରାଜଧାନୀର ମୁକୁଳା ଡ୍ରେନ ରାଜାର ଜୀବନ ନେଇଯାଇଛି।
ମରଣଯନ୍ତା ପାଲଟିଛି ରାଜଧାନୀର ମୁକୁଳା ଡ୍ରେନ । ଗୋଟେ ପଟେ ଗୋଟେ ମୁଣ୍ଡ ନେଉଛି । କିନ୍ତୁ ବିଏମସି ବିଛଣାରୁ ଉଠୁନି । କେବଳ ଏହା ଗୋଟିଏ ଘଟଣା ନୁହେଁ ଏହା ପୂର୍ବରୁ ବର୍ଷା ଦିନେ ଅନେକଙ୍କ ଏଭଳି ଅସଜଡା ଡ୍ରେନରେ ଜୀବନ ଯାଇଛି । ନେତା ଯାଉଛନ୍ତି, ମନ୍ତ୍ରୀ ଯାଉଛନ୍ତି ଆଶ୍ୱସନା ଦେଉଛନ୍ତି । ମୁକୁଳା ଡ୍ରେନର ମରାମତି କରାଯିବ ଆଗକୁ ଯେମିତି ଏପରି ଅଘଟଣର ପୁନରାବୃତ୍ତି ନହୁଏ ପ୍ରତିଶ୍ରୁତି ଦେଉଛନ୍ତି । କିନ୍ତୁ କିଛି ଦିନ ଗଲା ପରେ ପୁଣି ସବୁ ଭୁଲି ଯାଉଛନ୍ତି । ପାଣିର ଗାର ପରି ଏମାନଙ୍କ ପ୍ରତିଶ୍ରୁତି ବି ବର୍ଷାରେ ଧୋଇହୋଇଯାଉଛି।
ଦଶମ ଶ୍ରେଣୀର ପଢୁଥିବା ୧୫ ବର୍ଷର ପୁଅକୁ ହରାଇବା ପରେ ଏବେ ବାପା, ମାଆଙ୍କ ହୃଦୟ ଫାଟିପଡୁଛି । ଆଖିରେ ଲୁହ ରହୁନି । କାନ୍ଦ ବୋବାଳିରେ ଫାଟି ପଟୁଛି ଘର । ପୁଅ ହରାଇବା ଖବର ଶୁଣି ମାଆ ବାରମ୍ବାର ବେହୋସ ହୋଇଯାଇଛି । ମୋ ଧନକୁ ଫେରାଇଆଣ ବୋଲି ଅଳି କରୁଛି । ଭୁବନେଶ୍ୱର ଶତାଦ୍ଦୀ ନଗରରେ ଛୋଟବେଳୁ ବଢିଆସିଥିବା ରାଜାକୁ ସମସ୍ତେ ଜାଣନ୍ତି । ତେଣୁ ଏକ ନିଶ୍ୱାସ ବନ୍ଦ ହେଲା ଭଳି ଖବର ସ୍ଥାନୀୟ ଅଂଚଳକୁ ସ୍ତବ୍ଧ କରିଦେଇଛି।
ମୃତ୍ୟୁର ଆଭାସ ମିଳିଲା ପରି ରାଜା ଯେତେବେଳେ କାଲି ଅପରାହ୍ନରେ ଟିଉସନ ଯିବା ପାଇଁ ବାହରିଥିଲା ମାଆ ମନା କରିଥିଲେ । ପ୍ରବଳ ବର୍ଷା ପାଇଁ ପୁଅ ଘରୁ ବାହାରିବାକୁ କହିଲା ବେଳେ ମାଆ କହିଥିଲେ ନା ତୁ ଆଜି ଟିଉସନ ଯାଆନି । ହେଲେ ମନା କରିବା ସତ୍ୱେ ୫ ମିନିଟରେ ସାଂଗେ ସାଂଗେ ଆସୁଛି କହି ରାଜା ଘରୁ ବାହାରିପଡିଥିଲା । ହେଲେ ସେ କଣ ଜାଣିଥିଲା ବାଟରେ ତାକୁ ଜଗିକି ରହିଛି ମୃତ୍ୟୁ । ବର୍ଷା ପାଇଁ ରାସ୍ତା ଓ ଡ୍ରେନ ଜଣାପଡିନଥିବାରୁ ଗଣ୍ଡମୁଣ୍ଡା ମୁଖ୍ୟ ନାଳର ସ୍ରୋତରେ ପଡିଯାଇଥିଲା ରାଜା । ସାଇକେଲ ସିନା ରହିଯାଇଥିଲା ହେଲେ ଆଖି ପିଛୁଳାକେ ରାଜା ପାଣିର ସୁଅରେ ଭାସିଯାଇଥିଲା।
ଗତକାଲି ଅପରାହ୍ନଠୁ ରାତି ଯାଏ ଅଗ୍ନିଶମ ବାହିନୀର ୪୦ ଜଣିଆ ଟିମ ବହୁ ଖୋଜାଖୋଜି ପରେ ରାଜାକୁ ପାଇନଥିଲେ । ରାତିର ଅନ୍ଧାର ଯୋଗୁଁ ଖୋଜିବା ମଧ୍ୟ କଷ୍ଟକର ହୋଇପଡିଥିଲା। ଏହା ପରେ ଆଜି ସକାଳୁ ପୁଣି ଆରମ୍ଭ ହୋଇଥିଲା ସର୍ଚ୍ଚ ଅପରେସନ । ବହୁ ଖୋଜାଖୋଜି ଶେଷରେ ୧୦ଟା ବେଳେ ପଞ୍ଚସଖା ଅଂଚଳ ନିକଟ ନାଳରୁ ରାଜାର ମୃତଦେହ ମିଳିଥିଲା।
ରାଜାର ମୃତ୍ୟୁ କେବଳ ତା ମାଆ ବାପାଙ୍କ କୋଳକୁ ଖାଲି କରିଦେଇନି; ପୁରା ରାଜଧାନୀବାସୀଙ୍କ ଦୋହଲାଇଦେଇଛି । ସମସ୍ତଙ୍କ ମନରେ ଅନେକ ପ୍ରଶ୍ନ ଉଙ୍କି ମାରୁଛି ଯାହାର ଉତ୍ତର ନାହିଁ । ୬ ବର୍ଷ ମଧ୍ୟରେ ଏଭଳି ମୁକୁଳା ଡ୍ରେନରେ ଅନେକ ଜୀବନ ଗଲାଣି । ୨୦୧୫ ଅଗଷ୍ଟ ୨୬ରେ ସମାନ ଭାବରେ ସ୍ମାର୍ଟ ସିଟିର ଏମିତି ମୁକୁଳା ଡ୍ରେନ ଭିତରେ ଜଣେ ୯ ବର୍ଷର ବାଳକ ଭାସିଯାଇଥିଲେ । ନୟାପଲ୍ଲୀ ବେହେରା ସାହି ନିକଟରେ ମୁକୁଳା ପଡିଥିବା ଡ୍ରେନ ଛାତ୍ରଙ୍କ ପାଇଁ କାଳ ସାଜିଥିଲା । ସେହିପରି ୨୦୧୭ରେ ଜଣେ ଟ୍ୟୁସନ ସାର , ୨୦୧୮ରେ ଜଣେ ଛୋଟ ପିଲା ମଧ୍ୟ ହୁଗୁଳା ଡ୍ରେନରେ ଭାସିଯାଇଥିଲେ।
ସେହିପରି ୨୦୧୯ରେ ମଧ୍ୟ ମୁକୁଳା ଡ୍ରେନ ଯୋଗୁଁ ନୟାପଲ୍ଲୀ ସାଲିଆସାହି ଏକାମ୍ର ଭିଲ୍ଲା ନିକଟରେ ଜଣେ ବୃଦ୍ଧା ଭାସିଯାଇ ତାଙ୍କର ମୃତ୍ୟୁ ହୋଇଥିଲା । ତେବେ ସ୍ମାର୍ଟ ସିଟିରେ ବାରମ୍ବାର ଏଭଳି ଘଟଣା ଘଟିବା ପ୍ରଶାସନର ପାରିବାପଣିଆକୁ ପୁଣି ଥରେ ପଦାରେ ପକାଇଛି।