ଏରସମାକୁ ଆଖେଇଛନ୍ତି ଦାମ, ଏପଟେ ହାତ ଛାଡିଲେଣି ଘନିଷ୍ଠ

ଭୁବନେଶ୍ୱର: ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢିବାକୁ ସଜବାଜ ହେଉଛନ୍ତି ବିଜେଡିରୁ ବିଦା ହୋଇଥିବା ପୂର୍ବତନ ମନ୍ତ୍ରୀ ଡାକ୍ତର ଦାମୋଦର ରାଉତ । ତେବେ ପାରାଦୀପ ନୁହେଁ, ଏରସମା ବାଲିକୁଦା ନିର୍ବାଚନ ମଣ୍ଡଳୀ ଉପରେ ତାଙ୍କର ଆଖି ରହିଛି । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ଦାମ ବାବୁଙ୍କୁ ଜିତାଇବା ଲାଗି କଂଗ୍ରେସ ପ୍ରାର୍ଥୀ ଦେଇନପାରେ । ବାମ ଦଳ ପକ୍ଷରୁ ମଧ୍ୟ ତାଙ୍କୁ ସମର୍ଥନ ମିଳିବା ଆଶଙ୍କାକୁ ଏଡାଇ ଦେଇ ହେବନାହିଁ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୋଧରେ ଯୁଦ୍ଧଂ ଦେହି ଡାକରା ଦେଇଥିବା ଡାକ୍ତର ଦାମୋଦର ରାଉତ ଏମିତି ଢଙ୍ଗରେ ପୁଣି ଥରେ ବିଧାନସଭାରେ ପ୍ରବେଶ ପାଇଁ ରାସ୍ତା ଖୋଲୁଛନ୍ତି । ସ୍ଥାନୀୟ ଲୋକମାନେ ମଧ୍ୟ ତାଙ୍କୁ ସହଯୋଗ କରିବେ ବୋଲି ପ୍ରତିଶ୍ରୁତି ଦେବା ଆରମ୍ଭ କରିଛନ୍ତି ।
ଏହାକୁ ନେଇ ସ୍ଥାନୀୟ ବିଧାୟକ ପ୍ରଶାନ୍ତ ମୁଦୁଲିଙ୍କ ଚିନ୍ତା ବଢିବାରେ ଲାଗିଛି । କାରଣ ଆଉ କିଛି ହେଉ କି ନ ହେଉ ବିଜେଡି ଭୋଟ ବିଭାଜନ ଏବଂ ତାଙ୍କ ପାଇଁ ଜିତିବା କଷ୍ଟକର ହୋଇପାରେ ।
ଏପଟେ ନିଜ ଘର ସଜାଡିବା ଭିତରେ ଦାମ ବାବୁ ରାଜ୍ୟ ରାଜନୀତିରେ ସରକାର ବିରୋଧୀରେ ଯେଉଁ ଆକ୍ରମଣାତ୍ମକ କାର୍ଯ୍ୟକ୍ରମ ଆରମ୍ଭ କରିଥିଲେ, ତାହା ଧୀରେ ଧୀରେ ଦୁର୍ବଳ ହେବା ଆରମ୍ଭ କଲାଣି । ଜଣେ ପରେ ଜଣେ ନେତା ଦାମ ବାବୁଙ୍କ ଠାରୁ ଦୂରେଇବା ଆରମ୍ଭ କରିଛନ୍ତି ।
କିଛି ଦିନ ତଳେ ଦାମ ବାବୁ ନୂଆ ଦଳ ଗଠନ କଥା କହିଥିଲେ । ବିଜୁ ପରିବାରକୁ ଏକାଠି କରିବା ଲାଗ ସ୍ୱପ୍ନ ଦେଖାଇଥିଲେ । ହେଲେ ପୂର୍ବତନ ମନ୍ତ୍ରୀ ସୁରେନ୍ଦ୍ର ନାଥ ନାୟକ, ପ୍ରଫୁଲ୍ଲ ଚନ୍ଦ୍ର ଘଡାଇ ପ୍ରମୁଖ ଦାମଙ୍କ ପ୍ରସ୍ତାବକୁ ଠୋ ଠା ଫାଙ୍କିଥିଲେ । କୁଜଙ୍ଗ ସମାବେଶରେ ଦେଖାଯାଇଥିଲା ଯେ ପୂର୍ବତନ ମନ୍ତ୍ରୀ ପଞ୍ଚାନନ କାନୁନଗୋ ବି ତାଙ୍କ ସଭାକୁ ଗଲେ ନାହିଁ । ଆଉ ରବିବାର ବାରିପଦା ସଭାରୁ ସାମ୍ୱାଦିକ ରବି ଦାସ ଦୂରେଇ ଯାଇଛନ୍ତିଏବଂ ଶେଷ ମୁହୂୂର୍ତରେ ବୈଜୟନ୍ତ ପଣ୍ଡା ଗସ୍ତ ବାତିଲ୍‍ କରିଦେଇଛନ୍ତି । ଫଳରେ ଦାମ ବାବୁ ଯେ ଏକୁଟିଆ ହୋଇଗଲେଣି, ଏମିତି ଏକ ବାର୍ତା ଯାଉଛି ।
କେବଳ ସେତିକି ନୁହେଁ, ଦାମ ବାବୁ ଭ୍ରଷ୍ଟାଚାର ବିରୋଧରେ ସରକାରଙ୍କୁ ଟାର୍ଗେଟ କରୁଥିବା ବେଳେ ଜେଲ ଯାଇଥିବା ପୂର୍ବତନ ବିଧାୟକ ଯଜ୍ଞେଶ୍ୱର ବାବୁଙ୍କ ସହିତ ଗୋଟିଏ ମଞ୍ଚରେ ବସିବା ଘଟଣାକୁ କେହି ସହଜରେ ଗ୍ରହଣ କରିପାରୁନାହାନ୍ତି । ଆଜି ପୁଣି ବାରିପଦାରେ ବୈଜୟନ୍ତଙ୍କ ୮୦୦ କୋଟିର ବିଜୁଳି ବିଲ୍‍ ବାକି ଥିବା କଥା ଉଠାଇ ଜଣେ ଶ୍ରୋତା ତାଙ୍କ ଦୁର୍ନୀତି ବିରୋଧୀ ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛନ୍ତି ।
ରାଜନୈତିକ ମହଲର କହିବା କଥା ହେଉଛି, ଦାମ ବାବୁଙ୍କୁ କେହି ବିଶ୍ୱାସ କରିପାରୁନାହାନ୍ତି । କାରଣ ସେ ପଦବି ପାଇଁ ଶେଷ ଦିନ ବିି ନବୀନ ପଟ୍ଟନାୟକଙ୍କୁ ପ୍ରଶଂସା କରିଥିଲେ । ମନ୍ତ୍ରୀ ପଦ ଯିବା ପରେ ସେ ଏବେ ତାଙ୍କ ବିରୋଧରେ ବିଷ ଓଗାଳୁଛନ୍ତି । ସେହିପରି ପୂର୍ବତନ ସାଂସଦ ପ୍ୟାରୀ ମୋହନ ମହାପାତ୍ରଙ୍କ ବିରୋଧରେ ସେ ଗର୍ଜୁଥିଲେ । ଏବେ ପ୍ୟାରୀଙ୍କ ସହଯୋଗୀଙ୍କୁ ଧରି ସାଙ୍ଗରେ ବୁଲୁଛନ୍ତି ।ତାଙ୍କର ଏଭଳି କାର୍ଯ୍ୟ ହିଁ ତାଙ୍କୁ ଧୀରେ ଧୀରେ ଅପ୍ରାସଙ୍ଗିକ କରି ଦେଉଛି ।